Estudante UNITAL Jainito Aproveita Tempu Livre Fa’an Sigaru, Sustenta Nia Estudu & Hamenuz Dependénsia Ba Família
Imajem : Estudante Universidade Oriental Timor-Lorosa’e (UNITAL), Jainito de Almeida no Diretora Fakuldade Siénsia Sosiais no Polítika (CISPOL), Ana Maria do Rosário. Foto : SAPNews
SAPNewsTL, Dili – Loron-loron, molok tuir aula iha Universidade Oriental Timor-Lorosa’e (UNITAL), Jainito de Almeida lori sigaru ba fa’an iha kampus no fatin balu iha Dili. Negósiu ki’ik ne’e sai dalan ida atu hetan osan, fasilita nia estudu no hamenus todan ba nia família.
Jainito de Almeida hateten, nia hahú fa’an sigaru desde tinan 2024, inisiativa ne’e mosu tanba ekonomia família mihis, nune’e liu hosi negosiu bele sustenta nesesidade loroloron no selu gastu relasiona ho estudu.
”Ha’u hahú fa’an sigaru iha tinan 2024. Osan husi negósiu ne’e ha’u uza atu sustenta ha’u-nia nesesidade bázika no kontinua ha’u nia estudu” dehan Jainito de Almeida ba Jornalista SAPNews iha UNITAL, Tersa-feira 21/07/2026.
Maski hanesan negosiante, Jainito la husik responsabilidade nu’udar estudante. Nia esplika, bainhira iha aula, nia fó prioridade ba prosesu aprendizajen, no aproveita de’it tempu livre hodi kontinua fa’an.
”Ha’u fahe tempu entre aula no negósiu. Bainhira la iha aula, ha’u kontinua fa’an sigaru atu bele hetan rendimentu hodi selu mikrolete, print, fotokópia no hamenus mos todan ba ha’u nia família.” hatutan nia.
Jainito argumenta, lukru husi negósiu ne’e la boot, maibé nafatin ajuda nia hodi fasilita estudu. Kada loron nia bele hetan rendimentu entre US$5 to’o US$20, depende ba númeru konsumidór ne’ebé sosa.
Maski nune’e, dalan atu buka moris la sempre fasil. Jainito admite katak durante fa’an sigaru nia dala ruma hasoru ema ne’ebé la sosa nia produtu no mós hetan ameasa husi guarda munisipál.
”Dala ruma ema la sosa no mos ha’u hetan ameasa husi guarda munisipál sira. Maibé ha’u la rende tanba ha’u hakarak fasilita estudu ne’ebe to’o ona klaran.” Jainito Informa.
Jainito espera negósiu ki’ik ne’e bele kontinua hodi garante nia nesesidade estudu loroloron. Nia mós husu ba jovem sira atu la moe halo servisu onestu hodi suporta sira-nia edukasaun tanba edukasaun mak úniku solusaun vida umanidade.
”La bele moe atu fa’an ka halo servisu ne’ebé di’ak. Importante mak ita bele sustenta ita-an no garante estudu to’o susesu” Dehan nia.
Esforsu Jainito ne’e mós hetan apresiasaun husi Diretora Fakuldade Siénsia Sosiais no Polítika (CISPOL), Ana Maria do Rosário, ne’ebé durante ne’e observa estudante refere iha sala aula.
Ana Maria do Rosario hatutan, Jainito hanesan ezemplu di’ak ba estudante sira seluk tanba nia bele jere tempu entre atividade akademika no negósiu.
”Ha’u konese Jainito. Nia estudante ida ne’ebé badinas no kriativu. Nia bele fahe nia tempu entre eskola no negósiu atu sustenta nia estudu.” Dehan Ana Maria.
Nia akrescenta, dezafiu boot liu ba Jainito mak jestaun tempu. Maski nune’e, to’o agora nia observa katak estudante refere nafatin bele tuir prosesu aprendizajen ho di’ak.
“Nia tenki maneja nia oras atu labele falta iha aula no mós labele abandona nia negósiu. To’o agora nia prosessu aprendizajen la’o ho di’ak.” Hatutan nia.
Ana Maria mós enkoraja estudante sira atu la depende de’it ba apoiu husi inan-aman, maibé buka inisiativa rasik hodi prepara futuru.
Iha kada pakote sigaru ne’ebé Jainito fa’an, iha esperansa ida ne’ebé boot liu duké valor osan. Negósiu ki’ik ne’e la’ós deit fonte rendimentu, maibé sai ponte ida atu lori nia besik liu ba mehi hodi remata estudu no hadi’a futuru.
