Lansa Estrada Urbanu Ainaro, PM Xanana Husu Povu “Akompaña Servisu & Garante Kualidade”
Imajem : Lansamentu Reabilitação Estrada Urbano munisipiu Ainaro, 14/02/2026. Foto : Média GPM
SAPNewsTL, Ainaro – Primeiru-Ministru (PM), Kay Rala Xanana Gusmão hamutuk Ministériu Obras Públicas (MOP), Presidente Autoridade no populasaun sira lansa ona projetu rehabilitasaun estrada urbana iha munisípiu Ainaro.
Iha diskursu, Primeiru-Ministru Xanana Gusmão apela bá populasaun liu-liu joven sira atu akompaña servisu tomak, nune’e kompañia bele garante kualidade Estrada tanba uza osan povu nian.
“Ohin ita bo’ot sira sai testamuña bá assinatura kontratu entre Governu ho kompañia. Tanba aban bainrua estrada kuandu di’ak Ainaro-oan sira bele dezenvolve sira-nia atividade ekonómiku. Populasaun tomak tenke partisipa ativa atu fasilita servisu kompañia nian no mós tau-matan liu-liu kualidade”. Hateten Primeiru-Ministru Xanana Gusmão iha Ainaro, 14/02/2026. Sita Media GPM
Xefe Governu mós apela bá joven sira iha Ainaro atu labele kria konflitu bebeik maibé kaer liman hamutuk hateke bá oin, hamutuk kontribui bá dezenvolvimentu.
Iha fatin hanesan Ministru Obras Públikas, Samuel Marçal garante katak, bainhira estrada ne’e finaliza sei fasilita duni populasaun bele transporta sira-nia produtu lokál oioin bá Dili no mós bá munisípiu seluk. Tanba ne’e, buat ne’ebé oras-ne’e daudaun presiza tebes mak infraestrutura bázika hanesan estrada.
“Entaun, bainhira hakarak estrada tenke koopera tanba tinan hirak liu-bá bainhira halo estrada atu tesi ai-hun ida diskute malu to’o tinan-haat. Tanba ne’e husu bá inan-aman, autoridade lokál sira atu bainhira hakarak dezenvolvimentu ne’e la’o lalais, ita tenke koopera, tanba uluk ita hateten katak ba rai ida ne’e ita-nia vida mós hakarak fó ba mate importante rai ida ne’e hetan ukun rasik an maibé ohin loron ita atu fó rai metru ida ba Estadu atu halo estrada hodi ita la’o mós diskute naruk tebes”. Dehan MOP Samuel Marçal.
Govenante ne’e fiar katak ho prezensa komunidade nian iha serimónia lansamentu ne’e hatudu katak Ainaro-oan prontu atu simu dezenvolvimentu.
Governu lori kontratu mai asina iha ámbitu lansamentu ne’e ho razaun katak orsamentu ne’e povu nian tenke jere ho di’ak, no povu mós tenke sai sasin direta bá asinatura kontratu entre Governu ho kompañia.
Prezidente Autoridade Munisípiu Ainaro, Manuela Carmo Bucar Corte-Real, lori populasaun Ainaro hato’o agradese bá IX Governu Konstitusionál no prontu koopera bá dezenvolvimentu.
Manuela Carmo Bucar Corte-Real kontente tanba konstrusaun infraestrutura bázika inklui rehabilitasaun estrada urbana sei lori benefísiu, kresimentu ekonómiku bá atividade negósiu kiik sira, haburas produtividade munisipál no kriasaun empregu.
Reabilitasaun Estrada Urbana Pakote I Projetu rehabilitasaun estrada Ainaro Vila, Munisipiu Ainaro Package I.I-6.058.02 km sei konstrui hosi kompañia Fortuna Start Unipessoal, Lda, númeru kontratu SSS/009/MOP-2026, valór kontratu $4.324.875.82 ho durasaun fulan-neen.
Projeitu ne’e sei fiskaliza hosi ekipa tékniku Ministériu Obras Públikas no rehabilitasaun Estrada Urbana Ainaro Vila Pakote II.I-6193.25 km, sei konstrui hosi kompañia Riqueza Gavinto Unipessoal, Lda ho nuúmeru kontratu SSS/010/MOP-2026, valór kontratu $ 4,324.875,82 durasaun fulan-neen ho fiskalizasaun hosi Ministériu Obras Públikas.
