Governu Apoia Boxista Timoroan ! Délio Sei Joga Iha Canadá & Indonésia

Imajem : Délio Mouzinho & Daniel Asis Belo iha Dili, 13/02/2025. Foto : SAPNews

SAPNewsTL, Díli — Boxista Timoroan nain rua (2) Delio Mouzinho ho Daniel de Assis Belo hato’o direita rezultadu kompetisaun, hafoin konkista vitoria liu husi atividade desportu Boxing kontra Boxista estranjeiru nain iha Holywings Sport Show, Bali Indonesia.

Coach Elizario Dias Monteiro hateten antes lori boxista Delio A. Mouzinho no Daniel Belo ba kompete iha Indonézia Bali sira halo ona despedida ba Primeiru Ministru (PM), no hafoin konkista vitória boxista hamutuk ho ekipa ba hasoru PM hodi fó rezultadu.

“Antes ne’e ita nia boxista nain rua hetan apoiu orsamentu 3.400 hosi Sua Exelénsia Primeiru Ministru Kayrala Xanana Gusmão hodi ba kompete iha Bali, Iha inisiu ami halo despedida, ohin ami fila mai aproveita oportunidade hakarak hasoru Avo Nana direita hodi fó rezultadu ne’ebe maka foin lalais ita nia boxista nain rua hatudu iha Indonézia Bali”. Dehan Coach Elizari Dias Monteiro ba jornalista sira hafoin hasoru PM iha Palasiu Governu, (14/02/2025).

Coach boxista ne’e mos hateten, hafoin sira hasoru Primeiru Ministru nia sente kontente no orgullu ba rezultadu ne’ebe boxista nain rua hatudu. Xefe governu ne’e sei kontinua apoiu no husu ba boxista nain rua hodi hatudu disiplina no treinu didiak hodi kontinua talentu ne’ebe sira iha.

“Hafoin ami hasoru Primeiru Ministru nia sente kontente no orgullu ho rezultadu ida ne’e, nia sei apoiu nafatin hodi dehan “imi maka lori Timor ba mundu”, avo mos husu atu nafatin hatudu disiplina no treinu didiak hodi kontinua nafatin talentu ne’ebe maka imi iha”. Nia esklarese.

Iha oportunidade ida ne’e hakarak hato’o obrigado no agradese wain ba sponsor Timor Telekom (TT) Bee Leste no esponsor sira seluk ne’ebe apoiu ona durante ne’e, lahaluha mos hato’o agradese wain ba Vise Primeiru Ministru Segundu Mariano Assanami Sabino, Primeiru Ministru Kayrala Xanana Gusmão, MJDAK ne’ebe ajuda ona ekipa.

Iha fatin hanesan, boxista Delio A. Mouzinho agradese tebes ba Aman Maromak no matebian ne’ebe fakar ran hodi hetan independénsia no Timoroan sira ne’ebe apoiu liu hosi material no espirituál

“Primeiru ha’u agradese tebes ba aman Maromak no matebian sira ne’ebe fakar ran ba rai ida ne’e hodi ita hetan independénsia no mos Timoroan sira ne’ebe apoiu ha’u hosi material no espirituál”. Delio agradese.

“Ba sponsor sira ne’ebe hanesan ohin hau nia coach temi ona, ba timoroan sira ne’ebe namkari  iha Australia, Corea no iha nasaun sira seluk, agradese tebes ba imi hotu nia apoiu no suporta no ha’u sei kontinua ba buat ne’ebe ha’u esforsu”. Nia hatutan.

Delio Mouzinho deklara vitória ne’ebe nia konkista sai hanesan prezente ne’ebe nia oferese ba Timoroan hotu-hotu liu-liu ba nia treinador sai hanesan prezente ida bainhira nia halo tinan iha loron 04 fulan fevereiru, maske nia maka selebra aniversáriu maibe nia rasik oferese prezente liu hosi nia vitória iha jogu boxing nian.

“Iha momentu ne’ebá, ha’u hatete ona katak ha’u sei fó prezente ba Timoroan hotu ho ha’u nia vitória, bainhira ha’u selebra aniversáriu iha loron 04 fulan fevereiru, ha’u nia coach dehan ba ha’u “buat hotu ha’u sei la fó ba ó” no baibain ema halo tinan kolega sira maka fo prezente maibe ha’u maka fó prezente ba nia liu hosi ha’u nia vitoria iha boxing nian, no ida ne’e sai realidade duni no ha’u nia konkista sai prezente ne’e ba coach no ba Timoroan sira hotu”. Delio konta.

“Ha’u sente kontente tebes tanba luta ne’e laos ha’u mesak, wainhira ha’u hateke ba sorin sorin imi hamutuk ho ha’u, ida ne’e aumenta ha’u nia espiritu patriotizmu no nasionalismu hodi sai forte liu tan”. Nia hatutan.

Boxista ne’e espera katak Timoroan ne’ebe iha patriotizmu no nasionalismu hodi apoiu nafatin nia hodi ba joga iha Canada no Jakarta iha fulan Marsu no Jullu.

“Iha fulan oin, ha’u sei ba joga iha Canada iha loron 01 fulan marsu, ha’u sei sai hosi Timor ba treinu no joga iha Canada no iha fulan jullu sei mai joga fila fali iha Jakarta, espera katak Timoroan ne’ebe iha patriotizmu no nasionalismu sei nafatin apoiu hau”.

“Ita manan ona ema husi nasaun boot no ida ne’e aumenta tan inimigu ne’ebe barak, ita tenke halo preparasaun didiak hodi hasoru inimigu sira ne’ebe mai aumenta hodi hasoru ita”. Nia hakotu.

Fo hanoin fali katak Délio Anzaqeci Mouzinho manan Alisher Ismailove hosi Uzbekistan no Daniel Asis Belo manan Sakti hosi Indonésia iha Bali, 09 Fevereiru 2025.

Jornalista : Marciana da Conceição & Daniel da Silva