LFTL La Responde Karta Ba Opsaun Rua Husi SLB, Karketu Fo WO

SAPNewsTL, Dili: AD SLB Laulara la marka prezensa iha kampu Estadium Munisipal Dili iha loron 21 fulan abril 2023 tuir orariu orgaun Liga Futebol Timor-Leste (LFTL) fo sai kontra Karketu Dili FC tanba LFTL seidauk responde karta ofisial ba opsaun rua husi AD SLB Laulara nian entaun Karketu Dili FC fo WO ho skore 5-0 ba ekipa zigante ne’e iha jornada ikus Liga Timorense epoka 2023.

“Iha ita nia regulamentu jogu nian ne’e bainhira klube ida la marka prezensa iha kampu tuir orariu determina husi LFTL mak sansaun otomatikamente WO ho skore 5-0 nune’e ohin AD SLB Laulara la marka prezensa iha kampu entaun Karketu Dili FC fo WO no ba prosesu oin mai ami husi orgaun LFTL sei komunika ho AD SLB Laulara ba sansaun tuir mai nian”, dehan diretor relasaun publika Diogo Neto Fraga iha Estadium Munisipal Dili sesta (21/04/2023).

 

Diretor ne’e hatutan, ohin AD SLB Laulara la marka prezensa iha Estadium Munisipal Dili ne’e hodi kontra Karketu Dili FC ne’e relasaun ho jogador atu reforsa ekipa nasional nune’e tuir lolos iha loron 17 fulan abril 2023 jogador selesaun nasional U-23 atu ba kompete iha Sea Games 2023 iha Cambodia aranka ona ba halo jogu amizade iha Tailandia maibe jogador nain husi AD SLB Laulara nain la konsege ba iha loron ne’e halo problema prosesu lao to’o ohin loron la marka prezensa iha jogu ohin ne’e.

Diogo infoma, problema ne’e jogador sira husi AD SLB Laulara nain lima la konsege ba Tailandia iha loron 17 fulan abril ne’e nune’e ekipa sira husi divizaun dahuluk Liga Timorense epoka 2023 liuliu Karketu Dili FC halo reasaun makaas nune’e hatama rekursu ba iha FFTL ne’ebe orgaun LFTL hetan kuñesimentu tanba klube sira ne’e la satisfaz ho attitude jogador sira husi AD SLB Laulara ne’ebe FFTL tenki foti desizaun imediata no rigorozu ba jogador sira ne’e atu nune’e sai ezemplu ba jogador sira seluk halo tuir no orariu Liga Timorense epoka 2023 lao fulan rua ne’e desizaun konjutu husi FFTL, orgaun LFTL, SEJD no klube sira maibe tuir lolos orgaun LFTL halo orariu ba jogu fulan tolu maibe klube sira dehan menus finasiamentu no jogador sira husi klube sira mak la liu nain neen reforsa ekipa nasional ba kompete jogu internasional mak jogu sei lao nafatin.

 

Nia haforsa tan, FFTL fo karta ida ba orgaun LFTL ho konteudu atu fo kompetensia tomak ba orgaun LFTL foti desizaun ba problema jogador sira ne’e atu labele reforsa AD SLB Laulara iha loron 21 fulan abril kontra Karketu Dili FC no adia jogu ne’e ba iha loron 18 fulan maiu 2023 depois jogador sira kompete iha Sea Games 2023 nune’e orgaun LFTL iha orgaun judisional legal ne’ebe iha kompetensia absoluta no orgaun LFTL la interfere federasaun nia desizaun tanba orgaun LFTL nu’udar orgaun implementador atu ezekuta Liga Timorense nune’e iha loron 18 fulan abril 2023 orgaun judisional legal husi LFTL foti desizaun katak jogador nain lima husi AD SLB Laulara labele reforsa iha ekipa kontra Karketu Dili FC.

