Governu Sei Fo Subvensaun Públika Ba Mídia Sira
Imajem : Edital
SAPNewsTL, Dili – Governu liu husi Sekretariu Estadu Komunikasaun Sosial sei fó apoiu liuhusi regime subvenção públika ba órgaun komunikasaun sosiál ho kritériu ne’ebé bazeia ba planu asaun, programa no servisu ne’ebé hala’o husi kada média.
Conzita Mota – SAP News TL
Konsellu Ministrus aprova projetu Dekretu-Lei, ne’ebé aprezenta husi Sekretáriu Estadu Komunikasaun Sosiál, Expedito Dias Ximenes, kona-ba Rejime subvensaun públika ba órgaun komunikasaun sosiál sira ho objetivu hodi hametin sustentabilidade ba setór ne’e, asegura sirkulasaun livre kona-ba informasaun, no mós promove pluralizmu no diversidade opiniaun sira.
Polítika ne’e nu’udar inisiativa Governu nian ida ne’ebé ho objetivu atu fó apoiu ba órgaun komunikasaun sosiál sira bazeia ba kritériu ne’ebé transparente no la diskriminatóriu, la fó impaktu ba nia independénsia editoriál ka liberdade informasaun no imprensa nian.
Sekretáriu Estadu Komunikasaun Sosial (SECOMS), Expedito Lori Diaz Ximenes, hateten, enkontru ho diretór no na’in média sira atu esplika kona-ba aprovasaun regime subvenção públika ne’ebé Konsellu Ministru aprova iha kuarta-feira liubá.
“Enkontru ohin ne’e rezultadu husi enkontru Konsellu Ministru iha kuarta-feira liubá, ne’ebé aprova Dekretu-Lei kona-ba regime subvenção públika ba órgaun komunikasaun sosiál. Tanba ne’e, ohin ha’u halo enkontru ho diretór média sira atu bele esplika kona-ba saida mak Konsellu Ministru aprova.” Dehan (SEKOMS), Expedito Loro Diaz Ximenes ba jornalista sira iha Salaun Palasio Governo, Segunda-feira 03/08/2026.
Expedito Loro Diaz Ximenes hatutan, objetivu husi regime subvenção públika ne’e atu apoiu órgaun komunikasaun sosiál, ho média sira presiza aprezenta sira-nia planu asaun no programa, atu Governu bele konsidera iha preparasaun Orsamentu Jerál Estadu 2027.
“Objetivu Governu nian husi regime subvenção ba órgaun komunikasaun sosiál mak atu esplika ida ne’e no husu na’in ba média sira atu aprezenta sira-nia planu no programa, hodi Governu bele haree no tau osan ba iha Orsamentu Jerál Estadu 2027.”
Nia esplika, apoiu ne’e la signifika Governu sei regula ka intervén iha polítika editoriál média sira nian, maibé Governu sei kontinua garante liberdade imprensa no liberdade espresaun.
“Mesmu Governu fó apoiu liuhusi subvenção públika, ida ne’e la signifika katak Governu sei regula ka intervén iha polítika editoriál média hotu-hotu nian. Governu nafatin konsistente atu garante liberdade de impresa no liberdade espresaun.” nia afirma.
Expedito argumenta, kritériu ba subvenção sei haree ba servisu no desempenhu kada média, la’ós fahe ho montante hanesan ba média hotu.
“Apoiu ka subvenção ne’ebé fó, sei haree ba proporsionalidade, La’ós fahe hanesan, maibé haree ba média ida-idak nia servisu, no ida-idak nia atendimentu.” Nia esplika.
SEKOMS mós husu ba média sira atu fo formasaun ba jornalista, liuliu iha área jurnálizmu investigativu, iha sira-nia planu asaun.
“Ha’u husu ba média na’in sira atu tau sira-nia planu ne’ebé sei hato’o mai,no haree liiiu ba buat importante sira, mak fó formasaun ba kolega sira iha ida-idak nia média, liuliu iha área investigativu.”Nia husu
Média ne’ebé sei konsidera atu hetan subvenção públika mak hanesan STL News, Timor Post, Independent, SM News, SAPNews, Dili Post, One Timor no Lafaek News. Inklui média sira seluk ne’ebe mak sei tuir nia enkontru tan iha faze segundo nian.
