FFTL Sei Realiza Kopa Iha Maiu ! SLB Husu FFTL Kria Enkontru Uluk Ho Klube 17
SAPNewsTL, Dili: Federasaun Futebol Timor-Leste (FFTL) sei realiza Kopa FFTL 2024 iha fulan maiu 2024 maibe klube AD SLB Laulara husu FFTL kria enkontru ho klube 17 antes kompetisaun ne’e hahu tanba la iha subsidiu ba klube 17 no premiu jogu.
“Bazeia ba enkontru ezekutivu FFTL iha loron 13 fulan marsu 2024 aprova ona realizasaun Kopa FFTL 2024, ami sei fo oportunidade ba klube 17 rejistadu iha divizaun dahuluk no daruak Liga futebol Timor-Leste, tan ne’e hakarak konvida klube sira mai partisipa no hahu rejistrasaun”.
“Rejistrasaun klube ita sei fahe ba parte rua mak hatama uluk Participation Team Agreement (PTA) hahu iha loron 20 fulan marsu to’o 5 fulan abril 2024 no rejistrasaun ba jogador no ofisial klube bazeia ba regulamentu Kopa FFTL hahu iha loron 25 fulan marsu to’o lorong 18 fulan abril 2024, kompetisaun ita sei hahu iha loron 2 fulan maiu remata iha loron 30 fulan junu 2024”, dehan diretor kompetisaun FFTL Frederico Martins ba jornalista sira liu husi konferensia imprensa iha edifisiu FFTL Bairro Formosa, Dili kuarta (20/03/2024).
Diretor hatutan, premiu ba Kopa FFTL 2024 ne’e rasik manan nain dahuluk sei hetan orsamentu montante 15,000, manan nain daruak sei simu 10,000 USD, datoluk sei hetan 7,500 USD no dahaat sei simu 5,000 USD, kopa ne’e rasik sei utiliza kampu Estadium Munisipal Dili deit tanba limitasaun orsamentu.
Frederico informa tan, sira mos fo ona karta kuñesimentu ba klube 17 iha loron rua liu, nune’e sira hein klube sira mai halo rejistrasaun, desizaun ezekutivu FFTL deside ona katak la iha subsidiu no premiu jogu ba klube sira.
Iha sorin seluk, sekretariu jeral AD SLB Laulara Domingos Caeiro hatete, FFTL seidauk konvoka reuniaun ho klube sira tanba subsidiu no premiu jogu ba klube sira la iha, tan ne’e sira husu ba FFTL bolu uluk klube sira tuur hamutuk hare’e orsamentu ho data atu realiza kopa ne’e.
“FFTL seidauk konvoka reuniaun ho klube maibe ami tenta kontaktu FFTL liu husi media sosial tanba subsidiu no premiu jogu ba klube sira la iha, ida ne’e klube sira hare’e posibilidade atu partisipa ka Lae? tan ne’e ami husu ba FFTL bolu klube sira tuur hamutuk hare’e orsamentu ho data atu realiza kopa ne’e, labele konvida klube sira mai ita hala’o kompetisaun ne’e labele”, tenik Domingos.
Sekretariu ne’e salienta tan, AD SLB Laulara durante ne’e sira nia ezizensia ba FFTL, se FFTL atu realiza kompetisaun konvida uluk jerente klube sira tuur hamutuk ho finanseiru FFTL hodi tetu para kompetisaun la’o diak ho tempu sufisiente tanba klube sira la iha ona atividade ho jogador sira durante tinan rua ona.
Nia afirma tan, supreza oituan tanba foin rona FFTL atu realiza Kopa FFTL 2024 tanba klube ofisialmente seidauk hetan karta konvite ruma husi FFTL maibe sira hetan informasaun husi media sosial deit, AD SLB Laulara iha prinspiu prontu atu kompete iha kopa ne’e mezmu sira nia jogador nain hitu depois ba kompete Timor Cup iha Australia la fila mai Timor-Leste daudaun hetan ona kontratu husi klube divizaun datoluk iha Australia, ho tempu limitadu jogu lao fulan ida deit husi fulan maiu to’o junu maibe sira esforsu buka jogador nain hitu hodi taka fali fatin jogador ba Australia ne’e.
Entretantu, klube 17 iha oportunidade atu kompete iha Kopa FFTL 2024 mak klube ualu rejistadu iha divizaun dahuluk maka AD SLB Laulara, Karketu Dili FC, Assalam FC, Porto Taibessi FC, Emmanuel FC, Aitana FC, Academica FC no Atletico Ultramar/Coração FC no klube sia rejistadu iha divizaun daruak Liga Futebol Timor-Leste maka DIT FC, AS Marca, Nagarjo FC, Kablaki FC, Lica Lica Lemorai FC, Zebra FC, Fitun Estudante FC, Santa Cruz FC.
Reportajen: Augusto dos Santos