Lakon Presenza Papa Nian ! Koiru : Orasaun & Koragem Mak Segredu Susesu

SAPNewsTL, Dili : Universidade Nahdalatul Ulama Surabaya, Fakuldade Enfarmagem no Parteira, Departamentu Enfarmajem gradua finalista hamutuk rihun ida ualunu resin-haat (1084).

Graduada Timor oan Koiru Nisa Ramos Costa ho laran ksolok fo agradese ba Maromak no família hotu tanba bele hetan ona graduasaun iha Universidade Nahdalatul Ulama Surabaya ho grau lisensiatura.

“Ha’u pessoalmente agradese tebes tanba bele hetan graduasaun iha Universidade UNUSA Surabaya Indonesia liliu iha area saúde, obrigada barak ba grasa no bensaun tomak ne’ebé ha’u simu”. Tenik Graduada Koiru Nisa Ramos Costa ba SAPNews iha Surabaya-Indonésia, 26/09/2024

Koiru Nisa hateten, dejafiu barak ne’ebé mosu durante estudu iha universidade liliu lian, ambiente foun, dook husi família no hasoru ema ho karater oioin.

“Enfrenta dezafiu oioin wanhira tama iha mundu akadémiku, tama iha ambiente foun, ko’alia lian foun no kompete ho kolega indoneziu sira liliu iha lian médiku ne’ebé mak ami uza ba halo tratamentu no pratika laboratórium, iha dejafiu seluk mós maka dook hosi família no aprende sai independente iha ema nia rain”. Nia sublinha

Graduada ne’e fundamenta, segredu ne’ebé nia kaer hodi luta ba susesu mak orasaun no liafuan ne’ebé nia aman matebean husik hela ba nia katak wainhira sai hosi uma ba dook buka matenek tenki luta to’o hetan rezultadu.

“Ha’u pessoalmente sempre lori orasaun tuir relijiaun islámiku, iha prosesu luta, ha’u kaer metin Pai matebian nia liafuan katak wainhira foti ona desizaun hodi hakat hosi uma ba dook buka matenek labele para iha dalan klaran maibe tenke finaliza to’o hotu”.Nisa salienta

Ramos Costa sente triste tanba selebra susesu la hetan prezesa husi nia aman hahoris tanba fila ona ba mundu seluk, maske aman nia hakarak atu oan sai susesu maibe aman la haree direta susesu ne’ebé oan feto boit konkista iha mundu akadémiku.

“Ha’u sente trizte no matabeen monu wainhira iha prosesu graduasaun bolu naran ba oin haree papa nia prezensa laiha, aman la konsege haree oan feto boot nia susesu ne’ebé konkista iha mundu akadémiku hodi serví pasiente ho étika no responsabilidade”.

Ramos mós husu ba joven sira ne’ebé sei frekuenta iha sekundária no universidade atu kontinua iha koragem, halo orasaun, esforsu, estuda badinas luta nafatin hodi realiza ida-idak nia mehi.

“Ha’u nia mensajem ba kolega sira katak keta haluha halo orasaun iha ita boot sira prosesu saida deit, koragem nafatin tanba iha família sira ne’ebe mak ho esperansa boot hein ita boot sira nia susesu, prosesu bele defisil to’o oha ne’ebé deit maibe ho orasaun maromak nia tulun, buat hotu sei la’o ho diak tuir ita nia mehi”.

Universidade Nahdalatul Ulama Surabaya, Fakuldade Enfarmagem no Parteira, Departamentu Enfarmajem gradua finalista hamutuk rihun ida ualunu resin-haat (1084), entre sira enfarmajem hamutuk 172 no parteira hamutuk 100.

Jornalista : Marciana da Conceição