SAPNews Asina Akordu Kooperasaun Ho CCTV+ ! Sergio : “Oportunidade Foun, Simu Ho Responsabilidade”
Imajem : Diretor SAPNewsTL Sergio Alves da Costa iha Tongren, China, 14/05/2026.
SAPNewsTL, Dili : Media Sa’ani Assamana Prazer News Timor Leste (SAPNewsTL), asina akordu kooperasaun CCTV+ ho durasaun tinan ida, objetivu hosi akordu servisu hamutuk ne’e hodi promove fahe kontéudu entre media, formasaun negósiu, produsaun konjunta, transmisaun/broadcasting, inovasaun téknolojia media, diálogu no komunikasaun entre media, disseminasaun kontéudu no peskiza kona-ba media entre parseiru media sira.
Partnered Distribution Channels ne’ebé CCTV+ halo parceria mak AP nia GVW & Media Port no Reuters nia WNE & Media Express liu hosi sistema distribusaun online ne’ebé CCTV+ nia propriedade, liuhosi enderesu eletróniku http://www.cctvplus.com/
Bazeia ba akordu “Licensed Channels” ne’ebe SAPNewsTL asina CCTVPlus maka sei halo publikasaun no kopia liu hosi All Media Service Platform (ASMP), nune’e plataforma servisu media hotu ne’ebé CCTV+ dezenvolve no jere, ne’e CCTV+ no membru sira uza atu publika, download no fahe programa notísia, sinal transmisaun direta (live broadcasting), dokumentáriu no servisu espesiál sira seluk.
Ligadu ho akordu kooperasaun servisu ne’e, Diretor SAPNewsTL Sergio Alves da Costa konsidera akordu refere krusial tebes ba SAPNews tanba bele kria kolaborasaun foun instituisaun internasional ne’ebe kunhesidu iha China no ASEAN.
“Ne’e mak oportunidade foun no krusial tebes, SAP News TL konkorda no simu ho responsabilidade hodi hahu era foun ne’e ho CCTVPlus, Ami hakarak hato’o agradesimentu sinseru ba CCTV+ tanba fahe akordu servisu notísia no fó oportunidade atu estabelese kooperasaun entre organizasaun media rua iha presente no future”. Hateten Diretor SAPNews Sergio Alves da Costa iha Dili, 17/08/2026.
SAP News TL rekoñese valór signifikante husi parseria ne’e tanba bele hola parte Parseiru Media Global South (Global South Media Partners).
“Ami fó apresiasaun aas ba kompromisu CCTV+ atu disponibiliza materiál notísia no sinál live ba SAP News TL tuir kondisaun ne’ebé ita asina hamutuk. Ami fiar katak kooperasaun ida-ne’e sei kontribui ba hametin kapasidade SAP News TL iha produsaun notísia, asesu ba konteúdu internasionál, no expande oportunidade atu konteúdu media Timor-Leste bele to’o audiénsia internasionál ne’ebe boot liutan”.Sergio dehan
SAP News respeita responsabilidade no limitasaun sira ne’ebé define iha Akordu, inklui uzu ba materiál lisensiadu, respeitu ba períodu uzu no restrisaun aplikável, protesaun ba integridade no akurasia editorial, no kumprimentu ba rekizitu propriedade intelektuál no direitu autór (copyright).
SAP News TL konsidera parseria ho CCTV+ nu’udar oportunidade importante atu hametin kooperasaun profisionál entre organizasaun media husi Timor-Leste no Xina, kooperasaun ne’e bele kontribui ba komunikasaun no kolaborasaun ne’ebé boot liu tan entre parseiru media iha Global South.
“Tanba ne’e, ami kompromete atu implementa akordu ida-ne’e ho profisionalizmu, responsabilidade editorial, respeitu ba propriedade intelektuál, no komprensaun mútua. Ami husu atu kooperasaun ne’e la limita de’it ba video/news materials, maibé aumenta ba capacity building, journalist training, professional exchange, study visit no joint reporting iha future”.
