Assanami Ba Primeiru Ministru, PD Sei Hari’i Dormitóriu Ba Estudante No Uma Ba Mestre Sira

SAPNewsTL, Atauro : Liu husi Mini Kampanha Partidu Demokrátiku (PD) iha Munisipiu Atauro, Presidente Partidu Demokrátiku Mariano Assanami Sabino haktuir, wainhira PD manan, sai Primeiru Ministru, PD hakarak kria dormitóriu ba estudante sira, bolsa estudu ba joven sira, no kréditu ba joven sira ne’ebe remata nia estudu iha sekundária tanba joven mak futuru nasaun nian

“Ita hakarak kria dormitóriu ba estudante sira, bolsa estudu ba joven sira, no kréditu ba joven sira ne’ebe remata nia estudu iha sekundária tanba joven mak futuru nasaun nian, garantia edukasaun ne’ebe kualidade liu husi rezolve problema professor voluntáriu no kontratadu, hari’i uma ba mestre sira para sira bele uza hodi hela no hanorin estudante sira”. Tenik Presidente PD Mariano Assanami Sabino Lopes, liu husi nia diskursu iha Munisipiu Atauro, 11/05/2023

Lider Partidu Demokrátiku ne’e mos sublinha “PD hakarak desenvolve setor saúde, profisionaliza enfermeiru  no doutor sira, hadia kualidade saúde iha Atauro, hari’i uma ba doutor no enfermeira sira, wainhira PD ba ukun, tanba PD mai ho pensamentu Hamutuk halo mudansa, hadia povu nia moris no hametin ukun rasik an”. Hatete Assanami

Iha Parte seluk, PD sei hasa’e osan fim do ano kada família $ 200 ba $ 400, osan ne’ebe uma kain ida-idak sei simu $ 200 kada fulan neen (6)

“Wainhira PD manan, Ha’u sai Primeiru Ministru, ita sei hasa’e subsídiu $200 ba $400, kada família bele simu $ 200 kada fulan neen, ita bele halo nafatin, maibe PD mak tenki Primeiru Ministru, Programa sexta bazika ne’e ita hakarak kooperativa mak sosa la’os kompanha, para kaut ida ka rua mos kooperativa bele sosa, povu bele moris diak”. dehan Assanami

Entretantu, PD mos Promete Desenvolve infraestrutura sira, desenvolve Turizmu Ekolójiku No Rezolve Bee Moos, estrada, hadia setor peskas no fasilita povu para fasil hetan osan hodi hadia familia nia moris iha Munisipiu Atauro

Jornalista : Ferderita Miranda