Ensera Engineering UNTL Games ! MJDAK Sei Realiza Jogu Eskolar Iha Territóriu

SAPNewsTL, Díli – Universidade Nacional Timor Lorosa’e (UNTL, sigla portugés), Faculdade Engenaria Ciência e Tecnologia (FECT, sigla portugés) realiza programa engineering games ho modalidade hanesan futsal, basketbol no futebol.

Xefi Gabinete MJDAK Egas Barros Guterres Godinho hateten programa engineering games komisaun organizadora hato’o proposta ba Ministeriu Juventude Desportu Arte no Kultura (MJDAK), konsege apoiu tuir pedidu ho kbiit ne’ebe iha, nune’e MJDAK  sei apoiu nafatin bainhira iha oportunidade hodi kontinua jogu desportu no aktividade juventude nian.

“Komisaun organizador hato’o proposta ba Ministeriu Juventude Despotu Arte no Kultura (MJDAK), no ami konsege apoiu tuir pedidu no kbiit ne’ebé iha, la signifika apoiu ne’e remata iha ne’e maibé sei iha tempu bainhira ita boot sira iha oportunidade seluk hodi kontinua jogu ida ne’e iha kualker desportu no atividade juventude nian, MJDAK disponivel atu simu no suporta, haree mos ekipamentus ne’ebé ita bo’ot sira presiza, labele triste ho apoiu naton ne’ebé ami fó tanba sei iha oportunidade hodi ita hasoru malu fila fali”. dehan Xefi Gabinete MJDAK Egas Barros Guterres Godinho liu husi nia diskursu iha kampu futebol UNTL Hera, 04/07/2024.

Representante MJDAK ne’e mos kongratula komisaun organizadora liu husi nia assosiasaun akademika estudantil tanba bele hola inisiativa hodi realiza jogu desportivu no anima estudante sira iha UNTL, nune’e bele dezenvolve  no promove talentu estudante sira nian.

“Ministru mos kongratula ba komisaun organizadora ne’ebé iha inisiativa hodi realiza jogu sira no anima joven sira,  ba oin governu liu husi ekipa nasional atu halo selesaun hodi buka jogadores ne’ebé joga di’ak husi estudante universitariu sira”. Nia hatutan.

Xefi Gabinete MJDAK ne’e hateten, sira prepara hodi kria jogu eskolar iha teritóriu laran hodi buka hatene jogadores ne’ebé iha prestasaun di’ak, liu-liu iha munisipiu no postu administrativu sira.

“Ministeriu Juventude Despotu Arte no Kultura (MJDAK) mos prepara hela atu kria jogu eskolar iha teritoriu laran hodi buka hatene ita nia jogadores ne’ebe iha prestasaun di’ak liuliu iha munisipiu no postu sira, tanba ne’e husu mos ba ha’u nia alin sira labele hanoin katak iha joga ida ne’e ekipa rua tenke manan hotu, iha kompetisaun sempre iha lakon no manan, jogu ida ne’e jogu amizade ne’ebé husu ba ita bo’ot sira joga ho profisional”. Tenik Xefi Gabinete MJDAK.

Iha fatin hanesan, Vise Reitora Asuntu Estudante UNTL Ligia Tomas Correia konsidera estudante ne’ebé estuda iha Fakuldade Engenaria sempre hola inisiativa di’ak hodi hala’o no hola parte iha aktividade extrakurikulariu sira, atividade sira ne’e importante tebes ba sira tanba bele dezenvolve liu tan sira nia talentu ba futuru.

“Fakuldade engenaria ho inisiativa diak hodi hatudu katak estudante ne’ebé maka durante ne’e estuda iha fakuldade engenaria iha duni ispiritu voluntariu no komitmentu forte, sira tuir aktividade ne’ebé maka  liga ba ensinu akademika maibé iha mós oportunidade seluk fahe no jere tempu ho diak hodi iha inisiativa kolabora hala’o atividade estrakulikular”. Dehan Vise Reitora Asuntu Estudante UNTL Ligia Tomas Correia

Vise Reitora UNTL ne’e mos agradese ba estrutura senadu hamutuk ho estrutura fakuldade tanba bele servisu hamutuk no servisu makaas tebes hodi hala’o programa engineering games ho susesu no fo satisfasaun ba ema barak iha UNTL.

“La haluha, ha’u agradese no felisita estrutura fakuldade no estrutura senadu sesante no foun sira ne’ebe servisu hamutuk hodi realiza programa ne’e no ohin ita bele ensera ho jogu futebol final entre ekipa husi Departamentu Eletro no Mekanika, parabens ba imi hotu ne’ebe hola parte ona iha programa engineering games”. Hateten Vise Reitora

Vise Dekanu Asuntu Estudantil Jose Soares Pinto dehan, objetivu husi programa engineering games ne’e hodi buka fini jogador husi fakuldade engenaria siensia no teknolojia, nune’e bele kompete entre fakuldade, universidade no eventu nasional sira iha futuru.

“Ohin realiza atividade ida ne’e atu buka fini jogador husi fakuldade engenaria hodi ba kompete entre fakuldade, universidade no eventu nasional sira”. Dehan Vise dekanu asuntu estudanti Jose Soares Pinto.

“Jogu ne’e mos atu hametin liu tan relasaun entre estudante no professores, tanba ne’e realiza jogu amizade hodi haburas no hametin liu tan estudante sira nia talentu ne’ebé iha hodi joga ho profesional, kualidade no hasa’e abilidade seluk ne’ebé estudante sira iha, eventu hirak ne’e la’o tanba hetan kolaborasaun husi senadu fakuldade, nukleu departamentu no gabinete vise reitora asuntu estudantil UNTL nian”. Nia hakotu.

Presidente Komisaun Programa Engineering UNTL Games Tito Guterres fo agradese ba patrosinador sira ne’ebe apoia finanseiru, material no moral, tanba husi apoia ne’ebe iha, komisaun organizadora konsege servisu to’o finaliza eventu ne’e diak no susesu.

“Lori estudante hotu nia naran, ami hato’o agradese wa’in ba patrosinador sira hotu ne’ebe apoia finansial no material liliu sponsor sira hanesan MJDAK, BNCTL, PAX, Timor Telkom, Komponente Naval, Vise Reitora Asuntu Estudantil no Estrutura Fakuldade Engenharia Siensia no Teknolojia tanba bele apoia no fo susesu ba programa engineering games, obrigadu barak ba apoia hirak, imi nia apoia fo ksolok no hamnasa ba ita hotu iha UNTL”. Haktuir Presidente Komisaun

Enkauntu, Programa engineering UNTL games refere kompostu husi modalidade futebol, futsal (ekipa feto no mane), no basketebol (ekipa feto no mane), entretantu modalidade palku muzikal, pintura, voleibol, no xadres komisaun la konsege realiza tanba rekursu finanseiru la sufisiente, maske nune’e, maibe tuir sira sei kontinua programa hirak ne’e ba futuru.

Entretantu, programa engineering games ne’e kompostu husi modalidade hanesan, futsal, basketball no futebol.

Jornalista : Marciana Fernandes & Conzita Mota