CONTL Hamutuk Federasaun 22 Realiza Asembleia Anual
SAPNewsTL, Dili: Komite Nasional Olimpiku Timor-Leste (sigla portuges CONTL) realiza kongresu anual ba daneen hodi aprezenta relatoriu tinan 2023 ba federasaun desportiva hamutuk 22 tanba sira nu’udar membru ba CONTL.
“Asembleia anual ida ne’e ami realiza ho objetivu aprezenta relatoriu finanseiru no planu atividade tinan oin ba membru sira hamahan iha CONTL rasik tanba normálmente organizasaun hotu-hotu liu-liu CONTL nivel internasionál tinan-tinan sempre hala’o tanba organizasaun internasionál mak husu kada tinan-tinan tenki halo hodi relata relatoriu finansa ba sira”, dehan vise prezidente CONTL Mateus da Cruz ba jornalista sira iha otel JL Vila domingu (17/12/2023).
Vise prezidente hatutan, relatoriu no planu tinan oin sira aprezenta laiha federasaun desportiva ida mak vota kontra tanba kada fulan rua sira sempre fo informasaun orsamentu CONTL nian bá federasaun sira.
Nia informa tan, asembleia ida ne’e sira hakarak Prezidente CONTL Francisco Kalbuadi Lay partisipa, tan ne’e sira muda dala tolu ona, hare’e ba prezidente CONTL nia kalendariu nune’e ohin sira muda mai domingu maibe la konsege tanba vizita servisu governu ba rai liur maibé estatutu fó dalan bá vise no sekretáriu jerál bele lidera.
Iha sorin seluk, sekretariu jeral Federasaun Tenis Kampu Timor-Leste (FETTIL) Frederico Soares Sarmento hatete, nia apresia CONTL realiza asembleia anual tanba CONTL halo atividade barak ba federasaun sira liuliu FETTIL iha 2023.
“Asembleia jerál CONTL nian ha’u apresia tebes tanba sira halo ona buat barak ba ita nia federasaun sira liuliu FETTIL tanba iha 2023 ami nia federaasaun partisipa iha Asian Games iha China”, tenik Frederico
Frederico afirma tan, sira halo observasaun bá asembleia jerál ohin nian sira rona CONTL mos aprezenta planu tinan 2024, nune’e sira mos toma nota hela hodi bele serbisu hamutuk ho CONTL bazeia ba planu 2024 nian.
Portantu, orsamentu apoiu bá CONTL iha 2023 hodi realiza atividade nasional ho internasionál mak Ministeriu Juventude Desportu Arte Kultura (sigla portuges MJDAC) fo 147,718.00 USD, orsamentu husi OCA Activity 2023 ho montante 172,883 USD, orsamentu husi IOC Administratiion Subsidy 2023 ho montante 45,000 USD, husi Sourship Atletic preparation Olympic Games Paris IOC ho montante 90,000 USD husi Tecnical Courses Coush IOC ho montante 15,000 USD husi Federation Genastic JAPAN ho Federation Gymasoc Timor Leste ho montante 8,5000 USD totál hamutuk 331,383 USD.
Entretantu reprezentante federasaun desportiva 22 sira partisipa iha asembleia CONTL daneen maka federasaun atletizmu, Archery, badminton, boxe, siklizmu, Jinastika, Handball, Hockey, Judo, Karate, Natasaun, Penthatlon, Roller, Sailing, Ski, Taekwondo, Tiru, Tenis Kampu, Tenis Meza, Triathlon, Voleibol no Weightlifting.
Reportajen: Augusto dos Santos