Portugal Eliminadu & Ronaldo Remata Jogu Iha World Cup, Espanha Avansa Ba Kuartu-Final
Imajem : Cristiano Ronaldo. Foto : Report Football
Sapnews.com, Dallas – Selesaun Portugal hakotu nia kampaña iha FIFA World Cup 2026 hafoin hasoru Espanha ho skore 0-1 iha partida Oitavu Final.
Iha minutu 90+1, Mikel Merino hosi Espanha marka golo ida liuhosi asisténsia husi Ferran Torres hodi muda skore 0 a 1, nune’e Espanha sei hakat ba kuartu final.
Maski kapitaun Cristiano Ronaldo no kompaineiru sira esforsu to’o remata partida, Portugal la konsege halo gololu ba empata.
Rezultadu ne’e halo Portugal eliminadu hosi kompetisaun, enkuantu Espanha avansa ba fase kuarta-final ne’ebé sei hasoru manán entre Estados Unidos no Béljika.
Ho eliminasaun ne’e, Portugal hakotu nia aventura iha Mundial 2026, no ba Cristiano Ronaldo, ne’e mos marka remata nia participasaun ikus iha FIFA World Cup, tuir deklarasaun ne’ebé nia fó molok torneiu remata.
Antes ne’e, Jogador Legendáriu Cristiano Ronaldo liu hosi konferénsia imprensa deklara world cup 2026 ne’e nu’udar nia jogu ikus.
Ronaldo hatutan, nia parte la preokupa rezultadu saida mak bele mosu tanba buat hotu nia fo ona ba mundu futebol.
“La importa saida mak akontese, Cristiano sei husik kompetisaun ida-ne’e ho konsiénsia moos. La’ós deit 100%, maibé 1.000%. Ita boot sira hatene tanbasá? Tanba iha moris no iha futeból, ha’u fó ona hotu buat ne’ebé ha’u iha.” Nia sublinha
Nia dehan joga durante tinan naruk laos tanba nesesidade ka buka osan maibé tanba hadomi futebol.
“Ha’u-nia paixaun no hakarak kontinua joga durante tinan barak la’ós tanba presiza. Ne’e tanba ha’u hadomi futeból. Ha’u joga iha selesaun nasional no klube sira tanba ha’u tebes hadomi futeból, saida deit mak akontese aban, ha’u sei kontente.”
Bainhira jornalista internasionál sira husu kona-ba presiza atu sai kampiaun iha FIFA World Cup 2026, Ronaldo hatán: “Ha’u la bele tau presaun hanesan ne’e ba an rasik. Ha’u lakohi remata ha’u-nia karreira ho sentimentu katak ha’u obriga atu manán, Lae. Buat hotu sei akontese tuir Maromak nia hakarak.”
Ronaldo salienta, “Importante mak disfruta loron ida-idak, partida ida-idak, no disfruta kompetisaun espesiál ida hanesan World Cup. Maski balu hanoin ha’u la joga di’ak, ha’u la hanoin hanesan ne’e. Ha’u marka ona golo tolu. Seluk marka barak liu tanba sira joga di’ak loos, maibé ha’u mos la hanoin katak ha’u halo prestasaun aat.” Nia deklara
