Estrada Gleno-Letefoho Aat, Komunidade Ezije Makaer Ukun Kumpri Promesa

Imajem : Estrada ligasaun Gleno ba Letefoho. Ermera, 31/05/2025. Foto : Ermelinda Soares

SAPNewsTL, Ermera : Estrada ligasaun Postu Administrativu Ermera (Gleno) ba Postu Letefoho nakfilak ba tahu-been, komunidade sira kontinua hela ho promesa husi makaer ukun sira.

Ermelinda Soares – SAPNews

Komunidade Pedro de Deus preokupa tanba estrada ligasaun Gleno ba Letefoho no Ermera, antes ne’e fo sai katak sei halo entre fulan Abril & Maiu nia laran maibe infelizmente to’o agora seidauk iha implemensaun.

“Ami komunidade iha Letefoho preokupa tebes ami-nia estrada aat, uluk fo hatene dehan atu hahú halo iha entre fulan Abril no Maiu, maibe to’o agora seidauk mai halo”.

Pedro de Deus husu ba makaer ukun liliu Ministério Obras Públicas hodi kumpri promesa governu nian ba estrada Letefoho ne’ebe tau ona iha planu anual 2025.

Imajem : Pedro de Deus iha Letefoho, 31/05/2035. Foto : Ermelinda Soares

“Ami husu ba Na’i Ulun sira atu bele kumpri promessa no halo ami-nia estrada ne’ebe oras ne’e aat hodi prezudika movimentu transporte iha Ermera”. Informa Pedro de Deus ba SAP News TL iha Letefoho, 31/05/2025.

Antes ne’e, Ministru Obras Públicas (MOP) deklara katak estrada diresaun Gleno ba Letefoho no Ermera iha ona desizaun, nune’e sei hein Banku Mundial hodi bele halo kontrusaun tanba orsamentu ba estrada refere mai hosi fundu impréstimu.

Tuir observasaun Jornalista SAPNewsTL iha terenu nota estrada diresaun husi Gleno ba Postu Letefoho, Atsabe no Ermera ho kondisaun dodok ho tahu no sofre erozaun iha fatin barak, iha ne’ebe difikulta tebes sirkulasaun transporte iha Munisípiu Ermera.

Rekorda fali katak, durante ne’e UNEUMER & MOFA kestiona makaas nonu governu tanba estrada aat difikulta komunidade sira asesu ba merkadu.

Presidente MOFA Igitro dos Santos deklara UNEUMER no MOFA sei fo hatene ba povu Ermera hodi la vota iha eleisaun 2028, wainhira governu la rezolve problema estrada Ermera ho seriedade.

“Estrada Ermera la’os buat foun ne’ebe povu Ermera preokupa maibe durante tinan 23 Timor ukun an, estrada sei aat no difikulta komunidade sira, tinan ne’e governu ne’ebe lidera CNRT & PD tenki tau seriedade hodi rezolve tanba tempu kampanha Ermera sai alvu ba buka votus no hetan konfiansa”.

“Se la rezolve mak tinan 2028, inan aman sira, povu Ermera hatene ona katak CNRT no PD la’os ona representa sira maibe representa grupu oan ida ninia interesse, partidu sira labele ba bosok povu no halo promesa falsu, eleisaun mai tan lalika ba vota tan partidu sira ne’ebé la kumpri sira nia promesa tanba sira la’os ona alternativa iha eleisaun 2028”. Tenik Presidente MOFA Igitro dos Santos iha Jardim 5 Maiu, Dili,01/02/2025

Imajem : Liderança UNEUMER & MOFA hala’o konferénsia imprensa iha Díli, 01/02/2025

Porta Voz Apolinário de Jesus de Deus Dehan Ermera munisipiu ne’ebe kontribui taxa boot ba estadu maibe estrada sai nafatin problema ba komunidade sira.

“Kada mandatu governu ne’ebé ukun hosi partidu ida ba partidu seluk, kondisaun estrada nafatin hasusar movimentasaun povu Ermera, no ita hotu iha estadu ida ne’e hatene katak munisípiu ne’ebé kontribui taxa boot ba estadu mak Ermera (KAFE), no fatin turizmu barak atu bele kontribui reseita domestika ba kofre estadu maibe estrada susar teb-tebes no nakfila ba debu”.

Porta voz ne’e husu governu dasia hodi buka solusaun, nune’e bele rezolve preokupasaun ne’ebe povu Ermera hasoru.

“Ezije ba governu da-sia (IX) ne’ebé ukun hosi partidu CNRT ho PD atu seriu ba resolve preokupasaun ne’ebé munisípiu Ermera hasoru kona-bá Estrada, karik iha periodu ida ne’e mak kondisaun Estrada nafatin aat no auménta pior mak ami nu’udar organizasaun sosiál sei organiza inan no aman sira hosi munisípiu atu la fiar tan ba imi”.

Nia hatutan, “Partidu politiku sira- neʼebé agora hetan asentu iha Parlamentu Nasionál hanesan FRETILIN, PLP, KHUNTO neʼebé sai hanesan opozisaun atu la bele nonok no hakmatek ho povu nia votu ka fiar ne’ebé inan no aman-sira fó ona ba imi. Maibé, presiza imi-nia seriedade iha fiskalizasaun. Nune’e, aprezenta iha uma-fukun Parlamentu Nasionál”.

“Alerta ba sosiedade tomak liuliu hosi sosiedade munisípiu Ermera katak iha periodu ida ne’e mak estrada nafatin aat, signifika partidu polítiku ohin-loron la’os reprezenta povu kiik no ki’ak. Maibé, reprezenta ema uituan ne’ebé moris di’ak iha ema barak nia terus leten”. Nia husu