Ekipa TL Sofre Derrota ! Treinador Parabeniza Jogador & Husu Deskulpa Ba Públiku
Imajem : Treinador no Ekipa Jorgador Timor-Leste iha Estádiu Munisipal Dili, 22/07/2025
SAPNewsTL, Dili : Hafoin remata jogu ho modalidade futebol Cabo Verde manan Timor-Leste ho valor 4-0, treinador Timor-Leste Efrem Jeronimo parabeniza jogador Timor maske esforsu makas maibe laiha oportunidade hodi marka golu.
Marciana da Conceição – SAP News TL
“Ha’u fó parabéns ba ekipa Timor maske sira esforsu aan tomak maibe la hetan oportunidade hodi marka golu”. Dehan treinador hafoin remata jogu iha Stadium Munisípiu Dili, 22/07/2025
Nia akresenta, jogador hamutuk ho ekipa esforsu masimu hodi labele lakon no konsidera katak nivel futebol Timor-Leste lahanesan ho nivel futebol adversáriu.
“Jogu hotu-hotu ami ekipa esforsu ho masimu lakoi atu lakon, antes atu tuir kompetisaun jogu, ami hateten beibeik katak nivel futebol sira nian ho ita nian iha diferensia boot maibe ita koko atu kompete ho sira atu hatudu katak Timor moos bele atu kompete”. Nia subliña.
Treinador ne’e akresenta, jogador timoroan foin maka adapta an hodi dezenvolve no aprende mundu futebol ne’e oinsa.
“Ita labele hanoin dook tan, nasaun Portugal ema ne’ebe joga iha liga Europa, ita nia foin maka adapta oinsa dezenvolve futebol, ita lori joven sira atu aprende mundu futebol ne’e oinsa”.
Iha fatin hanesan, kapitaun jogador Timor-Leste Inigo Martins Fatima husu perdaun ba povu Timor-Leste tanba la konsege manan nasaun Cabo Verde iha jogu modalidade futebol tanba ho fiziku ne’ebe la hanesan.
“Ha’u husu deskulpa ba povu Timor tanba lakon , Cabo Verde mai ho fiziku ne’ebe boot (forsa) no ami ho fiziku ne’ebe kiik ami husu deskulpa no husu atu nafatin suporta atu joga tuir mai ami bele forsa nafatin”. Dehan Inigo
Treinador ekipa Cabo Verde Jorge Conceição hateten Timor-Leste ekipa ida ne’ebe diak, organizadu, lais no agresivu maibe Cabo Verde joga diak no merese atu hetan vitória.
“Timór Lorosa’e hanesan ekipa ida ne’ebé di’ak, organizadu ho di’ak, lais, no agresivu, maibé Cabo Verde ohin joga di’ak liu-liu iha primeira parte. Ami joga ho di’ak tebes no merese atu manán”. Dehan treinador ekipa Cabo Verde Jorge Conceição hafoin remata jogu.
Treinador ne’e afirma, hafoin manan Timor-Leste ho skor 4-0, iha jogu tuir mai sente difisi tanba hasoru selesaun Portugal no tenta joga ho diak hodi to’o ba iha jogu final
“Agora ami iha jogu ida ne’ebé susar hasoru Portugal, importante mak manan karik ami hakarak hakat ba finál, ami tenke manan Timor Lorosa’e, no ami konsege manan, ha’u kontinua dehan katak Timor ne’e ekipa ne’ebé di’ak no nakonu ho joven maibé ho futuru barak, parabéns ba imi, agora ami joga hasoru Portugál, tenta joga ho diak hodi hakat ba final”. Nia haktuir.
“Ami agora komesa hanoin kona-ba jogu tuir mai hasoru Portugal, hodi prepara jogadór sira nia fíziku no mentál hodi tau iha dezempeñu ne’ebé di’ak hasoru Portugal, tanba ita hatene sira hanesan ekipa ida ne’ebé di’ak tebes”.
Jorge Conceição akresente, sira kontente ho vitória ne’ebe sira konkista no prepara jogador sira nia fiziku no mental hodi joga hasoru Portugál.
“Jogu tuir mai hasoru Portugál, ami iha espetativa aas. Ha’u hanoin katak ami bele hala’o jogu ne’ebé di’ak, maibé agora daudaun ami haksolok ho vitória no rekupera fíziku no mentál ba jogu hasoru Portugál”.
Jorge sente orgullu no gosta hela iha Timor laos deit tan ekipa jogador sira maibe ho atmosfera no nia tratamentu, nasaun ne’ebe furak no nakonu ho ema diak, nia sei rai Timor iha fuan.
“Timor nasaun espetakular ida, ami gosta hela Timor, laos ekipa deit maibe mos atmosfera no tratamentu. Timor nasaun boot ida, no hau sei rai Timor iha hau nia fuan, independentemente no ami agradese ba akollimentu ne’ebé sira fó mai ami iha Timor, ida-ne’e nasaun ida ne’ebé furak ho ema di’ak sira”.
