Laiha Oportunidade ! Graduadu UNTL Preokupa Falta Kampu Traballu Iha Rai-Laran
![](https://sapnewstl.com/wp-content/uploads/2024/07/1721151656717.jpg)
Imajem : Graduadu Universidade Nasionál Timor Lorosa’e (UNTL) tinan 2024. Foto : João Marito
SAPNewsTL, Dili : Hafoin gradua iha Universidade Nasionál Timor Lorosa’e (UNTL), Graduante Ernesto da Costa preokupa kriasaun kampu traballu husi governu iha rai-laran tanba laiha servisu rezulta Timor oan barak kontinua buka moris iha rai-liur.
Graduadu UNTL, Ernestu da Costa preokupa kada tinan universidade produz graduadu rihun ba rihun maibe graduadu maioria la hetan servisu tanba laiha kampu servisu.
“Kada tinan universidade produz graduadu barak, maibe maioria la hetan servisu ne’e mak problema tanba kampu traballu menus entaun ita halo komparasan katak entre kada tinan produz graduadu barak vs kada fulan ema sai ba rai liur buka servisu mos barak entaun husi ne’e abilidade sira ne’ebe mak ita iha barak liu la aplika ona, iha ita nia rain rasik, maibe governu mos fo oportudade ba Timor oinsa bele hetan servisu iha rai-liur.”Tenik Graduadu FEAH-UNTL Ernesto da Costa ba SAPNews iha Dili, 12/07/2024
![](https://sapnewstl.com/wp-content/uploads/2024/07/Screenshot_20240716-131804.jpg)
Imajem : Graduadu FEAH-UNTL Ernesto da Costa ho retratu nia inan nian iha GMT Dili, 12/07/2024
Ernesto da Costa dehan, susesu ne’ebe nia hetan lases husu dezafiu no problema sira liuliu laiha osan hodi fasilita prosesu estudu ne’ebe la’o naruk durante tinan ne’en (6) nia laran.
“Dezafius lubuk mak ha’u hasoru hanesan finansiamentu, kada ves ita hetan pressaun oioin, dala ruma iha prosesu estudu nian iha kondisaun saúde ladun estavel maibe nafatin firme luta hodi ultrapassa desafiu hotu”. Nia haktuir
Graduadu UNTL ne’e garante, to’o tempu ida nia sei implementa matenek ne’ebe nia kolleta iha universidade hodi kontribui ba kualidade edukasaun iha Timor-Leste.
“Esperansa ba futuru hakarak implementa siensia ne’ebe hetan ona husi universidade hodi kontribui ba kualidade edukasaun nian iha rai doben Timor ida ne’e”. Nia fundamenta
Graduandu ne’e husu foinsa’e sira ne’ebe hala’o estudu iha universidade sira hodi kontinua hatudu boa vontade, buka matenek no sai matenek, nune’e bele implementa iha futuru.
“Ha’u nia mensajen ba belun sira ne’ebe esforsu hela iha prosesu estudu katak nafatin iha vontade hodi luta ba estudu nune’e bele halo mudansa ba ita nia aan hodi bele garante sa mak deskreve ona iha logo República Democratica de Timor-Leste (RDTL, sigla portugués) nia laran katak Unidade, Asaun no Progresu ba Timor-Leste”. Nia hakotu.
![](https://sapnewstl.com/wp-content/uploads/2024/07/IMG-20240713-WA00332.jpg)
Imajem : Lisensiadu FFSH-UNTL Crisanto Lucas Lafu
Iha sorin seluk, Lisensiadu Fakuldade Filosofia Siensia Humana UNTL, Crisanto Lucas Sufa afirma, nia parte sei dezenvolve diak liu tan nia kunhesimentu no kapasidade liu husi kursu, formasaun no treinamentu sira liga ba formasaun iha futuru, nune’e bele partisipa iha prosesu dezenvolvimentu nasionál.
