Jogador Nain-10, Emmanuel FC Manan Karketu Ho Skore 1-0

SAPNewsTL, Dili: Emmanuel FC ho jogador nain sanulu manan Karketu Dili FC ho skore 1-0 iha jornada daruak divizaun dahuluk Liga Timorense epoka 2023  tanba jogador ida husi klube ne’e hetan kartaun mean iha jogu parte daruak nian.

Iha jogu parte dahuluk ekipa rua tun ho jogador intimu hodi halo kontra atake hodi halo ameansa ba malu atu marka golu maibe la konsege to’o minutu 45 remata skore impata 0-0.

Tama ba jogu parte daruak ekipa rua muda estratejia jogu hodi halo nafatin presaun ba malu hodi anima tebes tanba Karketu Dili FC reforsa husi jogador estrela Timor-Leste Paulo Gally Freitas ne’ebe to’o minutu 67 jogador Alexadre Moreira hetan kartaun mean hodi sai husi jogu refere, ho jogador nain sanulu Emmanuel FC konsege marka golu ida husi jogador Edit Savio iha minutu 73 hodu hatuur kedas skore ba 1-0.

Skore 1-0 ho jogador nain sanulu deit halo jogador Karketu Dili FC aumenta tan ritmu jogu hodi halo atake makaas ba Emmanuel FC maibe jogador ekipa refere la fo oportunidade ba jogador adversariu marka golu ne’ebe to’o minutu 90 remata skore nafatin 1-0 hodi rezulta Emmanuel FC hetan pontu tolu iha jogu refere.

Depois jogu remata sekretariu jeral Elizeu Isaac hatete, sira simu derrota maibe sira lamenta oituan ho arbitrajen sira dirije jogu ne’e

“Teknikamente jogu treinador halo hotu ona maibe tenki derrota ba dala rua ne’ebe ami simu maibe lamenta oituan ba arbitrajen sira dirije jogu ne’e iha desizaun balun la fo balansu laos arbitrajen sira todan ba ekipa ida maibe sira estraga tiha jogu ne’e tanba desizaun ba ekipa rua la hanesan no ami fo parabens ba Emmanuel FC”, tenik Elizeu

Elizeu akresenta, derota ne’e sira simu ho  fuan boot no sira sei hadia ba jogu neen tuir mai bele hetan rezultadu diak no ohin iha jogu sira faila iha lina klaran nian ne’ebe ohin treinador haree ona sei halo evaluasaun ba ida ne’e no jogu tuir sira garante tenki manan maibe rezultadu mak sei hatudu.

Iha fatin hanesan treinador Emmanuel FC Emiliano da Silva dehan, sira ohin lakon jogador prinsipal ida maibe jogador ida marka golu hodi halo sira hetan vitoria.

“Ohin ami lakon jogador prinsipal ida tanba hetan kartaun mean maibe hau nia jogador ida konsege marka golu hodi halo ami hetan vitoria hasoru Karketu Dili FC no joga tuir mai hasoru ekipa zigante AD SLB Laulara lakon jogador prinsipal ida tenki halo servisu boot ida”, tenik Emiliano

Entretantu iha jogu Emmanuel FC kontra Karketu Dili FC ne’ebe jogu ho ritmu sae halo jogador Karketu Dili FC nain tolu hetan kartaun kinur no jogador Emmanuel FC hetan kartaun kinur rua hodi sai mean, Karketu Dili FC halo substituisaun ba jogador nain haat no Emmanuel FC troka jogador rua

Jornalista : Augusto dos Santos