Dalan Ba Tinan 50 Proklamasaun ! Governu Mantein Suspende Atividade GAM & GAR
Imajem : Primeiru Ministru Kayrala Xanana Gusmão iha Palasiu Prezidensial Dili,03/04/2025
SAPNewsTL, Díli : Primeiru-Ministru (PM) Kay Rala Xanana Gusmão deklara, Governu kontinua extende suspensaun pratika atividade Grupu Arte Marsiais (GAM) no Arte Rituais (GAR) to’o loron 31 fulan dezembru 2025.
Xefi Governu hateten, bazeia ba reuniaun konsultivu Konsellu Ministru (KM) Governu deside kontinua suspende atividade GAM-GAR to’o fulan dezembru tinan ne’e tanba bele halo redusaun ba númeru violénsia iha Timor-Leste.
“Ami extende deit labele halo rekrutamentus, labele halo treinu no hala’o aktividades Arte marsiais tanba buat hotu la’o diak lae, tuir ami nia hanoin mentalidade Timor nian hanesan ita hapara tiha ona buat ne’e seidauk to’o iha ita nia fuan ne’ebe agora mais ou menus laiha violensia hanesan uluk” Lia hirak ne’e PM Xanana hato’o ba jornalista sira hafoin remata enkontru semanal ho Presidenti Republika Jose Ramos Horta iha, Palasiu Presidensial Aitarak-laran Quinta (03/04/2025)
PM Xanana aprofunda, Governu deside suspende atividade pratika Arte Marsiais no Arte Rituais to’o fulan dezembru tanba bele garante paz no ambiente hakmatek iha sosiedade nia le’et.
“Horseik mos ami hasa’e dekretu lei ida kona-ba atu halo lei baze atu haruka ba Parlamentu, mais Parlamentu Nasional (PN) lei barak teb-tebes ne’ebe ami dehan hein lai ba maibe mosu iha ne’e, iha ne’eba tanba diak liu ita hamnasa nafatin ambiente ida ne’e liliu tanba ami tau kedas to’o 31 De dezembro ne’e”. Tenik PM Xanana
Xefi Governu realsa tuir nia haree mentalidade sidadaun timoroan nian fraku tanba ne’e nia parte konkorda kontinua suspende atividade GAM-GAR iha Timor-Leste to’o fulan dezembru.
“Problema sei mosu iha ne’eba, iha ne’e tanba mentalidade fraku, tan ne’e ita kontinua
extende no la autoriza halo aktividades refere tanbasa, tenki suspende, tanba 28 novembru hanesan loron importante ida ba Timor Leste,
ita sei festeza loron istoriku ida ne’e” Dehan nia.
Primeiru-Ministru esplika tinan ne’e Timor-Leste festeza 50 anos proklamasaun Independénsia, nune’e (KM) deside taka atividade GAM-GAR to’o fulan dezembru atu nune’e labele hamosu komflitu entre sidadaun sira ne’ebe sai hanesan membru GAM-GAR.
“Tamba sa, tanba 28 de novembru de 2025, 50 anos proklamasaun Independénsia ne’ebe hala’o iha 28 de novembru de 1975 ne’ebe ita tau tiha ida ne’e depois mosu fali tau to’o kedas 31 tanba tinan ida ne’e tinan 50 anos”.
Entretantu, Liu husi Konselho Ministru hasai medida ida iha loron 10 fulan Novembru, Rezolusaun Governo no.45/2023 no mos prolonga ona Rezolusaun Governo no.17/24 iha loron 24 fulan Abril no númeru 60/2024 iha loron 7 fulan Novembru hodi suspende atividade pratika Arte Marsiais no Rituais.
Jornalista : Vinsensius Saldanha Morais De Araujo