Evita Aumenta Despeza Orsamental, Governu Suspende Rekrutamentu Funsionáriu Públiku
Imajem : Primeiru Ministru Kay Rala Xanana Gusmão ba jornalista sira iha Palásiu Prezidensiál, Bairru Pite, Dili, 06/08/2026.
SAPNewsTL, Dili – Primeiru Ministru (PM) Kay Rala Xanana Gusmão informa katak Governu deside suspende rekrutamentu ba funsionáriu públiku foun iha tinan 2027. Informasaun ne’e hato’o ba Prezidente Repúblika (PR) José Ramos-Horta durante sorumutu semanal iha Palásiu Prezidensiál, Bairru Pite, Dili.
“Ohin, ha’u mai hodi informa ba Prezidente katak Governu hasai rezolusaun ida atu iha tinan 2027 laiha tan rekrutamentu foun ba funsionáriu sira.” dehan PM Kay Rala Xanana Gusmão ba jornalista sira iha Palásiu Prezidensiál, Bairru Pite, Dili, 06/08/2026.
PM esplika, Governu foti medida ne’e tanba presiza uluk hare’e no hadia problema relasiona ho dívida funsionáriu sira molok kontinua ho prosesu rekrutamentu foun.
“Ami foti desizaun ida ne’e tanba iha dívida barak ne’ebé relasiona ho funsionáriu sira ne’ebé Governu presiza resolve uluk, depois mak hare’e fila-fali kona-ba rekrutamentu.” Hatutan PM.
Konsellu Ministrus aprova proposta Rezolusaun Governu, ne’e bazeia ba aprezentasaun hosi Prezidente Komisaun Funsaun Públika, Agostinho Letêncio de Deus hodi suspende rekrutamentu ba funsionáriu públiku no ajente administrasaun públika.
Intensaun husi proposta Rezolusaun Governu ida-ne’e atu limita kreximentu kontínuu husi administrasaun públika, ne’ebé hala’o la hó prosesu selesaun ne’ebé rigorozu no bazeia ba nesesidade reál, ne’ebé kauza aumentu ida ne’ebé boot iha despeza orsamentál.
Rezolusaun Governu ne’ebé propoin ne’e atu salvaguarda exesaun sira ne’ebé relasiona ho kontratasaun ba Gabinete Ministeriál sira, prosesu selesaun bazeia ba méritu ba kargu diresaun no xefia nian, no mós karreira ka grupu profisionál sira ho vaga no orsamentu ne’ebé aprova ona iha tinan kotuk, nune’e mós karreira dosente universitáriu no profisionál saúde nian, ne’ebé justifika ho falta pesoál.
