SEKOMS, KI & SAPNews Sertifika Maktoban Aquelina Mangalhães
SAPNewsTL, Dili : Iha ámbitu selebrasaun aniversáriu Mídia SAPNewsTL ba daruak, Sekretaria Estadu Komunikasaun Sosial (SEKOMS) Espedito Dias Ximenes, Presidente Konsellu Imprensa (KI) Otelio Ote, Konseleiru SAPNewsTL no Estrutura SAPNewsTL sertifika Maktoban Aquelina Mangalhães liu husi entrega sertifikadu apresiasaun ba Maktoban ninia inan hahoris.
Hafoin entrega sertifikadu no tara tais ba Maktoban ninia inan, SEKOMS Espedito haktuir ne’e hanesan símbolu agradesimentu ba Matebean Aquelina Mangalhães tanba nia dedika ona nia an tomak iha mundu jornalismu.
“Ida ne’e hanesan símbolu agradese nian, apresia ba Matebean Aquelina Mangalhães ninia dedikasaun hotu, Koragem ba mãe no familia sira hotu”. Tenik SEKOMS Espedito Dias Ximenes, durante entrega sertifikadu apresiasaun no tara tais iha Salaun UNITAL Dili, 23/02/2024.
Iha fatin hanesan, Maktoban Aquelina nia mãe Manuela Conceição Mangalhães fo agradese ba SEKOMS, KI no Mídia SAPNewsTL ne’ebe bele rekunhese Aquelina Mangalhães maske mate ona.
“Ha’u fo agradese teb-tebes tanba bele rekunhese Aquelina Mangalhães, obrigada barak tebes ba SEKOMS, KI no SAPNewsTL”. Manuela Mangalhães hateten
Diretor SAPNewsTL Sergio Alves da Costa mos fo agradese ba entidade hotu ne’ebe partisipa iha serimonia ne’e inklui Maktoban Aquelina ninia inan tanba bele representa Matebean no partisipa iha serimonia aniversáriu midia ba daruak nian.
“Agradese ba SEKOMS, KI, Representante UNTL, UNTL, UNITAL, MOFA, familia SAPNews nian, liliu maktoban Aquelina ninia inan ne’ebe ohin bele mai simu sertifika Aquelina ninian”. Nia dehan
Iha serimónia entrega sertidikadu ne’e akompanha direita husi Presidente KI Otelio Ote, Konseleira Mídia SAPNewsTL Dra. Ligia Tomas Correia, Judite Dias Ximenes, Joana Pereira Miranda, Agostinho de Sousa, Presidente SAPNewsTL Clementino Bragança Machado , Diretor SAPNewsTL Sergio Alves da Costa, familia SAPNews, no konvidadus sira
Enkuantu, Maktoban Aquelina Mangalhães hakotu iis iha Letefoho-Ermera, 25 Fulan Dezembru 2023 tanba sofre moras.