Dom Leandro Kongratula Xefe Suku ! Serví Ho Responsabilidade Lalos Atu Hetan Hahí

SAPNewsTL, Baucau : Relasiona ho eleisaun lideransa komunitária ne’ebe realiza ona iha loron 28 Fulan Outobru 2023, Bispu Dioseza Baukau Dom Leandro Maria Alves fo parabens (kongratula) kandidatu eleitu sira tanba bele hetan konfiansa husi povu hodi servi ho responsabilidade.

Dom Leandro mos husu kandidatu Eleitu xefe Suku no Xefe Aldeia sira hodi labele hahi knaar ne’ebe povu fo, maibe mate an hodi servi povu ho responsabilidade liu husi rezolve komunidade nia problema no hato’o preokupasaun sira ba ukun na’in sira.

“Parabens ba kandidatu eleitu sira iha eleisaun suku hamutuk ho nia ekipa, ita hein katak sira sai liman no ain povu nian no na’i ulun sira nian, sira bele rezolve povu nia problema liu husi hato’o povu nia halerik ba leten no hato’o programa guvernu nian ba povu sira”. Tenik Bispu Dioseza Baukau Dom Leandro Maria Alves iha Igreja Katedral Baukau, 30/10/023.

Dom Leandro Maria Alves hatutan, Kandidatu ne’ebe eleitu ba Xefe Suku no Xefe Aldeia, sira presiza halo komunikasaun ne’ebe diak hodi diminui tiha buat ne’ebe halo povu la hakmatek, knaar ne’ebe simu ne’e servisu ida ne’ebe lalos atu hanai maibe atu servisu ho responsabilidade ba suku ne’ebe sira lidera.

“Dala ida tan, parabens ba sira, ita hein katak knaar ne’ebe sira simu ne’e lalos atu hetan hahi no ba ita nia gloria, maibe hanesan servisu ida atu mate ba sira nia an hodi servi povu sira, sira presiza halo komunikasaun ne’ebe diak, hahalok ida ne’e mak ita hein husi sira.”Nia husu

Entretantu, Eleisaun ba Xefe Suku hetan partisipa husi kandidatura sira hamutuk 2141 (Feto na’in 244 no mane na’in 1897) entre sira kandidatu 251 mak sei hakat ba segunda ronda no 201 suku mak manan maioria absoluta iha rodan dahuluk.

Eleisaun ba Lideransa Komunitária Ronda daruak sei realia iha loron 13 Fulan Novembru Tinan 2023, kandidatu ba Xefe Suku ne’ebe sei tama ba segunda vota hamutuk 251 no Kandidatu ba Xefe Aldeia hamutuk  Aldeia 3.

Jornalista : Luis Pailofo