KO Ba Dezlutu Saudozu Max Stahl no Sebastião Gomes Audiénsia Ho SEJD

SAPNewsTL,Dili: Komisaun Organizadora (KO) ba Dezlutu Saudosu Max Stahl no Komemorasaun 28 Outobru Falesimentu Saudozu Sebastião Gomes ba dala 31 halo audénsia ho Sua Exelênsia Sekretariu Estadu Juventude no Desportu (SEJD) Abrão Saldanha, informa no aprezenta preparasaun komisaun oganizadora nia servisu.

Tuir Prezidente Komisaun Rogeiro Castro da Cruz hateten sira halo audensia ho Sekretáriu Estadu atu governo apoiu hodi bele realiza eventu ne’e.

 “Sekretariu Estadu Juventude no Desportu iha planu tinan ida ne’e atu halo Dezlutu Saudozu Max Stahl no  Saudozu Sebastião Gomes ne’ebé mak halo tinan ba dala 28 fulan Outubru, entaun komisaun hakbesik ba governu, husu sira nia apoiu atu bele realiza eventu Max Stahl nian no atu fo bensaun ba rate ne’ebé mak oras ne’e governu sei halo hela ne’ebe Atinji ona iha 95% besik to’o 97% i ha’u fiar katak bele remata ho di’ak”. Dehan Prezidente Komisaun Rogeiro Castro da Cruz ba jornalista sira iha SEJD, Kuarta-Feira, 17/08/2022.

Prezidente Komisaun ne’e hatutan sira hasoru malu ho Sekretráriu Estadu sita mos hodi tau kalendáriu ne’ebé fiksu atu kada tinan komemora saudozu nain rua iha loron ne’ebé hanesan.

“Aproveita tempu atu dehan, dezlutu saudozu Max Sthal iha tinan ida ne’e data hanesan ho falesimentu saudozu Sebastiâo Gomes 28 fulan Outubru entaun ami hasoru sua ekselensia atu tau kalendariu ne’ebé fixu no kada tinan tenke komemora hotu saudozu nain rua ne’e”. Tenik nia

Iha fatin hanesan Direktor Nasional Assosiativismu Juventude Jacinto Antonio Ximenes fundamenta sira sei hamutuk ho komisaun hodi prepara no buka rekursu hodi hala’o aktividade bo’ot rua ne’e.

 “Iha tinan ida ne’e modifika oituan kona-ba serimonia bo’ot ida ne’e sei realiza  no husi parte SEJD hakarak atu envolve komisaun hodi bele prepara no ami sei hamutuk ho komisaun  buka rekursu oinsa atu realiza aktividade ida ne’e no osan montante seida’uk hatene maibé aseita malu hodi tur hamutuk mobiliza rekursu hotu-hotu, ba saudozu Max Sthal  nia atividade la’os haree ba Ministeiru ida, no sei husu apoiu husi adisional ba preparasaun ida ne’e”. Nia salienta

Jornalista: Juvita Sarmento & Antonio Tilman

Editor: Ekipa Editorial