CDTL Sei Suspende Atividade Federasaun Desportiva 6
SAPNewsTL, Dili: Konfederasaun Desportu Timor-Leste sigla portuges (CDTL) sei suspende atividade federasaun desportiva neen tanba durante ne’e la iha atividade.
“Ita nia federasaun hamutuk neen mak ita notifika tanba dezde estabelesimentu to’o dezembru tinan kotuk sira seidauk iha estrutura tanba la iha kongresu nune’e labele organiza sira nia atividade tan ne’e iha fulan janeiru CDTL notifika fo tempu durante loron 90 para atu sira organiza sira nia federasaun fila fali”.
“Nune’e ita hein to’o iha loron 31 fulan marsu 2024 mak federasaun neen CDTL notifika ona sei hetan suspensaun bazeia ba desizaun asembleia anual 2023 aprova tiha ona fo kompetensia ba prezidente CDTL fo suspensaun ba federasaun la reativa sira nia organizasaun”, dehan prezidente CDTL Macario F. Sanches ba jornalista sira iha salaun otel Luz Clarita Bairro Formosa, Dili kuarta (20/03/2024).
Prezidente hatutan, CDTL fo suspensaun la determina tempu maibe bainhira federasaun sira ne’e prepara an ona sira aplika fila fali afiliadu ba CDTL tuir lei baze desportu diploma ministerial no. 40/2020 hodi aprova fila fali asembleia.
Macario Informa, federasaun neen CDTL notifika mak federasaun Billiard, Netball, Teqball, corrida de Cavalo, Sailing no Rama Hana.
Entretantu agora ne’e Federasaun desportiva 35 mak hamahan an iha CDTL maibe karik CDTL suspende federasaun neen entaun hela mak federasaun 29.
Reportajen: Augusto dos Santos
