F-FDTL Gradua Soldadu Foun Nain-600
Imajen: Membru Foun F-FDTL Nain-600 iha Fatin graduasaun Sentru Instrusaun Komandante Nicolau Lobato Metinaro, Dili tersa 7/02/2023
SAPNewsTL, Dili: Falintil-Forsa Defeza Timor-Leste (F-FDTL) gradua soldadu foun nain-600 ne’ebe hala’o treinu durante fulan neen iha Sentru Instrusaun Komandante Nicolau Lobato (CICNL sigla portuges).
“Ohin ne’e signifikante tebes ba F-FDTL tanba iha tinan 2020 ita aprova konseitu estratéjiku misaun ba forsa armada ho sistema forsa, tan ne’e mak ita presiza dalan ba ema hodi treinu no ekipamentu ne’e ohin gradua militar foun nain-600 ho tinan kotuk nain-600 hamutuk 1200 militar”, dehan Ministru Defeza Filomeno de Paixão ba jornalista sira iha Sentru Instrusaun Komandante Nicolau Lobato Metinaro, Dili tersa (7/02/2023).
Ministru hatutan, tinan oin presiza rekrutmentu kuaze Nain-100 maibe ba espesializadu deit ne’ebe presija ema baixarelatu no lisensiatura para mai forma ofisial tekniku iha F-FDTL ho konseitu estratéjiku foun ne’e muda buat barak ona, uluk komponente formasaun no treinu agora muda sentru instrusaun no sei alarga ba fatin seluk para treinu arma pezada, portantu, husi 2020 to’o mai agora simu militar foun hamutuk nain-1200 ne’ebe ba tuir fali mai entrega ba governu foun mai, sira iha ona konseitu estratéjiku liuliu ba lei programasaun militar rai ba governu foun atu kontinua tanba hetan ona aprovasaun husi Parlamentu Nasional.
Iha fatin hanesan xefe estadu maior jeneral tenente Domingos Raul “Falur Rate Laek” haktuir tinan oin sei jestor sira nune’e bele garantia jestaun sai diak liu tan
“Kolokasaun ba ami nia membru foun nain-600 ohin ne’e, ami sei fahe ba komponente sira iha F-FDTL tuir konsellu ministru dekreta ona, tinan oin ami sei rekruta tan jestor sira para mai halo jestaun ba justisa, saude, enjenharia, aprovizionamentu, finansa, lojistika nian karik tanba agora komandu, ezekutor ho planeamentu iha ona”, tenik Falur Rate Laek
Jeneral hatutan, kolokasaun membru foun ba komponente aero sira halo tekniku ida hodi hili membru foun sira ne’e atu hola parte iha komponente refere.
Reportajen: Augusto dos Santos