Ipolito Sai Prezidente LFTL ! MJDAC-FFTL Prontu Apoiu Realiza Liga Futebol
Imajem : Estrutura LFTL Periodu 2025-2029 iha Xanana Sport Center Bairro Formosa, Dili sabadu (1/03/2025).
SAPNewsTL, Dili : Ipolito Soares eleitu sai prezidente LFTL, hafoin manan iha kongresu orgaun Liga Futebol Timor-Leste (LFTL) ba daruak, Ministeriu Juventude Desportu Arte Kultura (sigla portuges MJDAC) no Federasaun Futebol Timor-Leste (FFTL) iha komitmentu apoiu estrutura foun hodi realiza liga futebol iha Timor-Leste.
“Ohin ami manan, ida ne’e manan ba futebol Timor-Leste, nune’e ha’u husu ba governu ho FFTL atu nafatin apoiu ba sustentabilidade futebol”, dehan Prezidente eleitu Ipolito Soares ba jornalista sira liu husi diskursu iha Xanana Sport Center Bairro Formosa, Dili sabadu (1/03/2025).
Prezidente eleitu ne’e salienta, sira sei esforsu mos buka patrosinador husi rai liur maibe husu governu kria kondisaun diak ba infrastrutura para sira mai ajuda lori futebol Timor-Leste ba oin.
Ipolito informa tan, nia mos fiar katak sei serbisu hamutuk ho Prezidente FFTL NIlton Gusmão tanba iha paixaun boot ba futebol lori futebol husi LFA to’o mai agora hodi bele dezenvolve futebol ba jerasaun tuir mai.
Iha fatin hanesan, Prezidente FFTL NIlton Gusmão hatete, nu’udar prezidente FFTL sei apoiu total ba orgaun LFTL para liga futebol bele la’o fali iha Timor-Leste.
“Nu’udar prezidente, ha’u sei apoiu total ba orgaun LFTL, esforsu hotu ami sei buka atu liga bele la’o fali tanba apoiu husi governu deit orgaun liga labele halo buat barak”, tenik Nilton
Nilton hatutan, prezidente eleitu hodi hahú organiza iha tempu badak atu nune’e liga la’o tarde liu iha fulan Maiu.
MJDAK Nelyo Isaac Sarmento afirma governu sei apoiu 100% tanba governu la husik LFTL mesak.
“Governu sei apoiu 100% ba liga futebol Timor-Leste tanba governu la husik ita nia orgaun LFTL mesak, governu sempre iha orgaun LFTL nia Sorin”, Nelyo hateten
Nelyo afirma tan, governu sei koalia ho orgaun LFTL ba teknikamente, finansiamentu no fasilidade hotu para prepara planu ba oin, depois Prezidente LFTL eleitu sira sei enkontru hamutuk ho FFTL para koalia liga hahu bainhira.
Entretantu, Ipolito Soares sai prezidente FFTL 2025-2025 hafoin liu husi votasaun hetan votu 19, enkuantu nia adversariu Abrão Oliveira hetan deit votu 16 husi total votante nain-35 husi membru onorariu nain lima, fundador nain 7 no klube 23.
Nune’e rezultadu husi votasaun ne’e prezidente LFTL mak Ipolito Soares no nia vise-prezidente mak Osorio Florindo da Conceição. Kongresu ne’e realiza tanba hetan apoiu finanseiru husi FFTL apoiu orsamentu 3,500 USD no governu liu husi MJDAC apoiu 3,500 USD.
Reportajen: Augusto Dos Santos
