Canisius & Joanico Husu Jovens Sa’e Ring, Labele Halo Problema Iha Liur

Imajem : Boxista Canisius Bria da Conceição no Joanico Babo Gomes iha Hudi-Laran, 26/12/2024. Foto : Ekipa SAPNews

SAPNewsTL, Dili : Hafoin partisipa the ultimate boxing iha ámbitu Commemoration 10 Years of Guardian Angle Entertainment Existence. Boxista Joanico Babo Gomes (Joni W) no Canisius Bria da Conceição(Titi Nizia) husu joven sira hodi sa’e ring no labele baku malu iha dalan ninin.

Canisius fo boas festas no boas entradas ba ninia fans sira no Timor oan sira, hamutuk simu tinan foun ho paz no unidade, karik iha problema bele sa’e rin leten hodi labele baku malu iha dalan ninin.

“Ha’u nia boas festas no boas entradas ba ita hotu, karik ita hemu tua, labele lanu, ita mak hemu tua laos tua mak hemu ita, karik iha problema ruma bele sa’e rin maibe labele tuku malu ida dalan ninin”. Tenik Canisius alias Titi Nizia ba SAPNews iha Hudi-Laran, 26/12/2024.

Boxista Canisius Bria da Conceição

Boxista Canisius deklara nia parte sei kontinua talentu ne’e no hein ema ruma nia request hodi kontinua sa’e ring.

“Ha’u nia hakuak no domin ba sira ne’ebe suporta ha’u no la gosta ha’u, ha’u sei kontinua talentu ne’e no ha’u hein ema ruma request, ha’u sei simu hodi sa’e ring”. Nia deklara

Joanico Babo Gomes hateten “Ida ne’e hanesan experiensia diak, ami foin aprende, ami sei dezenvolve diak liutan, sai boxista profesional hodi lori Timor ba oin”.

Imajem : Boxista Joanico Babo Gomes

Joanico husu ba joven sira hodi hatudu jagoan ka expertu liu hosi sa’e ring, labele tuku malu iha dalan ninin tanba ne’e la fo efeitu pozitivu ba dezenvolvimentu Juventude iha prezente no futuru.

“Ba joven sira labele tuku malu iha dalan ka iha liur, jagoan ne’e sa’e ring deit, bainhira ita sa’e rin ita hetan premiu no apresiasaun”.

Boxista ne’e fo boas festas santu natal no felix tinan foun ba Timor oan sira hodi moris ho haksolok liutan iha tinan 2025.

Jornalista : Marciana da Conceição