Hadomi Ema Defisiente, RHTO Apoia Motor Ba EhD
Imajem : RHTO entre Motor Roda Tolu ba Prezidente Repúblika José Ramos Horta hodi apoia ba EhD iha Timor-Leste. Dili, 12/08/2024. Foto : Média PR
SAPNewsTL, Díli – Organizasaun Nasionál Raes Hadomi Timor Oan (RHTO), ho ekipa delegasaun ida husi nasaun Indonesia hamutuk na’in 22 halo audiensia ho Prezidenti Repúblika (PR) José Ramos Horta hodi diskute esperiénsia kona-ba apoiu programa rehabilitasaun baze komunitáriu (Community Based Rehabiletation) ba Ema ho Defisiénsia (EhD).
Diretor NGO Raes Hadomi Timor Oan (RHTO) Joãozito dos Santos hateten, Objetivu husi sorumutu entre Prezidente Repúblika José Ramos Horta ho Diretor Raes Hadomi Timor Oan (RHTO) hodi ko’alia kona-ba oinsa nasaun rua aprende no fahe esperiensia iha rehabilitasaun baz komunitáriy ne’ebe apoia makaas liu ba ema ho defisiente.
“Raes Hadomi Timor Oan (RHTO), organizasaun nasional ema ho defisiensia hamutuk ho delegasaun husi Indonesia, Sumba, Makasar, Flores Laguang bai, apoiu programa interkámbiu aprendijajem rehabilitasaun bazea ba komunidade (Comunity Based Rehabilitation, CBR), apoia liu ba ema ho defisiente, ohin mai audiensia ho Prezidente Repúblika hodi ko’alia kona ba apoia EhD”.Dehan Diretor Raes Hadomi Timor Oan, Joãozito dos Santos ba jornalista sira hafoin remata enkontru ho (PR) José Ramos Horta iha Palasiu Prezidente Aitarak-laran, Segunda (12/08/2024).
Diretor ne’e salienta, audiensia ne’e hodi servisu hamutuk ho nasaun Indonesia hodi aprende no fahe esperiensia entre nasaun rua ba Rehabilitasaun bazeada ba komunidade, nune’e RHTO mos rona orientasaun husi Prezidente Repúblika atu reforsa liu tan estabelesementu koperasaun entre RHTO ho Learning Exchange hodi aprende no fahe esperiensia ba malu.
“Audiensia ho Prezidente Repúblika, aprezenta katak ami halo hamutuk ho kolega sira husi indonézia hodi aprende no fahe esperiensia ba malu, inklui rona mos intervensaun husi PR liga ba ami nia servisu entre RHTO ho kolega sira husi indonezia”.
RHTO hamutuk ho Prezidente Repúblika iha Palásiu Presidensial Nicolau Lobato
Nia akresenta, Prezidente Repúblika José Ramos Horta expressa katak diskriminasaun nafatin akontese ba ema defisiente liu husi alokamentu orsamentu geral ne’ebe sei menus, nune’e organizasaun Raes Hadomi Timor Oan entrega motor roda tolu (3) ba PR hodi fahe ba difisiente hirak ne’ebe presiza.
“Ohin PR simu ami ho kontenti nia preokupa tebes ho asuntu difisiente ne’e liuliu ba inkluzaun defisiensia nian, PR mós espresa katak diskriminasaun sei nafatin akontese ba ema ho defisiensia sira liu husi alokamentu orsamentu geral ne’ebe mak sei menus tebes ba ema ki’ak sira no mós ba ema ho difisiensia sira, ho ida ne’e ami mós aproveita tempu RHTO hodi entrega motor roda tolu ba PR hodi bele entrega ba EhD ne’ebe presija liu”.
Diretor ne’e fundamenta, motor roda tolu bele produz ona iha Timor-Leste atu nune’e bele fasilita ema ho defisiensia sira nia movimentu.
Tuir planu RHTO sei produz motor roda tolu iha sanulu (10), hodi oferese ba EhD ne’ebe mak presija liu no balun sei fa’an, tanba programa ne’e hetan apoiu husi Governu Alemanha.
“Motor ne’ebe mak ohin entrega ne’e iha ida, fizikamente motor hitu, maibe ami planu ne’e atu produz motor sanulu (10), ida ohin ami fo ba ita nia sua excelénsia hodi entrega ba ita nia maluk ho difisiénsia sira, katak motor tolu mak ami sei fahe no hitu mak ami sei faan”.
“programa ne’e apoiu husi Governu Alemanha atravez husi mizerior organizasaun katólika ne’ebe maka halo apoia mós organizasaun sosiedade sivil sira iha Timor-Leste ho tempu ne’ebe mak naruk teb-tebes, programa ne’e mos halo modifikasaun ba motor roda tolu, resiklazen surat tahan no mos halo postura ne’ebe entrega ona”.
Diretor ne’e deklara, Prezidente Repúblika José Ramos Horta hateten EhD laos moras ida, maibe hanesan rekursus ida, tanba sira mós iha kapasidade no halo kontribuisaun ba mundu no nasaun.
“Ema ho defisiensia ne’e laos moras ida ka ema ne’ebe mak la iha kapasidade, fizikamente, haree mak nia defisiente maibe nia kapasidade no kontribui makaas ba nasaun ida, ohin PR
hato’o motivasaun ne’ebe diak tebes no valoriza duni ema ho defisiénsia”.
Iha oportunidade ne’e, RHTO entrega simbolikamente motor ida husi motor sanulu ba Prezidente Repúblika José Ramos Horta hodi apoia EhD ne’ebe presiza hodi uza.
Organizasaun EhD iha Timor-Leste mak RHTO, Assosiasaun Defisiente Timor-Leste (ADTL), Assosiasaun Halibur Defisiensia Matan (AHDM-TL), Klibur Defisiénsia Tilun Timor-Leste (KDT-TL) inklui assosiasaun defisiensia sira preokupa kona ba alokasaun orsamentu ba asuntu EhD.
Reportajen: Antonina Lopes & Eleonora Fátima
