Dalan Ba Eleisaun Presidensial 2027, CNE no STAE Sorumutu Ho PR Horta
Imajem : Vise Prezidente CNE Domingos Barreto iha Palásiu Prezidensiál Nicolau Lobato, Bairru Pite, Dili, Segunda-feira (17/08/2026). Foto : Média PR
SAPNewsTL, Dili – Komisaun Nasionál Eleisaun (CNE) hamutuk ho Sekretariadu Tékniku Administrasaun Eleitorál (STAE) hala’o audiénsia ho Prezidente Repúblika, José Ramos-Horta, hodi aprezenta preparasaun ba Eleisaun Prezidensiál 2027.
Vinsensius Saldanha Morais de Araujo – SAPNewsTL
Vise-Prezidente CNE, Domingos Barreto, hateten, enkontru ne’e fó oportunidade ba CNE hodi hato’o informasaun kona-ba preparasaun instituisaun nian ba eleisaun prezidensiál ne’ebé sei hala’o iha tinan 2027.
“Ohin, ami enkontru ho Prezidente Repúblika hodi hato’o preparasaun CNE nian ba eleisaun prezidensiál ne’ebé sei akontese iha 2027.” Dehan Domingos Barreto ba jornalista sira hafoin audiénsia, iha Palásiu Prezidensiál Nicolau Lobato, Bairru Pite, Dili, Segunda-feira (17/08/2026).
Domingos hatutan, mandatu CNE atual sei remata iha fulan Agostu 2026, no preparasaun ba eleisaun sei kontinua ho komisaun foun tuir prosesu ne’ebé sei determina.
“Ami mós aprezenta ba Prezidente katak ami-nia mandatu CNE nian sei remata iha fulan ida-ne’e, no preparasaun ba eleisaun sei kontinua ho komisaun foun tuir prosesu ne’ebé sei determina.”Haktuir Vise-Prezidente CNE.
Kona-ba kalendáriu ba Eleisaun Prezidensiál 2027, Domingos esplika, prosesu ne’e depende ba desizaun Prezidente Repúblika kona-ba data eleisaun.
“Kona-ba preparasaun eleisaun prezidensiál nian, ami hein Prezidente Repúblika dekreta data lai, depois foin komisaun foun ne’ebé sei mai halo preparasaun tuir prosesu.” Nia esplika
Iha audiénsia ne’e, Prezidente Repúblika husu kona-ba preparasaun ne’ebé CNE halo ona. CNE informa katak durante períodu mandatu, instituisaun ne’e hala’o edukasaun sívika, enkontru ho partidu polítiku sira no atividade seluk relasionadu ho prosesu eleitorál.
Iha Fatin hanesan, Diretór-Jerál STAE, Elviro Fernandes Moniz, haktuir STAE no CNE hato’o informasaun ba Prezidente Repúblika kona-ba preparasaun no prosesu eleitorál ne’ebé instituisaun rua ne’e halo.
“Ohin Sua Exselénsia Prezidente, ami hato’o informasaun kona-ba preparasaun atu STAE ho CNE bele prepara di’ak liután prosesu eleitoral sira hotu.”Haktuir Elviro Fernandes Moniz.
STAE mós aprezenta ba Prezidente Repúblika dadus kona-ba númeru eleitor sira ne’ebé rejistadu, inklui eleitor sira ne’ebé atualiza ona dadus biométriku no eleitor sira ne’ebé hela iha rai-li’ur.
“Ohin ami aprezenta ba Sua Exselénsia Prezidente númeru eleitor sira ne’ebé rejistadu ona, inklui númeru eleitor ne’ebé atualiza ho biométriku no eleitor sira ne’ebé iha rai-li’ur.” Esplika Diretór-Jerál STAE.
Antes ne’e, Prezidente Repúblika José Ramos-Horta mós hateten katak Eleisaun Prezidensiál 2027 tenki garante prosesu votasaun ne’ebé livre no demokrátiku.
