PR Horta Kontente Labarik & Jovens Vizita Ró Biblioteka Doulos Hope Iha Portu Dili
Imajem : Presidente Repúblika Jose Ramos Horta iha Portu Dili,07/09/2026
SAPNewsTL, Díli – Presidente Repúblika Timor-Leste, José Ramos-Horta, halo despedida ba roo-biblioteka Doulos Hope ne’ebé termina nia vizita iha Portu Díli.
Vincensius Morais – SAPNewsTL
Hafoin atividade despedida, Xefe Estadu hateten, nia parte sente kontente tebes tanba prezensa roo Doulos Hope fó oportunidade ba labarik no komunidade atu asesu ba livru sira ho presu ne’ebé asesível.
“Tinan kotuk sira mai iha Agostu, ha’u mak konvida. Agora mai nafatin iha Agostu. Hau kontente tebes tanba imi fó oportunidade ba labarik sira atu hetan livru.” Dehan Presidente Repúblika Timor-Leste, José Ramos-Horta iha Portu Díli,07/09/2026.
Ramos-Horta hatutan, Doulos Hope iha konseitu ne’ebé úniku, tanba roo ne’e la’ós de’it sai fatin atu fa’an livru, maibé mos iha biblioteka ne’ebé loke ba labarik no joven sira.
“Labarik sira hotu bele tama. Ida ne’e konseitu ida úniku. Roo ida ne’e boot, maibé iha biblioteka ida ne’ebé fa’an livru ho deskontu boot. Roo ida hanesan ne’e lailais atu hetan.” Hatutan Presidente.
Xefe Estadu mos apresia servisu voluntáriu husi ema sira ne’ebé servisu iha roo Doulos Hope, tanba sira kontribui hodi lori koñesimentu, siénsia no istória ba komunidade.
“Sira servisu iha ne’e voluntáriu. Maioria sira voluntáriu. Ida ne’e esperiénsia di’ak ida ba labarik sira. Ha’u rasik oferese livru lubuk ida atu labarik sira bele lori ba uma. Ha’u mai atu despede sira.” Haktuir Ramos-Horta.
Ramos-Horta subliña, Doulos Hope mai Timor-Leste ho objetivu atu lori biblioteka nakonu ho livru sira no fó asesu ba komunidade liuliu ba labarik no joven sira.
“Sira mai laiha objetivu seluk, maibé sira lori biblioteka ida iha roo boot ida ne’ebé nakonu ho livru. Livru sira fa’an ho deskontu boot. Ha’u, hanesan Presidente, mai sosa livru atu oferese ba labarik sira, tanba ida ne’e oportunidade ida ba sira.” Nia esplika
Tuir Xefe Estadu, livru sira iha Doulos Hope barak liu uza lian Inglés no aborda tópiku kona-ba istória, animál, ai-horis, natureza, siénsia, literatura no istória.
“Buat barak liu iha lian Inglés. Iha livru kona-ba istória, animál, ai-horis no natureza. Iha mos livru kona-ba siénsia, literatura, lian no istória. Maibé iha mos livru lubuk ida ba labarik sira, ho dezeñu oioi.” Informa Presidente
Durante roo Doulos Hope iha Portu Díli, labarik no joven sira hetan oportunidade vizita biblioteka iha roo ne’e hodi lee livru no halo fotografia, inklui aprende kona-ba kontéudu no istória oioin ne’ebé disponivel iha biblioteka.
