Ema Ne’ebe Simples, Haraik An & La Loko An ! Ema Ne’e Matenek

SAPNewsTL, Lautem: Iha missa festa São João Bosco Bispo Dioseze Baucau Dom Leandro Maria Alves konsidera São João Bosco hanesan ema ne’ebe iha simplesidade, haraik an, la loko an, tan ne’e Nia husu ema hotu buka atu rekunese an, rekuñese ba buat ne’ebe mai husi Na’i maromak

Tuir Bispo Dom Leandro Maria Alves katak São João Bosco hanorin ema atu hatene rekuñese an ba grasa matenek ne’ebe mai husi Na’i maromak.

“Ita mos presiza haree katak São João Bosco hanorin ita atu hatene an katak buka rekuñese buat hotu talentu, matenek grasa sira hotu ne’ebe mak ita iha ne’e nain mak Maromak”. Dehan Bispo Dioseze Baucau Dom Leandro Maria Alves iha Parokia São Paulo Lospalos, Kuarta 31/01/2023

Dom Leandro hatutan la iha razaun ba ema atu loko an ba buat di’ak ne’ebe iha maibe buka haraik an liu tan.

“Maromak liu husi ita ka utiliza ita ema atu hatudu maromak ninia kbiit rasik iha ema sira nia le’et, tanba ne’e mak laiha razaun ba ita atu loko an ba buat di’ak ne’ebe mak halo ka ita iha buka atu haraik an liu tan”. Tenik Bispo Baucau

Bispo Leandro akresenta São João Bosco mak ema ne’ebe iha simplesidade la loko an, haraik an no matenek.

“Ema ne’ebe haraik an, bainhira halo buat boot sira hatudu momos katak nia ne’e ema matenek, São João Bosco mak ida ne’e, halo buat bo’ot oi-oin maibe iha simplesidade nia laran la loko an, rekuñese ne’e tanba Nia rasik hanorin atu ita rekuñese katak buat hotu ka buat bo’ot sira ne’e suli husi Na’i maromak”. Informa Dom Leandro

Aman ba Dioseze Baucau ne’e haklean maske Jesus nain ba matenek no matenek nia hun maibe la loko an, Nia haraik an.

“Jesus ida ne’ebe maromak, hatudu hahalok ida ne’ebe diak mezmu ke Nia mak nain ba matenek ne’e maibe Nia la loko an nu’udar matenek boot no haraik an, Ninia haraik an hatudu servi nia maluk sira hodi dialogu ho sira, ko’alia hamutuk ho sira, rona maluk sira atu oinsa mak bele lori ema iha konsiensia ne’ebe mak mos hodi moris hamutuk”. Bispo Leandro fundamenta

Bispo ne’e afirma “Ita la buka hahi ba ita an maibe buka hahi iha Na’i maromak lori ita nia maluk sira ko’alia diak atu sira mos hahi Na’i maromak, ita haree ida ne’e iha São João Bosco”. Bispo sublina

Dom Leandro salienta oinsa ema bele haree hetan maromak ho ita wainhira hatene hamoris iha virtude haraik an.

“Matenek atu servi ka servisu ba maluk sira ne’e so bele realiza wainhira ita hatene hamoris iha ita nia an iha virtude haraik an, virtude ida haraik an ninian ne’e mak ema bele haree hetan oinsa Na’i maromak ho ita “. Nia informa

Jornalista: Luis Pailofo