Dependente Ba Udan-Been ! Komunidade Luro Obrigadu Halo Natar Iha Oras Kalan

Imagem : Komunidade Aldeia Abere fokit hare iha tempu kalan tanba falta udan-been iha Luro,20/03/2025

SAPNewsTL, Lautém : Relasiona ho mudansa klimátika ne’ebé rezulta udan monu rai la tuir tempu, komunidade agrikultura iha aldeia Abere suku Luro obrigadu halo natar iha tempu kalan tanba dependensia ba udan-been.

Komunidade Felix Fereira haktuir natar ne’ebé mak sira halo iha Luro dependente tebes ba udan-been tanba labele dada bee-mota ba natar, nune’e bainhira udan tun sira tenki aproveita ho didiak hodi kuda no finaliza sira nia servisu ho lais tanba ta’uk bee maran.

“Ami nia natar ne’e laiha barragem no irrigasaun tanba bee-mota iha inklinasaun ne’ebé baixa liu kompara ho natar, ami dependente liu ba udan-been, dalaruma udan mai tarde, nune’e ami tenki halais servisu tuir udan tanba dala barak tebes udan monu rai la tuir nia tempu”. Teni Felix Fereira ba SAPNews iha Luro, 20/03/2025

Felix hatutan, tinan barak nia laran sira abandona natar tanba problema mudansa klimátika ka falta bee no laiha trator ne’ebé bele fasilita sira nia servisu.

“Ami nia natar ne’e tinan liman nia laran ami husik deit tanba problema bee, udan monu la tuir tempu no laiha trator ne’ebé bele fasilita ami, maibe ohin loron ami bele halo fali natar tanba iha ona trator no udan maske susar ba bee”. Nia hatutan

Alice da Costa informa, tinan hirak ba kotuk husik hela natar no deside halo fali servisu seluk hanesan kuda modo no hakiak animal tanba laiha bee no hein deit udan been.

“Tempu naruk ami husik natar tanba hein deit udan been no dala barak tebes udan la tun, entaun ami deside husik hela, halo servisu hmkuda modo no hakiak animal maibe tinan ne’e bele halo natar tanba governu apoia trator, maske udan been iha uituan”. Hateten Alice da Costa

Imajem : Komunidade fokit Hare iha tempu kalam

Nia hatutan, probelma ne’ebé sira hasoru maka wainhira hare ne’e atu iha ona isin, dala barak hetan estraga husi lakataru, laho no udan, inklui udan ne’e mai barak liu iha fulan Junhu, Jullu no Agustu.

“Ami ne’ebé halo natar iha area ida ne’e hasoru difikuldade barak maka bainhira hare atu iha ona isin, balada sira hanesan lakataru, laho no karau mai han, la to’o deit ida ne’e, udan mós dala ruma estraga iha ida ne’e tanba iha fulan Junhu to’o Agustu ne’e mak tempu atu kolleta maibe iha fulan tolu ne’e nia laran mak udan monu rai loron no kalan”. Nia siblinha

Iha sorin seluk, Nazário Venáncio sente kontente tanba bele halo fali natar ho trator maske menuz bee, laiha irrigasaun no barragem ne’ebé bele fasilita sira.

“Ha’u kontente tanba bele halo natar fali ho trator maske tinan barak tebes la halai natar, oras ne’e ami hasoru problema bee tanba laiha irrigasaun no barragem, só hein deit udan been tanba ne’e mak ami tenki servisu iha tempu kalan hodi halais ami nia servisu”.

Natar na’in ne’e mós fo agradese ba Ministériu Dezenvolvimentu Rural no Habitasaun Komunitária (MDRHC) ne’ebé lidera hosi Mariano Assanami Sabino tanba bele apoia agrikultor sira hodi reativa hikas natar barak ne’ebé abandonadu durante tinan neen to’o tinan sanulu ba leten.

“Ami agradese tebes ba governu tanba bele apoia ona ami ho trator hodi reativa hikas ami nia natar ne’ebé husik tinan barak nia laran, ami hein katak bele kontinua apoia ami hodi hasa’e produsaun hare iha area rural no ema bele sosa hare ne’ebé ami produz”. Nia agradese

Xefe Aldeia Abere,suku Luro Carlos Pereira hateten, Luro ne’e iha natar barak maibe tinan naruk komunidade sira paradu tanba laiha bee no trator maibe tinan ne’e komunidade sira konsege reativa lubun ida tanba iha trator no udan.

“Iha Luro ne’e natar barak maibe abandona hotu durante ne’e tanba laiha bee, laiha irrigasaun, barragem no laiha trator. Tinan ida ne’e mak foin komunidade sira halo natar barak maibe sei nafatin hasoru problema mudansa klimátika”.Xefe Aldeia Abere Carlos hateten

Autoridade Lokal ne’e mos husu ba governu hodi kontinua apoia trator no fasilita komunidade sira halo irrigasaun no barragem iha natar sira, nune’e bele garante produtivdade populasaun iha area rural liliu produsaun hare, batar no modo sira hodi orienta ba merkadu, nune’e produtor sira bele asesu ba osan no hadia sira-nia kualidade moris.

“Ha’u husu governu liliu MDRHC no Ministériu Agrikultura Peska, Pekuária no Floreta (MAPPF) hodi kontinua apoia povu iha rural liu hosi fasilita trator, halo irrigasaun, barregem no apoia ekipamentu modernu sira hodi bele hakman servisu komunidade nian iha produsaun agríkola tanba durante ne’e ita sei mantein ho esforsu tradisional”.

“Atu hasa’e produsaun, ita tenki moderniza agrikultora ho material no ekipamentu modernu sira hanesan trator halai natar, mákina kuda hare, mákina ku’a hare, mákina dulas hare no aimoruk ne’ebé bele hamate lakataru sira ka balada kiik sira ne’ebé estraga hare ne’ebé atu iha ona isin”. Nia sublinha

Komunidade aldeia Abere konsege reativa ona natar hamutuk hektar sanulu resin iha suku Luro, postu administrativu Luro, munisípiu Lautém.

Lembra fali katak, MDRHC liu hosi programa revitalizasaun komunitária fo ona apoia trator 2 no fasilitador rua ba kada aldeia hodi fasilita komunidade sira halai natar, halo to’os, kuda modo, hakiak animal hanesan karau, manu, fahi, no ikan ho osamentu kategoria transférensia públika ba kada aldeia hamutuk $40.000 to’o 50.000 iha tinan 2024.

Jornalista : Ermelinda Soares