Impata Ho Portugal ! Angola Lidera Tabela Klasifikasaun Provizóriu
Imajem : Jogador Portugal no Ángola iha Estádiu Munisipal Dili, 22/07/2025
SAP News TL, Díli : Iha jogu CPLP 2025, Portugal impata hasoru nia adversáriu Angola ho eskor 0-0. Nune’e nasaun rua fahe pontu 2 hodi aumenta ba 4.
Bainhira kick off jogador Portugal soe kedas bola ba area penalidade Angola maibe la konsege fo ameansa ba Baliza tanba defesa hosi Angola tebe sai hosi area penalidade.
Tuir mai, jogador sira husi ekipa rua halo presaun no atake ba malu hodi halo jogu tuir ida-idak nia estratejia.
Iha minutu 6, ekipa Angola hetan oportunidade liu husi suta bola kantu maibe jogador Angola Paulo Luvumbo numeru kamizola 9 uza ulun bola besik deit rede baliza Portugal nian.
Iha minutu 12, jogador Portugal Goncalo Guerrero ho numeru 9 hetan bola iha area penalidade hodi suta ba baliza Angola liu husi aistensia jogador Alberto Bock ho numeru 18 maibe bola ultrapassa rede baliza Angola nian.
Iha minutu 27, jogador Andre Duarte numeru 11 husi Portugal hetan oportunidade suta bola iha area penalidade laran ba rede Angola maibe baliza Angola konsege baku sai bola.
Iha minutu 34, jogador Angola Paulo Luvumbo numeru 9 suta bola ba baliza Portugal iha area penalidade laran maibe baliza Portugal konsege kaer metin bola no asegura nia rede.
Jogu iha parte dahuluk, ekipa Portugal ho Angola halo presaun no kontra atake makas ba malu hodi anima tebes adeptu Timoroan sira iha Estadium Munisipal Dili maibe jogador ida husi ekipa rua la marka golu hodi muda skore entaun skore mantein 0-0 to’o minutu 40+5 remata.
Tama jogu parte daruak, ekipa rua hatudu nafatin jogu furak liu hosi pasa bola ain ba ain, kontra atake makaas hodi anima adeptu sira iha Estadium Munisipal Dili.
Tama ba minutu 75, jogador Angola Edilasio Domingos suta bola ba baliza Portugal maibe baliza Portugal baku bola sai hosi rede. Tama ba minutu 79, Jogador Angola Aimar Ferrão suta hetan oportunidade suta ba baliza Portugal maibe bola ultrapassa dook husi rede baliza Portugal.
Jogu 80 remata jogador husi ekipa rua la marka golu maski sira halo jogu presaun no atake makas ba malu entaun skore mantein 0-0.
Entretantu, jogu Portugal kontra Angola treinador Portugal troka jogador nain haat no Angola halo substituisaun ba jogador nain rua.
Rezultadu ne’e hatudu Portugal no Angola fahe pontu ida-ida ba malu hodi aumenta ba valor 4 husi kada nasaun iha jogu CPLP.
Lembra fali katak, antes ne’e Portugal halakon Timor-Leste ho eskor 1-0, Angola halakon Cabo Verde ho eskor 2-0, Cabo Verde halakon Timor-Leste ho eskore 4-0.
Nune’e, provizóriu Portugal iha pontu haat ho golu 1, Angola iha pontu haat ho golu 2, Cabo Verde iha pontu 3 ho golu 5 no Timor-Leste ho pontu mamuk no golu mamuk.
Tuir ajenda, Timor-Leste sei hasoru Ángola no Portugal sei hasoru Cabo Verde iha loron 24 Jullu 2025 iha Estádiu Munisipal Dili.