“Ha’u sei haklean ha’u nia kunhesimentu liu husi kursu, formasaun, no treinamentu liga ho area Filosofia, hafoin ha’u sei dezenvolve, servi no kontribui ba sosiedade liu husi Aldeia, Suku, Postu Administrativu no Munisipiu no Dezenvolvimentu Nasional”. Crisanto afirma
Liga ba kampu traballu ne’ebe sei menuz, graduadu ne’e konsidera graduadu sira presiza hatudu sira nia kunhesimentu no kapasidade ba públiku, nune’e públiku bele hatene tanba kampu traballu laiha ne’e responsabilidade entidade hotu nian iha Timor-Leste.
“Kada tinan universidade produz graduadu barak maibe maioria la hetan servisu, ne’e tuir ida-idak ninia karakter mak ladun hatudu nia kunesimentu ba públiku, karik ita la hatudu ita nia kunesimentu no karakter ba públiku susar tebes atu ema kunhese no hetan servisu, tanba ita mos falta kampu de traballu”. Nia dehan ba SAPNews iha Dili, 12/07/2024
Graduadu ne’e husu ba estudante sira ne’ebe sei hala’o estudu iha universidade, atu kontinua hatudu pasiénsia maxima no orasaun beibeik inklui hakaas an nafatin to’o hetan susesu tanba susesu ne’e presiza esforsu no dedikasaun.
“Ba maluk estudante sira hotu ne’ebe sei enfrenta hela estudu iha universidade tenki esforsu an nafatin, boa vontade, hatudu pasiénsia no orasaun hodi duni ita nia mehi, se ita laiha vontade, ita la pasiensia, la esforsu an, ita sei la atinje ita nia mehi”. Nia sublinha
![](https://sapnewstl.com/wp-content/uploads/2024/07/20240712_0826402.jpg)
Imajem : Graduadu Igino da Costa Lic.Ed. UNTL
Graduante FEAH-UNTL Igino da Costa fo agradese ba familia sira hotu, kolega sira hotu no UNTL liliu dosente sira hotu iha Departamentu Kímika tanba bele apoia, tulun no fasilita nia durante perkursu akadémiku iha UNTL.
“La haluha, agradese mos ba Apa no Ama, maun no alin sira hotu, familia hotu ne’ebe apoia ha’u durante estudu tinan 7 nia laran, imi nia sakrifisiu vale apena tanba ohin ha’u konsege ona realiza saida mak imi hein durante ne’e, agradese mos ba UNTL liliu Departamentu Kímika ne’ebe sai ha’u nia espasu luta nia nian to’o realiza mehi ida ne’e, obrigadu no agradese ba parte hotu ne’ebe apoia direta tantu indireta, imi hotu iha ha’u nia fuan”. Igino hateten ba SAPNews iha Likisa, 12/07/2024
Graduadu Igino da Costa mos husu ba nia maluk estudante sira ne’ebe sei hala’o estudu iha mundu akadémiku atu kontinua firme to’o susesu tanba susesu ne’e sempre posivel ba ema hotu ne’ebe esforsu no luta.
“Husu ba kolega sira ne’ebe sei luta iha prosesu nia laran, atu firme nafatin no hakaas an hodi realiza ita ida-idak nia mehi, tanba susesu ne’e sempre posivel ba ema hotu ne’ebe hakarak koko no esforsu beibeik, ohin ha’u susesu ona, hein katak aban bainrua imi sei bele susesu, susesu ne’e ba ita hotu, atu hetan servisu ka la hetan servisu, ne’e depende ba ita ida-idak, maibe fiar katak to’o loron ida, servisu ne’e sei iha ba ida ne’ebe buka”. Nia hakotu
Enkuantu, graduasaun ne’ebe UNTL hala’o ba dala XXX durante loron rua (11-12/07/024) iha Ginaziu Munipal de Dili (GMT) ne’e ba fakuldade 10 husi departamentu 49, total graduadu rihun ida atus hitu sanulu resin tolu (1713), entre sira Fakuldade Edukasaun Artes Humanidades hamutuk 521 no Departamentu Kímika hamutuk 62.
Jornalista : Marciana Fernandes