Husik Oan Iha To’os Laran ! Hafoin Tinan 37, Bikara Buka Tuir Maitei

SAPNewsTL, Lautem – Konsekuénsia funu ne’ebe la’o naruk durante okupasaun Indonézia, tan kauza husi luta ba ukun rasik an, Saudozu Hokara no Bikara  deside husik oan ne’ebe halo fulan lima ne’e ba to’os ida iha rai Soibada iha tinan 1987.

“NE’E LOSPALOS NIAN,  FAMÍLIA LAIHA, MAIS SE POVU HETAN KARIK, FO BA PADRE NO MADRE SIRA HAKI’AK”.

Maria Joana da Costa ho naran “Bikara” konta iha tinan 1987, funu kontinua manas no inimigu sira kontinua halo perseguisaun ba FALINTIL sira iha ai-laran, nune’e sira deside hodi husik hela oan ba to’os ida iha Soibada to’o loron haat, hafoin katuas ida mak hetan no lori ba entrega iha Padre Mateus Lopes hodi hakiak.

“Iha tinan 1987, situasaun difisil tebes, inimigu serku beibeik ami, entaun labarik foin halo fulan lima, nia tanis hela deit, entaun ami deside hodi husik hela ba iha to’os ida iha Soibada, hein durante loron haat, hafoin ema ida mak mai hetan no lori nia entrega ba padre sira hakiak tanba Maitei nia aman Hokara hakerek liafuan badak ida dehan ‘NE’E LOSPALOS NIAN,  FAMÍLIA LAIHA, MAIS SE POVU HETAN KARIK, FO BA PADRE NO MADRE SIRA HAKI’AK’.” Konta Maria Joana da Costa ho naran “Bikara” ba SAPNews iha Lospalos, 18/08/2024

Bikara hatutan, nia parte hakarak tebes atu haree ninia oan mane dahuluk ne’ebé husik hela iha ai-laran tan kauza husi funu ninia hahalok.

Bikara husu ba ema hotu, karik hatene kona ba nia oan mane ne’e nia paradeiru atu bele fo hatene, nune’e nia bele hatene Maitei nia kondisaun atual.

“Ha’u husu ba ema ruma ne’ebe hatene kona ba Maitei nia paradeiru, atu bele fo informasaun ba família atu bele hatene ninia paradeiru no kondisaun atual”.

Inan feton ne’e mós husu ba nia ona mane Maitei, atu fila fali ba nia inan hahoris, inan rasik sei moris, nune’e hakarak tebes atu bele haree, molok inan husik hela ba mundu seluk.

“Ba ha’u nia oan Maitei, o iha ne’ebe? Karik o sei moris, ha’u hakarak tebes atu haree o nia oin, hakarak tebes atu hatene kondisaun agora, ha’u presiza o fila mai hodi haree ha’u no ha’u haree o, molok destinu haketak ita husi mundu ne’e”.Bikara husu

Enkuantu, Saudozu Adjuntu João da Costa Monteiro ho naran kódigu “Hokara” hamutuk ho Maria Joana da Costa ho naran “Bikara” husik hela ho lipa ida iha Foho Aitara nia hun ne’ebe foin halo fulan lima iha tinan 1987, hafoin ukun an família buka maibé to’o agora seidauk hetan.

Iha komunikadu imprensa, Porta Voz, Xefe Aldeia Raul da Costa haktuir, Família Saudojo adjuntu João da Costa Monteiro ho naran kódigu “Hokara” hamutuk ho Maria Joana da Costa ho naran Bikara, nu’udar adjuntu ho ninia fen realiza komunikadu imprensa hodi haktuir katak :

1. Ami nia oan mane Maitei ho idade fulan 5 ne’ebé sira tau iha lipa ida no tara iha uma oan ida iha to’os laran iha foho Ai-Tara ninia hun,  iha tinan 1987. Razaun Adjunto Hokara no nia fen Bikara deside hodi husik ninia oan Mane Maitei iha uma ida to’os  laran ne’e tanba tauk labarik tanis, inimigu bele deskobre no bele oho hotu sira, sira deside hodi husik iha to’os laran atu to’os nain ka komunidade sira bele hetan hodi salva Maitei ninia Moris no sira bele kontinua hodi luta ba ukun rasik an.

2. Desizaun ne’e la’os sira deit mak foti maibe hamutuk funu na’in sira seluk hanesan Saudozu Nino Konis Santana, Saudozu Chaikeri ho ninia soldadu sira mak deside hamutuk iha momentu ne’ebá, sira ne’ebe mak ba husik  Maitei iha to’os laran mak Maitei nia aman Saudozu adjuntu Hokara, nia inan Bikara, Saudozu Konis no Saudozu Caikeri.

3. Molok sira husik Maitei iha to’os laran, Maitei ninia Aman adjunto Hokara  hakerek billete oan ida no tau hamutuk ho bebé (Maitei) iha lipa laran depois tara iha uma oan ida. Iha billete ne’e hakerek katak “NE’E LOSPALOS NIAN,  FAMILIA LAIHA, MAIS SE POVU HETAN KARIK, FO BA PADRE NO MADRE SIRA HAKI’AK”.

