Délio Soke, Alisher Baku Fila ! “Mehi Sai Realidade Tanba Esforsu Makaas”
Imajem : Boxista Délio Anzaqueci Mouzinho hamonu Alisher Ismailov hosi Uzbequistão iha Bali, 09/02/2025
SAPNewsTL, Bali : Boxing Atlas Super Club ne’ebé realiza iha Bali-Indonésia, finalmente Délio Anzaqueci Mouzinho hamonu Alisher Ismailov iha ronda daruak, nune’e Délio sai manan na’in ba eventu internasionál.
Durante, jogu la’o Boxista Timoroan Délio Mouzinho hahú ho isin moris no besik nafatin Boxista Uzbequistão Alisher Ismailov hodi tuku malu to’o ronda dahuluk remata.
Hafoin ronda dahuluk, iha ronda daruak nia inisiu, Délio Mouzinho hamonu Alisher Ismailov liu hosi tuku iha oin, iha ne’ebé Alisher la tahan no monu iha ring leten.
Nune’e, iha momentu ne’ebé nia monu rezulta Délio Anzaqueci Mouzinho konkista vitória no sai manan na’in iha eventu Atlas Super Club Bali-Indonésia.
Hafoin hetan vitória, komisaun atribui medalla no prémiu ba Boxista Délio Anzaqueci Mouzinho no hetan basa liman, haklalak no orgullu hosi Timoroan sira inklui Indonésiu sira ne’ebe partisipa direta iha eventu ne’e.
Manan na’in Délio Anzaqueci ho laran ksolok fo agradese ba Aman Maromak, agradese ninia treinador sira, Primeiru Ministru Kayrala Xanana Gusmão, patrocinador sira no Timoroan hotu ne’ebé suporta iha eventu importante ne’e.
“Agradese no obrigadu barak ba ha’u nia treinador, prêmiu ne’e ha’u fo ba imi, agradese ba Avó Xanana, Maun Raul Lemos, Lourenço, Timoroan sira hotu ne’ebé suporta makaas, obrigadu barak no Ha’u hadomi imi hotu, hakruk ba imi hotu”. Tenik Délio Anzaqueci iha Bali, 09/02/2025
Imajem : Deniel D. A. Belo & Délio Anzaqueci Mouzinho.
Délio Anzaqueci Mouzinho liu hosi publikasaun iha nia konta Facebook haktuir “La’os toba deit maka meti sai realidade maibe presiza esforsu makaas, agradese tebes ba buat hot-hotu”. Hakerek Délio Anzaqueci
Iha tempu hanesan, Délio Mouzinho mós dezafia tan boxista ida ne’ebé partisipa mós iha eventu refere, nune’e sira sei sa’e ring iha fulan Jullu tinan 2025 iha Indonésia.
Fo hanoin fali katak, Boxista Deniel D. A. Belo mós konkista vitória hasoru Sakti hosi Indonésia tanba nia hamonu Sakti iha ronda datoluk.
Parabens, parabens no parabens ba Boxista Delio Mouzinho no Deniel D. A. Belo ne’ebé lori nasaun Timor-Leste nia naran hodi hatudu ba mundu katak Timor mós bele, Timor tenki ba oin ho kualidade no susesu boot.
Tuir observasaun SAPNews iha Kapital Dili nota katak wainhira jogu hahú Timoroan sira akompanha live streming, halo barullu, haklalak no haksolok wainhira Boxista Deniel Belo hamonu Sakti hosi Indonesia iha ronda datoluk no Delio Mouzinho hamonu Alisher Ismailov iha ronda daruak.
Jornalista : Marciana da Conceição
