Estudante Ezije FUNATIL Ezonera Reitor UNITAL, Labele Uza Ditadura Iha Autonomu Kampus

SAPNewsTL, Dili : Estudante UNITAL liu husi porta voz Silvestre Freitas lamenta no kontinua ezije Fundasaun Aswa’in Timor Lorosa’e (FUNATIL) hodi ezonera atual Magnifiku Reitor UNITAL Joaquim de Jesus Vaz ne’ebe ho títulu lisensiatura lidera UNITAL.

Relasiona ho komunikadu imprensa neʼebé estudante UNITAL halo iha semana liu ba hodi hato’o lamentasaun sira konaba grau akademiku Magnifico Reitor ne’ebé mai ho nivel lisensiatura (S1), hodi lidera universidade, nune’e estudante sira husu FUNATIL hodi halo dialogu no ezonera reitor UNITAL.

Dialogu refere Estudante UNITAL marka bazeia ba disponibilidade prezidente fundasaun nian ne’ebé monu iha loron sexta dia 02 de agusto 2024, infelismente dialogu refere la konsegue realiza, tamba Presidente Fundasaun rasik la aseita atu dialogu aberta ho estudante sira.

“Ami estudante husu ba prezidente fundasaun rasik atu buka solusaun liu husi dalan dialogu hodi ezonera reitor atual, tamba estudante la konkorda lisensiatura (S1) atu asumi kargu hanesan Magnifiku reitor, maibe dialogu refere kansela”.

Estudante Universidade Oriental Timor Lorosa’e (UNITAL) konsidera prezidente fundasaun rasik la iha ona responsabilidade no seriedade atu rezolve estudante sira nia problema. Pior liu tan presidente fundasaun hasai fali despaixu ho nia kartakter zero toleransia ba asaun (Komunikadu Imprensa, Dialogu no demostrasaun).

Silvestre Freitas husu korpu fundasaun hodi hasai reitor UNITAL, nomeia reitor foun ne’ebe ho grau doutoramentu ne’ebe bele influensia iha nivel nasionál no internasionál.

“Husu ba korpu fundasaun tenke hasai ona Reitor atual,  korpu fundasaun tenke nomeia ona Reitor foun ho nia titulu akademiku Doutoramentu bo nia figura ne’ebe influensia iha nivel nasional no internasional”.

Porta voz ne’e mos husu atu hili reitor ne’ebe independente, neutru no labele iha relasaun família ho korpu fundasaun UNITAL nian no labele tan hatun despaixu ho karater ditadura iha kampus UNITAL.

“Husu ba korpu fundasaun atu nomeia Reitor ne’ebe mak independente no labele iha relasaun familia ho Korpu fundasaun, inklui ba futuru labele halo tan despaixu ho karakter ditadura iha autonomu kampuz”. Silvestre Freitas husu

Senadu Geral Estudantil UNITAL Guilherme da Silva sita liu hosi nia karta sirkular ho númeru referénsia 01/SGE/UNITAL/2024 alerta ba estrutura fakuldade no xefe departamentu sira no dosente sira katak seidauk iha solusaun ba preokupasaun ne’ebe estudante sira hato’o maka sira sei blokeia total atividade akadémiku no la autoriza atu realiza judisium no graduasaun hahú husi segunda feira(05 fulan Agustu 2024) to’o hetan solusaun.

“Senadu Geral Estudantil UNITAL informa ba Dekanu sira, Xefe Departamentu sira, Dosente sira katak seidauk iha solusaun ba ezijénsia ne’ebe iha, maka estudante hotu sei blokeia total atividade akadémiku, la autoriza realiza judisium no graduasaun hahú husi segunda-feira (05/08/024)”. Senadu Geral Estudantil UNITAL Guilherme da Silva sita liu hosi nia karta sirkular ho númeru referénsia 01/SGE/UNITAL/2024. Dili, 03/08/2024.

Tuir planu, ohin (loron,06/08/2024), estrutura reitoria, korpu fundasaun no estudante sira sei halo diálogu hodi solusiona polémika ne’ebe akontese iha UNITAL.

Jornalista : Marciana da Conceição & Eleonora Fátima  dos Santos