Prátika Jogu Ilegal Aumenta, PNTL Kaptura Ema Estranjeiru Hamutuk Na’in 90
Imajem : Autor Prátika Jogu Online Ilegal Iha Timor-Leste. Foto : Media PNTL
Sapnews Pro, Dili – Autoridade Seguransa liuhusi Diresaun Servisu Investigasaun Kriminal (DSIK), hamutuk ho Diresaun Servisu Informasaun Polísia (DSIP) iha Polísia Nasional Timor-Leste (PNTL), detein tan sidadaun estranjeiru hamutuk nain 90 tanba iha alegasaun pratika online scaming game ilegal iha área Kampu Baru, Munisípiu Díli, no Ulmera, Munisípiu Likisá.
Porta-voz PNTL no Diretór Atual Diresaun Servisu Investigasaun Kriminal (DSIK), Superintendente Xefe Polísia João Belo dos Reis, hatete katak operasaun ne’e realiza hafoin autoridade seguransa rekolla informasaun liuhusi servisu hamutuk ho lideransa komunitária, ne’ebé konsege identifika atividade online Game ilegal iha Kampu Baru no Ulmera.
“Bainhira ami rekolla informasaun hotu iha fatin rua ne’e, ami lansa kedas ekipa rua hodi halo operasaun iha Kampu Baru no Ulmera, besik Eskola Kasait. Iha Kampu Baru, ami detein sidadaun Xineza nain 14 ho flagrante delitu bainhira halo atividade call centre ka jogu online”.
“Iha Ulmera, ami detein sidadaun Indonézia nain 76 no sidadaun Xineza nain ida. Hafoin halo identifikasaun, ami halo apreensaun ba sira-nia ekipamentu no sasán sira hodi asegura no submete ba prosesu legal tuir mai,” dehan Superintendente Xefe Polísia João Belo dos Reis ba jornalista sira iha edifísiu DSIK, Kuartel Jerál PNTL, Caicoli, 13/07/2026. Sita Media PNTL
Porta-voz PNTL ne’e afirma ekipa DSIK dadaun ne’e sei halo verifikasaun ba sasán evidénsia hotu ne’ebé utiliza iha atividade refere, inklui rejistu no análiza evidénsia sira, antes hato’o informasaun kompleta ba públiku.
“Agora dadaun, ami-nia ekipa DSIK sei halo verifikasaun ba sasán evidénsia hotu ne’ebé utiliza iha atividade jogu online ne’e no sei konfirma mós sidadaun sira nia nasaun”.
“Bainhira prosesu identifikasaun remata ona, ami sei fó informasaun kompleta ba públiku atu akompaña dezenvolvimentu kazu ida ne’e,” hakotu Porta-voz PNTL.
Antes PNTL liu hosi nia ekipa konjunta kaptura ona sidadaun estranjeiru nain 99 iha Bebonuk no 29 iha Manleuana ne’ebe deskonfia envolve iha atividade jogus ilísitu online iha Dili.
Tuir publikasaun ne’ebe Sapnews.com asesu liu hosi Pagina Serviços Relações Públicas haktuir katak ekipa konjunta konsege sobu rede boot hirak ne’e tanba deskonfia iha atividade jogus online illegal no Scam Call Centre ne’ebe lokaliza iha Aldeia 20 de Setembru, Suku Bebonuk, Munisípiu Dili.
“Durante operasaun, ekipa identifika grupu bot ne’e utiliza teknolojia avansada hodi halo operasaun iha kapital Dili. Ekipa mós preende evidensia sasán eletróniku barak, inklui komputadór hamutuk unidade 88, laptop unidade 13 no telemóvel atus ida resin”. Sita Pagina Serviços Relações Públicas, Dili,09/07/2026
Hafoin sobu ekipa halo kedas identifikasaun ba ema nain 99 hodi submete ba prosesu investigasaun hafoin sei prosesu ba Ministeriu Publiku.
Autoridade Seguransa liu hosi Servisu Migrasaun halo fiskalizasaun no identifikasaun ba sidadaun estranjeiru nain 29, ne’ebé aluga uma iha Aldeia Lemokari, Suku Manleuana, Postu Administrativu Dom Aleixo, tanba deskonfia pratika mós iha aktividade jogu ilísitu online.
Hafoin lokaliza sidadaun estranjeiru hirak ne’e, ekipa servisu kontatu kedas ba Departamentu Servisu Investigasaun Kriminal (DSIK), tanba iha indisius ba prátika jogu ilísitu online ne’ebe kategoria jogu ilegal no la iha dokumentus legal ruma, nune’e ekipa halo ona aprensaun ba ekipamentus ne’ebé uza hodi apoiu jogus ilegais refere.
Ekipamentus hirak ne’e maka hanesan, modem wireless, Laptop, kama andar no-mos karteiras ne’ebé partensia ba uma andar nia laran.
Operasaun ne’e hatudu duni governu no forsa seguransa Timor-Leste nia seriedade atu kombate krime transnasionál ne’ebé tenta buras iha ita-nia nasaun.
