Aprova Medidas Kontrola Reseitas Médikas ! Hadia Mentalidade Hakarak Simu De’it Osan

Imajem : Primeiru Ministru Kay Rala Xanana Gusmão iha Palasiu Presitente Nivolau Lobato, Dili,20/03/2025. Foto : Media PR

SAPNewsTL, Dili : Hafoin enkontru semanal ho Presidente Repúblika José Ramos Horta, Xefe Governu  Kay Rala Xanana Gusmão deklara KM aprova Medidas Kontrola Reseitas Médikas, doutor kura ema moras sai saudável la’os hakarak simu de’it osan.

Primeiru Ministru Xanana Gusmão hateten Konselhu Ministru aprova medidas atu kontrola didiak reseitas medikas.

“Semenalmente mai hato’o ba Presidente Repúblika, Governu halo ona saida liliu halo sala hira ona mai konfesa. Orseik ami iha Konselhu Ministru ami aprova tiha medidas atu kontrola didiak reseitas medikas tamba hodi hatene doutor ida ne’ebe maka fo reseitas ida ne’ebe no aimoruk saida. Tamba dalaruma ita ko’alia, ita gosta ko’alia mate, mate atus ida ona, mate rihun ida ona”. Dehan Primeiru Ministru Kay Rala Xanana Gusmão iha Palasio Presidensial Nicolau Lobato Bairo-Pite,20/03/2025

Primeiru Ministru afirma katak, “Agora Governo nia misaun ne’e buka hatene mate tamba saida. Ha’u dehan tamba saida, ne’e laos deit tamba moras. Laos deit moras, tamba falta hahan karik?  mais dalaruma kona ba buat ida tratamentu ne’e”. PM sublinha

“Doutor ida ne’e iha klinika ida ne’e, iha fali fatin seluk, nia fo aimoruk mos hanesan ita haree ba laos moras ida ne’eba ladun kura. Doutor ida ne’e ladun analiza buat ruma karik ho ida ne’e maka ita bele kuriji mentalidade bele matenek to’o iha ne’ebe, mentalidade ladun diak, ita hakarak simu deit osan”.Katak Xanana

Primeiru Ministru mos hatutan nia iha experiénsia kona ba pasiente ne’ebe moras hasoru nia no husu tulun hodi ba konsulta iha klínika Bairo-Pite.

“Ha’u iha experiénsia uitoan tinan hirak liu ba, Doutor Daniel sei moris, ha’u la’o ba la’o mai, ama ruma ou labarik feto ruma, Avo Nana ha’u moras tinan ida ona mais lakura kura. Ne’e ha’u lori mai Doutor Daniel fo reseitas aimoruk buat sira ne’e hotu nia dehan sala. Nia la moras ida ne’e sira fo fali ai-moruk sala. Nia moras ida ne’e, simu tiha aimoruk klínika sorin balu ne’e, fulan rua hasoru fali ha’u, haksoit hamnasa dehan kuradu tiha ona “.PM konta

Alem ida ne’e, Primeiru Ministru mos hatutan Governo laos atu impede ema para mate maibe Governo buka haree baze tamba ita hatene iha Dili fan aimoruk barbarak.

 “Governo la’os atu impede ema para mate. maibe ba governu atu buka haree ba baze, tamba ita boot sira hatene iha Dili, fan aimoruk deit barbarak ida. imi seidauk hatene karik ha’u bele lori imi tuir klínika ida ida”.

Primeiru Ministru  sei buka hatene aimoruk tanba governu haree komprimisiu kuadrus saúde nian

“Dehan falta aimoruk. Aimoruk barbarak hela agora ita buka hatene aimoruk nee diak kalae? buat sira ne’e hotu. Depois mos sei iha poblema nafatin maka  Governu dehan katak atu haree ba komprimisiu kuadrus saúde ninian ne’e ba ninia misaun kura ema”.

Xefe Governo haforsa iha servisu rua ne’ebe laos atu servisu hetan osan maka edukasaun no súde .

“Sira nia servisu ne’e misaun. profesor sira atu hanorin labarik sira hodi sai matenek atu servi rai ida ne’e no doutor  no infermeira sira atu kura ema hodi kuida didiak para bele investe tinan hirak mai tenki saudavel no edukadu”.Nia haforsa

Jornalista : Vinsensius Saldanha Morais De Araujo