4. Hafoin husik tiha Maitei iha to’os laran, sira subar besik iha área foho Ai-Tara nia hun. Liu tiha loron 4 Hokara ho ninia kolega sira tahan estudante sira husi Natarbora ne’ebé ba eskola iha Soibada hodi husu informasaun kona-ba Maitei maibe estudante sira dehan to’os nain entrega ona ba Padre. Sira mós tahan katuas ida ne’ebe atu ba to’os hodi husu kona-ba Maitei maibe katuas ne’e mós relata katak labarik ne’e to’os nain entrega ona ba Padre sira.

5. Tempu la’o no funu kontinua manas, iha fulan Maiu tinan 1988, adjuntu Hokara mate iha Maubae-Balae nia klaran, wainhira hasoru embuskada no hetan tiru hosi inimigu sira. Momentu ne’ebá nia sai  adjuntu ba kompañia husi Lere Anan Timur nian, Bikara (Maria Joana da Costa) ho ninia kolega sira kontinua halo funu to’o tinan 1992, Bikara deside tun mai villa iha Viqueque.

6. Hafoin loron Konsulta Popular iha tinan 1999, bainhira UNTAET hahú ninia misaun iha Timor mak Maitei ninia Inan Bikara la’o husi Manatutu vila to’o Soibada hodi buka tuir ninia oan Maitei. Tuir informasaun ne’ebe Bikara hetan husi komunidade sira inklui Padre Mateus Lopes ninia subrinu ida relata katak Padre Mateus Lopes mak hakiak  Maitei hamutuk labarik na’in 4 sira seluk.

Bikara mós simu informasaun katak kuandu katuas to’os nain hetan Maitei relata kedas ba Xefe Aldeia no Xefe Suku. Katuas ne’e hakarak hakiak maibe tanba Mateus hetan billete ne’ebe hakerek, “Ne’e Lospalos nian, familia laiha, mais se povu hetan karik, fo ba Padre no Madre sira haki’ak”. Nune’e nia entrega kedas ba Padre Mateus Lopes hodi haki’ak.

Iha komunikadu imprensa ne’e, familia Maitei hamutuk ho ninia inan Bikara iha Lautém husu ba governu, CVTL, Padre, Madre no Timor oan sira ne’ebe hatene  kona ba Maitei atu bele fo hatene no fasilita hodi familia bele hetan hikas nia oan ne’ebé husik hela iha tinan 1987.

1. “Husu ba Governu Timor-Leste atu bele buka tuir ami oan mane ne’ebe daudaun sei moris hela, atu ami bele hatene no Maitei bele hatene ninia inan Bikara ne’ebe sei moris hela maibe otas daudau ona, maske nia aman Hokara iha ona mundu seluk. inklui buka tuir Timoroan hotu liliu funu na’in sira nia oan ne’ebe ema hakiak no moris hela atu bele fila fali mai ninia rain no hatene sira nia família”.

2. “Husu ba Cruz Vermelha Timor-Leste (CVTL) atu bele foti responsabilidade hodi buka tuir no rekolla informasaun kona ba Maitei ne’ebé agora daudaun karik sei moris hela tanba funu ninia kauza ami husik hela ba ema nia liman hodi hakiak”.

3. “Husu ba Padres, Madres, autoridade lokal no familia sira iha Soibada mak hatene historia Maitei nian ka ema ruma hakiak nia karik ajuda informa hela ba ami, liuliu ba ninia inan Bikara ne’ebé halo esforsu oin-oin hodi bele hatene ninia oan ninia paradeiru no kondisaun”.

4. “Iha ámbitu loron komemorasaun Loron FALINTIL 20 Agustu no Loron Konsulta Popular, ami hato’o Parabens ba povu Timor-Leste ne’ebe selebra loron bo’ot ne’e, hamutuk ita hari’i paz no estabilidade, kontribui ba dezenvolvimentu nasional ida inkluziva, sustetavel, no ema hotu bele hola parte iha dezenvolvimentu no goza moris diak ka bem estar komun, laiha tan ona diskriminasaun, violénsia, opresaun, explorasaun ema ba ema no injustisa soaial.

5. “Tinan 25 konsulta popular, no hein vizita Sua Santidade Papa Francisco mai Timor-Leste, ami hotu hein ho laran ksolok no orasaun, esperansa katak festa boot rua ne’e bele sai susesu boot hodi hatudu katak ita nia fiar sai ita nia kultura, kultura ida hadomi malu, rona malu, tulun malu, tane malu, dignifika malu, no foti sa’e rai Timor-Leste nia naran bele morin iha mundu rai-klaran.”

Hafoin notísia ne’e publika, iha ona informasaun pozitiva balun katak oan mane ida ne’ebe inan aman husik hela iha tinan 1987 ne’e sei moris hela, daudaun ne’e iha hela Indonézia

Jornalista : Equipa Kobertura