Konkista Vitória ! Bernadino Konsidera Delio & Daniel Sai Heroi Foun Ba Timor
Imajem : Bernadino Marques iha Lecidere,13/02/2025. Foto : Media KBD-FHTL
SAPNewsTL, Díli — Hafoin Timoroan selebra vitória Boxista Delio Mouzinho no Daniel iha jogu boxing Atlas Super Club Bali, Bernadino Marques husu Ministériu Juventude Desportu, Arte no Kultura (MJDAC, Sigla Portugés) tau importansia ba atividade desportivu Boxing hodi apoiu Boxista Timoroan sira.
Bernadino Marques hateten, Governu Timor-Leste liu husi Ministériu Juventude Desportu, Arte no Kultura (MJDAC, Sigla Portugés) labele hein deit rezultadu ne’ebe Timoroan sira konkista, hodi marka istoria ba mundu desportivu ho naran Timor-Leste nian.
“Hanesan joven, ha’u sente kontente tanba maun Delio ho Daniel hanesan heroi foun ba ita nia nasaun tanba ne’e husu ba governu liuliu MJDAC labele hein deit rezultadu maka foin apoiu, suporta sira iha prosesu tomak tanba Delio ba laos reprezenta familia maibe reprezenta ita nia nasaun Timor”. Dehan Bernadino Marques iha MJDAC, 13/02/2025
Foinsa’e ne’e konsidera vitória ne’ebe boxista konkista sai hanesan momentu ne’e importante no privileziu ba Timoroan maske nasaun kiik maibe sira hatudu ona katak Timor bele duni.
“Ho vitória hosi Delio no Daniel sai hanesan momentu ida ne’ebe importante no privileziu tebes ba Timoroan tomak maske Timor ne’e basaun kiik maibe hatudu ona katak Timor mos bele, laos Timor mos bele mai Timor bele duni, ita nafatin husu orasaun liu-liu ba ita nia heroi no hosi natureza sira atu bele suporta nafatin ita nia heroi foun hodi hatudu sira nia jogu ne’ebe maka diak”
Bernadino salienta, modalidade hotu-hotu labele hein deit selesaun nasional sira hanesan futebol, husu ba Governu liuliu MJDAK hodi apoiu modalidade hotu-hotu labele hein deit selesaun nasional hanesan futebol, ema barak imi sei suporta maibe modalidade boxing ne’e ema oituan/nain rua deit maka ba maibe tanba sa governu labele apoiu, ema sanulu resin suporta tanba sa nain rua deit labele apoiu.
“Nafatin husu ba MJDAK hodi apoiu nafatin ita nia boxista sira tanba sira hatudu ona katak bele duni no laos foin ida ne’e deit maibe kuaze iha ASEAN Games mos hatudu maibe parte relevante sira labele loke matan hodi haree ida ne’e”.
Imajem : Délio Mouzinho & Daniel Asis Belo iha Dili, 13/02/2025. Foto : SAPNews
Bernadino hatutan, antes ne’e la imazina Delio no Daniel bele hamonu boxista hosi ne’ebe boot no jigante tebes, maibe liu hosi sira nain rua nia esforsu no talentu bele konkista vitória.
“Nasaun Uzbequistão ne’ebe kompete ho Timor antes ne’e ita sente labele maibe liu hosi ita nia maun Delio no Daniel sira hatudu ona talentu no esforsu ne’ebe maka diak hodi hasoru nasaun ne’ebe maka jigante no konsege konskista vitória liu hosi tuku monu ka KO”. Nia hakotu.
Image : Boxer Délio Anzaqueci Mouzinho knocked out Alisher Ismailov of Uzbekistan in Bali, 09/02/2025
Iha sorin seluk, Coach Elizario Dias Monteiro hateten antes lori boxista Delio A. Mouzinho no Daniel Belo ba kompete iha Indonézia Bali sira halo ona despedida ba Primeiru Ministru (PM), no hafoin konkista vitória boxista hamutuk ho ekipa ba hasoru PM hodi fó rezultadu.
“Antes ne’e ita nia boxista nain rua hetan apoiu orsamentu 3.400 hosi Sua Exelénsia Primeiru Ministru Kayrala Xanana Gusmão hodi ba kompete iha Bali, Iha inisiu ami halo despedida, ohin ami fila mai aproveita oportunidade hakarak hasoru Avo Nana direita hodi fó rezultadu ne’ebe maka foin lalais ita nia boxista nain rua hatudu iha Indonézia Bali”. Dehan Coach Elizari Dias Monteiro ba jornalista sira hafoin hasoru PM iha Palasiu Governu, (14/02/2025).
Elizario Dias Monteiro mos hato’o obrigado no agradese wain ba sponsor Timor Telekom (TT) Bee Leste no esponsor sira seluk ne’ebe apoiu ona durante ne’e, lahaluha mos hato’o agradese wain ba Vise Primeiru Ministru Segundu Mariano Assanami Sabino, Primeiru Ministru Kayrala Xanana Gusmão, MJDAK ne’ebe ajuda ona ekipa.
Fo hanoin fali katak Délio Anzaqeci Mouzinho manan Alisher Ismailove hosi Uzbekistan no Daniel Asis Belo manan Sakti hosi Indonésia iha Bali, 09 Fevereiru 2025.
Jornalista : Marciana da Conceição
