Issue Demite Gastão, HAK-AJAR : La Merese Hasai Ajente Defende Estadu Kombate Krime

Imajen Komunikadu Imprensa HAK-AJAR kona-ba Issue Demisaun Ajente Xefe Gastao Piedade, Foto : Antonio Tilman

SAPNewsTL, Dili : Relasiona ho issue ne’ebe viral iha sosial media katak Membru Governu balun ne’ebe hato’o  sira nia mensagen no karta ba Komandu PNTL hodi halo demisaun ba Sr. Gastaun Piedade husi servisu nasionál intejénsia nu’udar Ajente Xefe, liu husi Komunikadu Imprensa Assosisaun HAK  no AJAR konsidera Gastaun Piedade hala’o knaar nu’udar Ajente Estado ne’ebe kombate krime, la merese atu hasai nia husi nia kargu.

Tuir HAK no AJAR katak Timor-Leste nu’udar Estadu Direitu Demokratiku ne‘ebe haktuir ba vontade popular, estadu bazeia ba lei, Sosiedade Sivil lamenta ho aktu Impedimentu no karta ba Komandu PNTL hodi demite Gastão Piedade husi nia kargu atual

“Ami husi organizasaun  Sosiedade Sivil, AJAR no estudante Ativista Direitus Umanus AJAR, ami lamenta ho asaun Vise MI no Vise Ministru Justisa ne’ebe Haruka mensagen no Karta ba Komandu PNTL atu demite Gastaun husi husi nia kargu”. Dehan Porta Voz Gaspar Tali-Besi ba Jornalista iha Salaun Assosisaun HAK, Quarta-Feira ( 12/ 10/ 22).

Sosiedade Sivil husu Prezidente da Repúblika nu’udar Komandante Supremu das Forças Armadas atu alerta ba membru Govesnu liliu ba Vise Ministru Interior no Komandu Jeral PNTL atu labele demite Sr. Gastão ne’ebe hatudu nia Lealidade no fieldade ba estadu.

Porta Voz ne’e mos husu ba Primeiru Ministru Taur Matan Ruak atu demite membru guvernu nain rua hanesan Vise Ministru Justisa no Vise Ministru Interior tanba la halo funsaun hodi asegura estadu nia interese

“Husu  PM atu imiditamente halo demisaun  ba Membru governu nain  rua ne‘ebe mak halo intervensaun hanesan Dr. Edmundu Caitano atual Vice Ministru  Justisa no Dr. Antonio Armindo atual Vice Ministru Interior tanba la halo funsaun ba asegura ita nia estadu nia  interese liliu kombate krime organizadu Sira”. Sublina nia

Entretantu, Diretor AJAR Inosensio Xaver husu ema hotu liliu Autoriedade Kompetente sira atu asegura estabilidade governativa no seguransa iha Timor Leste

“Asegura estabilidade governativa inklui estado nia seguransa liliu atu hadook estado ida ne’e husi krime organizadu sira,  ajente hotu ne’ebe servisu iha instituisaun públiku sira tenki hakruk ba lei no normas sira ne’ebe iha”. Tenik Inosensio

Entretantu, molok notísia ne’e tun Jornalista SAPNewsTL tenta atu halo komfirmasaun membru guvernu na’in rua hodi halo balansu, maibe infelizmenta la konsege hetan resposta husi parte refere

Enkuantu, Kazu osan $ 130.000.00 ne’ebe Polisia Ciéntifica Investigasaun Criminal (PCIC) prende iha Aeroportu Internasionál Nicolau Lobato, parte polísia entrega ona ba Ministériu Públiku hodi prosesa tuir lei ne’ebe estadu ne’e adopta

Jornalista  : Antonio Tilman & Marcela Mery da Costa

Editor        : Ekipa Editorial