Suspende João Bosco, Governu Nomeia Jacinto Sai PAM-Aileu Foun
Imajem : PAM-Aileu Foun Jacinto Ribeiro Dias. Foto : Media SEFOPE
SAP News Agency, Dili : Governu liu hosi despaixu nú. 10/PM/VII/2026 ne’ebe asinadu hosi Primeiru Ministru Kay Rala Xanana Gusmão nomeia Jacinto Ribeiro Dias sai Presidente Autoridade Munisipiu Aileu (PAM-A) hodi troka João Bosco dos Santos ne’ebe hetan ezonerasaun husi governu iha loron 17 Jullu 2026.
Ohin loron 22 Jullu 2026, Governu liu hosi despaixu nú. 10/PM/VII/2026 hili Jacinto Dias hodi sai Presidente Autoridade Munisipiu Aileu hodi kompleta restu mandatu tuir despaixu governu nian.
Antes ne’e, Jacinto Ribeiro Dias asume kargu hanesan Xefe Suku Seloi Malere iha Postu Administrativu Aileu husi Periodu 2012-2023 no daudaun ne’e assume knaar hanesan Xefe Gabinete SEFOPE.
Bazeia ba despaixu ne’e governu liu hosi Ministru Administrasaun Estatal sei prepara no fo tomada de posse PAM-Aileu nomeadu iha tempu besik, molok hala’o ninia funsionamentu iha munisípiu.
Tuir despiaxu ho númeru referénsia 469/M-MAE/VII/2026, iha loron sexta-feira, 17 Jullu 2026 ne’ebe fo sai hosi Ministru Administrasaun Estatal (MAE) Tomas do Rosário Cabral katak ministériu deside halo suspensaun ba Presidente Autoridade Munisípiu Aileu João Bosco dos Santo (JBS) hodi submete ba prosesu investigasaun tuir lei.
“Ha’u iha onra atu informa ba ita-boot katak, tuir faktu sira ne’ebé atribui ba ita-boot no divulga liuhosi mídia sosiál no mídia, ha’u fó ona instrusaun ba Inspetór Jerál Administrasaun Estatál nian atu loke inkéritu ida, ne’ebé sei hala’o hosi Gabinete Inspetór Jerál no Auditoria Administrasaun Estatál nian ho objetivu atu hatene loloos kona-ba alegasaun sira ne’ebé temi ona”. Sita karta iha karta despaixu. Asinadu hosi MAE. Dili,17/07/2026.
Ministériu Administrasaun Estatál bazeia ninia asaun sira iha respeitu rigorozu ba prinsípiu sira Estadu direitu demokrátiku, partikularmente prinsípiu prezunsaun inosénsia, tanba ne’e mak sei la propoin ka adota medida sansionativa molok konklui prosedimentu fiskalizasaun ne’ebé temi ona no halo avaliasaun ba ninia konkluzaun ida-idak.
Bazeia ba publikasaun iha mídia sosiál no notísia sira, sujere nesesidade ba medida sira ho objetivu atu salvaguarda dignidade, kredibilidade, no prestíjiu hosi instituisaun públika sira.
“Pozisaun Prezidente Autoridade Munisipál nian implika reprezenta Governu iha ámbitu jurisdisaun territoriál respetiva hodi halo imperativu atu garante katak funsionamentu regulár Administrasaun Públika nian no sidadaun sira-nia konfiansa ba instituisaun sira la afetadu durante prosesu investigasaun nian”. Sita iha karta
Iha termu sira-ne’e, MAE haruka atu labele mosu iha fatin sira Autoridade Munisipál Aileu nian no labele hala’o aktu ruma ne’ebé iha relasaun ho ezersísiu knaar sira ne’ebé inerente ba kargu prefeitu nian, to’o konkluzaun hosi investigasaun ne’ebé la’o hela no komunikasaun hosi desizaun ne’ebé sei foti kona-ba ida-ne’e.
Durante períodu ida-ne’e, podér sira ne’ebé nesesáriu ba funsionamentu Autoridade Munisipál sei ezerse hosi Sekretáriu(sira) Munisipál ne’ebé deside atu delega ba, tuir lei aplikavel no medida nesesária hotu-hotu sei foti atu garante kontinuidade atividade administrativa.
“Ha’u konvensidu katak ita-boot sei komprende katak determinasaun ida-ne’e la konstitui julgamentu prematuru ruma kona-ba verasidade akuzasaun sira ne’ebé halo hasoru ita-boot, maibé ho intensaun de’it atu proteje interese públiku, kredibilidade instituisaun estadu nian, no dignidade kargu ne’ebé ita-boot kaer daudaun, enkuantu investigasaun kompetente kona-ba faktu sira hala’o hela”. Sublinha iha karta despaixu
Suspensaun ne’e konsidera permanente no durante loron tolunulu nia laran sei buka fali kandidatu foun hodi troka nia fatin nu’udar PAM-Aileu iha restu mandatu.
Entrenatu, Vítima Alda Maria Alves sei kontinua hikas ninia servisu iha instituisaun ne’ebe nia haknaar an ba iha tempu besik.
