Lakon Durante Loron 5 ! Família Hetan Ona Agostu Nia Isin-Mate Iha Mota Daudere
Imagem : Matebian Agostu Madeira ne’ebe mota lori iha 3 Maiu no hetan iha Daudere, 08/05/2025.
SAPNewsTL, Lautém : Udan boot ne’ebe akontese iha Postu Administrativu Luro, Munisípiu Lautém resulta korrente mota lori lakon sidadaun Agostu Madeira, finalmente ohin família ho ekipa konjunta hetan ona Agusto nia mate isin iha Daudere.
Tuir informasaun ne’ebe SAPNews asesu liu hosi ekipa iha terrenu haktuir katak ohin família no ekipa konjunta hetan ona mate isin Agostu Madeira iha area mota Daudere, Postu Administrativu Lautém, Munisípiu Lautém.
“Hetan ona Matebian Agostu Madeira nia isin mate iha mota Daudere, hafoin lakon loron lima”. Informa família matebian Daniel da Silva ba SAP News TL iha Lautém, 08/05/2025
Rekorda fali katak, insidente mota lori ema na’in ida (1) ho naran Agostu Madeira, tinan 55 ne’e akontese iha loron, 03 fulan Maio, tinan 2025, iha meiu-dia oras tuku 13:25 OTL.
“Kronolójia ba akontesimentu ne’ebe APC asesu husi sasin sira ne’ebé la’o hamutuk ho vítima Agostu Madeira katak, altura ne’eba vítima ajuda hela labarik na’in haat (4) hodi hakur mota atu fila ba uma, entre labarik na’in haat (4) ne’e, nain tolu (3) mak vítima konsege ajuda ona lori ba iha mota sorin”.
“Labarik ida ikus ne’ebé vítima hakarak ajuda, maibé korrente mota ne’ebé bo’ot halo vítima Agostu Madeira monu hamutuk ho labarik ne’e, maibe labarik ne’e bele nani hodi salva-aan, entretantu vítima Agosto Madeira labele salva-aan no mota lori kedas, to’o oras ne’e ekipa ne’ebé halo buska seidauk hetan vítima refere”.Sita Ildefonso Soares, Média APC Lautém iha Pajina APC, Lautém, 05/05/2025
Imagem : Agostu Madeira
Bainhira Autoridade Protesaun Sivíl (APC) Munisípiu Lautém simu informasaun direta via-telefónika husi autoridade lokál suku Afabubo, ekipa APC imediatu halo intervensaun hodi buka vítima ne’ebé mota lori, hamutuk PNTL Eskuadra Postu Administrativu Luro, Autoridade Lokál, inklui komunidade sira.
Ekipa ne’ebé buka kompostu husi APC Munisípiu Lautém, PNTL, autoridade lokál hamutuk komunidade sira, buka tuir ona vítima Agusto Madeira, durante loron lima, (hahú data; 03-08 Maiu), hafoin hetan matebian nia mate isin ho kondisaun laiha iis no roupa nakles.
Nune’e, Hafoin hetan matebian nia mate isin, família no ekipa konjunta translada kedas ba nia uma iha Suku Afabubo, Postu Administrativu Luro hodi halo prosesu fúnebre tuir tradisaun família nian.
Jornalista : Marciana Da Conceição