Eis Padre Martinho Hakotu Nia Peregrinasaun Iha Mundu Ho Idade Tinan 58
Imajem : Edital
SAP News TL, Díli : Eis Padre Martinho Germano da Silva Gusmão hakotu iis iha Ospital Nasionál Guido Valadares (HNGV) wainhira hala’o hela tratamentu intensivu iha Ospitál Bidau.
Eis Padre Martinho Germano da Silva Gusmão hanesan figura timoroan ne’ebé esperiénsia barak iha área relijiaun, filosofia, teolojia, edukasaun, literatura no esfera públika.
Maktoban Doutor Martinho Gusmão moris iha Baucau, 22 Maiu 1968. Maktoban tuir formasaun dahuluk iha munisípiu Baucau, hala’o estudu iha semináriu Indonézia.
Nia mós tuir formasaun superior iha área Filosofia, estudu nível pós-graduasaun no estuda iha área Ciência Política iha Roma, Italia.
Martinho Gusmão mós konhese nu’udar ema ne’ebé péritu iha filosofia, teolojia no pensamentu polítiku Timor-Leste nian. Nia hakerek livru no publika obra eskrita sira kona-ba istória no pensamentu lideransa Resisténsia liliu livru kona-ba Nicolau dos Reis Lobato, ne’ebé lansa iha Palásiu Prezidensiál iha 30 Novembru 2018.
Iha tinan 2021–2022, Martinho Gusmão tama ba arena polítika ho nia kandidatura ba Prezidente Repúblika Timor-Leste ba períodu 2022–2027. Nia aprezenta nia kandidatura ho mensajen kona-ba konsensu nasionál no konstrusaun sosiedade solidária no fraterna.
Iha 2022, Konferénsia Episkopál Timorense (CET) klarifika katak Martinho Gusmão lakon estatutu klerikál ho forma permanente, tuir Reskritu númeru 3593/21, nune’e nia fila ba vida nu’udar leigu.
Ohin, loron 22 Agusto 2026, Martinho Gusmão hakotu nia peregrinasaun iha mundu ho idade tinan 58 iha HNGV, Dili, Timor-Leste.
To’o oras ne’e, SAPNews seidauk hetan informasaun kona ba kauza hosi moras ne’ebe nia sofre tanba seidauk halo komfirmasaun ho parte médiku sira iha HNGV.
