KEUPAL Realiza Semináriu, Joven Ajente Transformador
SAPNewsTL,Dili: Joven Konsellu Estudante Universitariu Postu Administrativu Lequidoe Minisipiu Aileu (KEUPAL) hala’o seminariu ho tema Foinsa’e Milenial Sai Ajente Transformador ba Sosiedade, Orador Dr. Avelino Maria Coelho da Silva hateten joven mak ajente transformador ba sosiedade no joven agora tenta atu entende iha segmentu tolu
“Ohin ha’u mai ko’alia oituan ho alin sira konsellu Estudante Universitariu Postu Administrativu Lekidoe ko’alia kona-ba kontekstu balun dehan joven mak futuru ba nasaun maibé ha’u nia opiniaun joven mak ajente transformador ba sosiedade tenke pasivu labele ativu rumoris; Joven lubun ida la buka buat seluk maibé buka kuñesimentu, tenta entende ba iha segmentu tolu hanesan; joven ne’ebe lakoi interese buat ida, ladún preokupa ho kuñesimentu no joven balun preokupa ho kuñesimentu”. Dehan Oradór Avelino Maria Coelho da Silva ba Jornalista sira iha Xanana Reading Room, Kinta-Feira, 18/08/2022.
Iha fatin hanesan reprezentante kordenador KEUPAL Esmerildo da Silva haktuir sira halo semináriu ne’e atu joven sira bele tuir hodi sai ajente transformador ba sosiedade iha futuru.
“KEUPAL hanesan Konsellu Estudante Universitariu Postu Administrativu Lequidoe, Munisipiu Aileu nian ne’ebé iha inisiativa hodi realiza seminariu ba joven hotu-hotu hodi nune’e iha futuru oin mai joven bele sai ajente transformador ba sosiedade”. Tenik nia
Esmerildo hatutan realiza semináriu ne’e atu hasa’e joven no estudante sira nia kuñesimentu atu joven sira bele transmite informasaun ba sosiedade.
“Seminariu ne’ebé mak ami hala’o ne’e atu eleva kuñesimentu estudante sira nian tanba ne’e mak iha seminariu ne’e ami husu orador Dr. Avelino Coelho atu esplika oinsa nia modelu ba futuru nian, oinsa ita joven transmite informasaun ba sosiedade no fahe nia esperiensia kona-ba tema ba semináriu refere”. Nia subliña
Entretantu, semináriu ne’e la’os partisipa de’it husi joven Lequidoe maibé hetan mos partisipasaun husi joven hotu-hotu hamutuk ema nain 127.
Jornalista: Marcela Merry da Silva
Editor: Ekipa Editorial