KI Fo Sasin Ba Konseleira/u Foun Mídia SAPNewsTL
SAPNewsTL, Dili : Presidente Konsellu Imprensa (KI) Otelio Ote hamutuk ho estrutura Mídia SAPNewsTL fo sasin no ofisializa Konseleira/u foun hamutuk na’in haat hodi servisu hamutuk ho Konseleiru atual na’in tolu iha mídia juvenil, estudantil no akadémiku SAPNewsTL.
Iha Diskursu Diretor Mídia SAPNewsTL Sergio Alves da Costa fo agradese ba Konseleira nain tolu no konseleiru na’in ida ne’ebe fo sira nia prontodaun, disponibilidade no domin tomak hodi fo akompanhamentu ba dezenvolimentu mídia ne’e ba futuru.
“Lori Familia SAPNews tomak ninia naran hato’o agradese ba konseleira/u foun na’in haat ne’ebe fo nia komitmentu, prontidaun, disponibilidade, no domin tomak hodi dudu foinsa’e sira iha SAPNewsTL, espera bele servisu hamutuk no fortifika mídia ne’e ba futuru ho forte no sustentavel”. Tenik Sergio Alves da Costa liu husi diskursu iha Salaun UNITAL, 23/02/2024.
Iha fatin hanesan, Presidente Konsellu Imprensa (KI) Otelio Ote mos fo parabens ba Konseleiru no Konseleira foun na’in haat ne’ebe prontu hodi apoia midia ne’e ba oin, hein katak bele suporta mídia ne’ebe lidera husi joven sira ne’e ba futuru ho diak no susesu.
“Parabens ba konseleiru no konseleira foun sira, espera bele tulun no akompanha midia ne’e ninia dezenvolvimentu ho diak ba futuru, parabens ba SAPNews tanba ohin bele selebra ona ninia ezistensia ba tinan rua”. Dehan Otelio Ote, atual Presidente KI
Konseleira Dra. Ligia Tomas Correia afirma, nia parte sei servisu hamutuk ho konseleiru/a sira hodi dudu midia SAPNews ho kbiit no kapasidade ne’ebe iha ba oin.
“Ami nia parte sei kontinua apoia no tulun joven estudante sira iha SAPNews hodi kontinua dezenvolve midia ne’e ba futuru tuir kbiit no kapasidade ne’ebe iha hamutuk ho konseleiru na’in tolu seluk”. Hateten Ligia Tomas Correia, atual Vise Reitora Asuntu Estudantil UNTL
Enkuantu, Mídia SAPNewsTL iha Konsleira na’in tolu no konsleiru na’in haat hanesan Padre Mouzinho Pereira Lopes, Presidente KONISTIL Pascoal Pinto Soares Lemos, Eng. Armindo de Jesus, Senhora Joana Pereia Miranda, Engª. Judite Dias Ximenes, Dra. Ligia Tomas Coreia no Senhor Agostinho de Sousa.
Jornalista : Ermelinda Soares