Komemora 12N ! Assanami : Loron Nasionál Ne’e Halo Reflesaun La’os Fo Feriadu
SAPNewsTL, Dili: Vise Primeiru-Ministru Mariano Sabino Assanami husu jerasaun foun sira partisipa loron importante sira iha Timor-Leste (TL) para halo reflesaun tanba rai ida ne’e eroi sira fakar ran mak hetan liberdade nu’udar nasaun ida iha mundu.
“Ita koalia beibeik kona ba formasaun karakter maibe ita la tau importansia ba loron importante sira hanesan 20 Maiu, 20 Agostu, 12 Novembru, 28 Novembru, ita halo fali feriadu ba joven sira ba pasiar laos hanoin hikas tanba saida mak loron ne’e importante”.
“Ha’u nu’udar vise primeiru ministru ho ministru koordenador ba asuntu sosial tau matan ba juventude no edukasaun, Ha’u sei orienta hahu oin ba oin selebrasaun loron boot sira laos halo feriadu ba joven sira pasiar la ba eskola maibe iha eskola sira no fatin públiku jerasaun foun tenki mai partisipa selebrasaun loron boot sira para halo reflesaun Timor-Leste to’o ona iha ne’ebe” dehan vise primeiru ministru Mariano Sabino Assanami ba jornalista sira iha semiteriu santa kruz, Dili domingu (12/11/2023).
Vise Primeiru-Ministru hatutan, ba futuru komemorasaun loron masakre santa kruz 12 Novembru 1991, ministériu edukasaun presiza organiza ensinu superior selebra hodi hanoin hikas juventude lori as’wain sira nia luta uluk laos halo fali loron feriadu ba estudante sira.
Ohin ema hotu halo reflesaun hanoin hikas juventude halo dedikasaun totalidade ho entrega an tomak nune’e halo demostrasaun, iha loron 12 Novembru 1991 ne’e simboliza juventude entrega an ba rai ida ne’e para atu hetan ukun rasik an, tanba sira hatudu katak unidade ka hamutuk ne’e importante tebes.
Nia salienta, agora Timor-Leste iha grupu no partidu oi-oin maibe ne’e laos atu hakotu unifikasaun ka espiritu unidade ho fakar ran mak suku nune’e ho akontesimentu 12 Novembru 1991 atu fo mensajen ba external katak luta ida ne’e lao hela iha rai laran para defende nia identidade ho direitu para bele hetan ukun rasik an, mate akontese iha masakre santa kruz sosa liberdade no fo ezemplu katak bele partidu no organizasaun oi-oin maibe labele sobu unidade ba estadu ida hodi lori Timor-Leste ba oin tanba rai ida ne’e fo is ba Timoroan sira.
Assanami informa tan, mensajen iha selebrasaun 12 Novembru ida ne’e determina loron ba joven sira nune’e kontinua nafatin juventude loriku as’wain sira luta no ain fatin nu’udar as’wain para atinje saida eroi sira nia mehi para povu Timor-Leste moris diak, livre no goza, ba joven sira ohin livre ne’e tanba aman ka maun sira mate tanba ne’e rai ida ne’e la iha ema ida satan ema hotu nia liberdade, sunu ema nia uma ka halo violensia, ida ne’e halo traisaun ba eroi sira tanba sira fakar ran Timor-Leste hetan liberdade.
Ministru ne’e afirma tan, mate restu sira tenki sai nafatin lilin lakan iha komunidade sira nia leet, balun bele mai ministru, deputadu, xefe suku, agrikultor, bombeiru no dasar rai maibe nafatin halakan lilin revolusionariu para kontinua nafatin labele hamate lilin revolusionariu tanba seidauk to’o, Timor Oan hotu iha misaun hanesan para lao nafatin ba oin.
Nu’udar vise primeiru ministru apela Timoroan hotu katak abut ida, hun ida rai Timor ida deit tan ne’e hasa’e orasaun nafatin nune’e Maromak simu eroi sira klamar iha nia sorin kuanan, tulun nafatin para Timoroan hotu hakat nafatin no fo onra ho gloria ba eroi sira hodi dignifika Timor-Leste nu’udar illa ida kiik maibe kor diferente iha mundu.
Assanami mos husu ba mate restu sira nafatin lakan fo espiritu revolusionariu ho totalidade iha idak-idak nia fatin ba estadu Timor Leste.
Reportajen: Augusto dos Santos