Membru LFTL ne’e akresenta tan, LFTL fo sansaun ba jogador nain lima ne’e atu reforsa AD SLB Laulara kontra Karketu Dili FC tan ne’e mak dirijente AD SLB Laulara la satisfaz tanba jogador nain lima ne’e iha direitu atu joga, desizaun ne’ebe orgaun judisional legal deside ne’e klube bele iha direitu para atu halo fali rekursu ba FFTL tanba federasaun mos iha komite dixiplina bainhira komite dixiplina federasaun foti ona desizaun ida ne’e mak sai desizaun final ba hotu-hotu nune’e ohin dader AD SLB Laulara haruka karta ida mai iha orgaun LFTL katak sira ohin la marka prezensa iha Estadium Munisipal Dili atu kumpre kalendariu jogu kontra Karketu Dili FC infelizmente realidade hatudu katak sira la marka prezensa duni.

Iha sorin seluk sekretariu jerál AD SLB Laulara Domingos Caeiro hatete, sira la marka prezensa tanba orgaun LFTL la responde opsaun rua husi sira iha loron 4 fulan abril 2023 to’o agora kona ba jogu AD SLB Laulara kontra Karketu Dili FC antes ekipa nasional sai ka depois sira fila husi Sea Games 2023.

“Razaun fundamental bazeia ba AD SLB Laulara la marka prezensa iha Estadium Munisipal Dili iha loron ohin tanba karta ne’ebe ami hatama iha loron 3 Abril 2023 liu ba husu atu LFTL koordena ho FFTL kona ba ekipa selesaun atu ba try out iha Tailandia, no iha loron 4 fulan abril ami iha duni enkontru, iha enkontru ne’e ami fo opsaun rua ba FFTL no orgaun LFTL maka jogu AD SLB Laulara kontra Karketu Dili FC antes ekipa nasional sai ka depois sira fila husi Sea Games 2023, nune’e husi Karketu Dili FC laiha desizaun tanba partisipa husi asitente treinador laiha kompetensia atu simu ka rezeita, no enkontru ne’e rasik laiha desizaun ida kona ba asuntu ne’ebe ami koloka, nune’e ida ne’e mak lao mai to’o ohin loron”, tenik Domingos

 

Domingos afirma tan, enkontru iha loron 4 fulan abril 2023 ne’e LFTL mak organiza no prezensa husi FFTL mak sekretariu jeral Gregorio Correia no diretor tekniku Gaspar Quintão, husi LFTL marka prezensa husi koordenador jeral Octavio da Conceicão, sekretariu ezekutivu interinu Janio Tilman, match commissioner Martinho Ribeiro no diretor balun, husi klube mak SLB prezensa treinador Julião Monteiro ho sekretariu jerál Domingos Caeiro, husi Ponta Leste mak prezensa husi prezidente klube Osorio Florindo no Karketu Dili FC delega deit asistente treinador Antonio Timotio.

Iha fatin hanesan sekretariu jeral Karketu Dili FC Elizeu Isaac Veloso dehan, ohin sira marka prezensa iha kampu tanba tuir orariu husi orgaun LFTL nune’e sira hetan vitoria ho WO no rekolla pontu tolu no prepara ba jogu tuir mai kontra Porto Taibesse FC.

“Ohin ami husi Karketu Dili FC mai tanba tuir ordem no regra orgaun LFTL fo sai nune’e ita tuir no rezultadu manan ho WO rekolla pontu tolu tanba jogador sira halo asaun iha kampu no jogador Paulo Gally Freitas mak hatama duni golu ne’ebe AD SLB Laulara karik la satisfaz ho desizaun ruma ne’e kompetensia iha orgaun LFTL no ami hein deit jogu ikus kontra Porto Taibesse FC atu aumenta ami nia fitun kampiaun ba tolu”, Elizeu hateten.

Iha tempu hanesan adeptu Pacheco Soares informa, nu’udar adeptu sente la satisfaz no kontente tanba saida ohin jogu Karketu Dili FC kontra AD SLB Laulara la akontese.

 

“Hau nu’udar adeptu jeral la suporta klube ruma gosta hare’e jogador sira hala’o jogu iha kampu sente la satisfaz no kontente tanba saida mak ohin loron jogu AD SLB Laulara kontra Karketu Dili FC la akontese tan jogador sira husi AD SLB Laulara la marka prezensa iha kampu ne’e tanba saida maski ohin adeptu barak mai Estadium Munisipal Dili atu hare’e jogador husi klube rua nia jogu”, dehan Pacheco

Reportajen: Augusto dos Santos