Délio Agradese Ba Krítika Públiku & Promete Hadia Iha Futuru
Imajem : Délio Anzaqueci Mouzinho
SAPNewsTL, Dili : Hafoin derrota kontra Callum Peters iha Australia, Boxista timoroan Délio Anzaqueci Mouzinho husu deskulpa ba povu Timor-Leste, no deklara nia parte sei hadia no la rende, maibe hamrik fila fali hodi treina no prepara an eventu boxing iha futuru.
Daniel da Silva & Dircia Belo – Sapnews Pro
”Ha’u husu deskulpa ba povu Timor-Leste, rezultadu derrota ida ne’e fo teste no exame ba ha’u hodi hadia diak liután, ita kompete ho esforsu no tékniku mak nune’e, maibe ita sei melhoria iha futuru maske ita triste maibe luta nafatin”.
”Foin primeira vez, ha’u ba tuir eventu internasional ne’ebe boot liu iha Australia, ha’u hetan experiensia foun, ha’u monu ne’e hanesan sasukat ida hodi hatene oinsa ita hader fila fali no hakat ba oin”. Hatete Boxista Délio Mouzinho ba SAPNews iha Lecidere, 06/04/2026
Anzaqueci hatutan, kultuta “Kompetisaun iha lakon no manan, ita tenki fuan boot simu konsekuensia no realidade ida ne’e, ita monu, ita labele tauk, ita lakon ho ema ne’ebe iha experiensia no treinu diak liu ita, maibe ita tenki forsa nafatin hodi luta no defende ita-nia nasaun” liu hosi jogu desportivu sira iha futuru.
”Ha’u kontinua no nafatin prepara an atu partisipa iha eventu tuir mai, atu Saroha (Boxista Indoneziu) no se deit mak hakarak, ha’u prontu nafatin hodi hasoru ho lisaun sira ne’ebe ultrapassa ona”.
Delio husu ba timoroan sira atu kontinua luta nafatin ba futuru, wainhira monu hamrik fila fali, la’o ba oin no labele rende, ohin bele lakon maibe loron ida sei manan, ohin ema nia oportunidade ba vitoria, “ita aprende nafatin aban bainrua ita sei sai kampiaun”.
”Maluk timoroan sira, bainhira ita monu iha ring leten no iha ne’ebe deit, ita hamrik fila fali, importante ita labele rende, hamrik hodi la’o nafatin ba oin, ohin ha’u lakon maibe ita esforsu, luta no prepara to’o loron ida ita sei sai kampiaun”.
Mouzinho dehan, “Ita treinu nafatin ho dixiplina hodi hakat ba kompetisaun sira tuir mai, dalan ne’ebe ha’u liu loke daudaun ona, ha’u husu ba joven sira hotu hodi aprende no treinu, nune’e bele hola parte iha eventu tuir mai”. Nia sublinha
Delio mos fo agradese ba timoroan hotu ne’ebe krítika, tantu apoia direta no indireta, nia parte husu ema hotu atu kontinua suporta no servisu didiak hodi kontribui ba ekonomia familia no dezenvolvimentu nasaun nian.
”Ha’u la haluha, agradese ba sira hotu ne’ebe halo kritika no ko’alia makaas kona ba derrota ne’e, agradese ba timoroan iha rai-liur no rai-laran ne’ebe apoia ha’u, esperansa nafatin katak ohin lakon maibe to’o tempu ida ha’u sei hetan vitoria no sai kampiaun ho bandeira Timor nian”.
Treinador El Matador Abilio Orlando rekunhese derrota ne’ebe Delio Mouzinho hetan, nia realsa kompetisaun sei la to’o iha ne’e, ita kontinua prepara an hodi joga iha eventu hirak tuir mai.
”Ohin ita monu, la’os monu ba ida ne’e deit, ita sei hamrik fila fali hodi foti sa’e ita nia bandeira Timor nian ba mundu”.
”Derrota ida ne’e la signifika ita atu derrota hela deit ona, ne’e hanesan matéria ida ba Délio no ami tékniku sira atu hamrik fila fali prepara ba kompetisaun sira iha futuru”.
Abilio afirma nia parte sei servisu hamutuk ho Federasaun no Klube sira iha Australia hodi fasilita boxista potensial sira hodi ba joga iha rai-liur.
”Ha’u sei halo linha koordenasaun ho Federasaun no Klube sira iha Australia ho diak, Délio loke ona odamatan, wainhira kompetisaun iha, sira sei konvida ita, ha’u sei loke odamatan ba boxista timoroan sira ne’ebe potensial hodi ba joga”.
Treinador ne’e mos fo “Apresia ba governu ne’ebe antes ne’e apóia Délio joga iha Canadá no Indonésia, agradese ba embaixada Timor-Leste iha Australia ne’ebe apoia moral, apresiasaun klean ba timoroan hotu ne’ebe apóia Delio” iha eventu boxing ne’ebe hala’o iha Australia.
Lembra fali katak iha jogu ronda dahuluk, boxista na’in rua ( Délio Anzaqueci & Callum Peters) hatudu performánsia diferente hodi tuku malu iha ring leten, tuir mai Callum Peters tuku razada hasoru Délio Mouzinho to’o nia monu iha ring leten.
Iha ronda daruak, Délio Anzaqueci kontinua halo esforsu no resiliente hodi enfrenta adversáriu maibe Peters kontinua demonstra ninia kapasidade tékniku no profissional hodi tuku makaas ba Délio nia oin to’o monu dala ida tan iha ring leten.
Ikus mai, arbitragem deside hapara jogu no fo “Knock Out” ba boxista timoroan Délio Anzaqueci Mouzinho tanba nia adversáriu iha kbiit boot no halakon nia.
Nune’e, Boxista Australianu Callum Peters sai manan na’in ho skore 6 a 0 iha Eventu boxing internasionál, WIN Entertainment Centre.
Jogu Boxing ne’ebe hala’o iha Wollongong, Australia, loron 05 Abril 2026 liuba partisipa hosi boxista internasional oioin husi Ásia no Europa.
Entretantu, tuir planu Boxista timoroan Daniel oras ne’e prepara an no nia sei joga hasoru boxista ida hosi Australia iha Melbourne, loron 24 Abril 2026.
#deliomouzinho #boxing #dili #elmatador #timorleste @penggemar berat