SAPNewsTL hasoru dezafiu oi-oin, maibé esperiénsia barak ne’ebe ultrapassa sai baze importante ba aprendizajen, inovasaun, no kresimentu instituisaun moderna, hadi’a sistema serviso, no adapta ba mudansa sira, SAPNewsTL grandualmente transforma nia dezafiu sira sai oportunidade ba nia dezenvolvimentu.
Ohin loron, SAPNewsTL tama ona iha faze foun ba dezenvolvimentu organizasaun liliu bele asina akordu servisu hamutuk ho CCTV+. Media ne’e adapta ho estratéjiku nia operasaun no dezenvolve nia kapasidade tuir rekursu ne’ebé disponivel hodi fó atensaun boot liu ba jestaun profisionál, hametin instituisaun, sustentabilidade finanseira, transformasaun digitál, no kresimentu ba futuru.
“Ita-nia experiensia hatudu katak dezenvolvimentu media ne’ebé sustentável la fasil maibe harii liuhusi kompromisu, konsisténsia, profisionalizmu, inovasaun, no kapasidade atu adapta. Husi inisiativa media ne’ebé lidera husi joven ho rekursu limitadu, SAPNewsTL dezenvolve progresivamente sai organizasaun media ne’ebé independente, profisionál, resiliente, alternativa no sustentável iha Timor-Leste”. Hateten Ezekutivu SAPNews
SAPNewsTL kompromete atu hametin kooperasaun servisu ne’e nia funsionamentu nu’udar fonte informasaun ne’ebé viável no plataforma ba komunikasaun públiku ne’ebé konstrutivu no informadu.
“Ami fiar katak parseria estratéjiku, oportunidade dezenvolvimentu kapasidade, apoiu teknolójiku, no kolaborasaun ba futuru ne’e bele hametin liu tan ami-nia kapasidade atu bele sai jornalizmu kualidade. Tanba ne’e, SAPNewsTL simu ho laran-luak parseiru ne’ebé fahe ho ami vizaun atu harii setór media Timor-Leste ne’ebé forte, profisionál, independente, no sustentável”.
Media Sa’ani Assamana Prazer News Timor Leste (SAPNewsTL), hari’i husi profisionál joven no graduadu sira iha loron 26 Fevereiru 2022, funda ho vizaun atu atinji sosiedade Timor-Leste ne’ebé iguál, justu, informativu, inspirativu, konstrutivu, edukativu, analítiku, krítiku, no demokrátiku.
Media SAPNewsTL mak plataforma media online ne’ebé mai ho espíritu voluntariu, patriotizmu no nasionalizmu atu servi públiku no garante liberdade imprensa no ekspresaun liuhusi kontribuisaun ba dezenvolvimentu órgaun komunikasaun sosiál iha rain laran no iha rain li’ur.
Dezde media organizasaun ida-ne’e eziste, SAPNewsTL livre husi podér ekonómiku no podér polítiku, iha ne’ebé nia halo nia atividade jornalístika tuir Konstituisaun Repúblika Demokrátika Timor-Leste artigu 40o no 41o kona-ba liberdade ekspresaun no liberdade imprensa, Lei Komunikasaun Sosiál númeru 5/2014 no Kódigu Étika Jornalístika 10.
Durante tinan 5 nia ezisténsia, media ne’e konsege produz notísia 5.900 ho vizualizasaun 1.510.517 iha website www.sapnewstl.com, iha plataforma facebook iha serguidores hamutuk 96.000 ho vizualizasaun kada fulan aproximadamente 10-30 millões, no kanál youtube produz ona notísia 460 ho vizualizasaun 950.245 no iha tiktok hamutuk 32.000 serguidores ho 5.900.000 vizualizasoens husi notisia 520.
Akordu kooperasaun ho CCTVPlus ne’e hala’o iha Beijing, China, iha loron 5 fulan Agusto tinan 2026, wainhira Representante SAPNews Marciana da Conceição hetan oportunidade liu hosi Sekretaria Estadu Komunikasaun Sosial hodi tuir formasaun media no interkambiu iha China.
