Embaixada RDTL Klarifika TL Seidauk Elegível Ba Work & Holiday Ba Austrália
Sapnews Pro, Díli : Embaixada República Democrática de Timor-Leste iha Austrália fó klarifikasaun ba sidadaun Timor-oan kona-ba informasaun ne’ebé sirkula iha media sosial kona-ba Work and Holiday visa (subclass 462) katak TL Seidauk inklui lista nasaun ne’ebé Elegível Ba Work & Holiday
Tuir informasaun no rekizitu atual ne’ebé publika husi Department of Home Affairs Austrália, aplikante ba ‘Work and Holiday visa (subclass 462)’ tenki kaer pasaporte husi nasaun ne’ebé elegível/ka hetan aprovasaun.
Embaixada mós halo ona konfirmasaun kona-ba asuntu ida-ne’e ho Seksaun Timor-Leste iha Department of Foreign Affairs and Trade (DFAT) Austrália.
Lista atual nasaun sira ne’ebé pasaporte elegível ba Work and Holiday visa (subclass 462) mak: Argentina, Austria, Brazil, Chile, China (People’s Republic of), Czech Republic, Ecuador, Greece, Hungary, India, Indonesia, Israel, Luxembourg, Malaysia, Mongolia, Papua New Guinea (PNG), Peru, Poland, Portugal, San Marino, Singapore, Slovak Republic, Slovenia, Spain, Switzerland, Thailand, Türkiye, Uruguay, United States of America no Vietnam.
“Timor-Leste atualmente seidauk inklui iha lista nasaun ne’ebé pasaporte elegível ba Work and Holiday visa (subclass 462)”. Sita Pagina Ofisial Embaixada Timor-Leste iha Austrália, 25/08/2026.
Website ofisiál Department of Home Affairs Austrália mós refere katak, husi 1 Jullu 2026, iha ‘lower visa application cost’ /hatun kustu visa ba “eligible Pacific Island and Timor-Leste citizens”.
Embaixada komprende katak informasaun ida-ne’e bele hamosu konfuzaun. Importante atu klarifika katak, maski temi Timor-Leste iha informasaun kona-ba ‘lower visa application cost’, ida-ne’e la signifika katak automatikamente sidadaun ne’ebé kaer pasaporte Timor-Leste atualmente elegível/ka hetan aprovasaun atu aplika ba Work and Holiday visa (subclass 462).
Nune’e, Embaixada rekomenda ba sidadaun Timor-oan atu labele halo pagamentu ka entrega dokumentu ba ema, ajénsia ka organizasaun ruma ne’ebé promete katak bele halo aplikasaun ba Work and Holiday visa (subclass 462), no atu verifika informasaun hosi fonte ofisiál Governu Austrália nian.
Informasaun ofisiál no atualizasaun, favor haree website Department of Home Affairs Austrália:
[https://immi.homeaffairs.gov.au/visas/getting-a-visa/visa-listing/work-holiday-462/first-work-holiday-462](https://immi.homeaffairs.gov.au/visas/getting-a-visa/visa-listing/work-holiday-462/first-work-holiday-462)
Embaixada sei kontinua akompaña asuntu ida-ne’e no sei fó informasaun ba públiku bainhira iha mudansa ka klarifikasaun foun hosi autoridade Austrália.
