LFTL Rejista Klube 8 Ba Liga Timorense 2022-2023

Asistante Verifikasaun Lisensamentu LFTL, Felisberto de Jesus

SAPNewsTL, Dili: Orgaun Liga Futebol Timor-Leste (LFTL) rejista ona klube 8 husi divizaun dahuluk no daruak ba Liga Timorense epoka 2022-2023 ne’ebe sei hahu iha loron 17 fulan fevereiru 2023.

Asistante Verifikasaun Lisensamentu LFTL, Felisberto de Jesus ba jornalista iha Estadium Munisipal, Dili, tersa (24/01/2023).

“Klube sira  mak ami rejistu ona iha LFTL hamutuk ualu husi divizaun dahuluk haat Coração/Atletico Ultratramar, AS Ponta Leste, Asalam FC no  Karketu FC ho daruak haat DIT FC ,Lica Lica  Lemorai FC, Fitun Estudante  FC no  Kablake FC”, Asistente Verifikasaun Lisensamentu LFTL, Felisberto de Jesus ba jornalista sira iha Estadium Munisipal, Dili, tersa (24/01/2023).

Felisberto hatutan, klube sira ne’ebe mak seidauk rezistu ne’e maioria mak mai foti ona formulariu iha LFTL, sira kontaktu ona tempu badak sira  sei mai rejistu iha ne’e, tuir kriteria ba divizaun dahuluk rejistu jogador nain- 27  no  divizaun daruak sei rejistu jogador nain- 30.

Antes  ne’e iha loron 12 fulan fevereiru 2023 diretor Relasaun publika LFTL Diogo Neto Fraga hatete, kick off Liga Timorense epoka 2022-2023 iha loron 17 fulan fevereiru 2023 remata iha loron 30 fulan abril 2023 ne’ebe janela transferensia ba klube sira hahu iha loron 12 fulan janeiru to’o loron 11 fulan fevereiru 2023 tanba klube divizaun dahuluk no daruak aseita hotu ona.

“Ita nia jogu kick off iha loron 17 fulan fevereiru 2023 no sei remata iha loron 30 fulan abril selae inisiu fulan maiu ne’eba ami reafirma fali rejistrasaun ba klube liuliu loke janela transferensia hahu husi loron 12 fulan janeiru 2023 to’o loron fulan 11 fevereiru 2023 tanba klube sira husi divizaun dahuluk no daruak Liga Timorense epoka 2022-2023 aseita hotu ona”, tenik Diogo.

Entretantu FFTL ho orgaun LFTL enkontru no aseita malu ona atu forma orgaun regulador atu jere Liga Timorense epoka 2022-2023 tanba orgaun LFTL nia prezidente interinu daudaun ne’e la iha kompetensia atu jere liga ne’e rasik.

Reportajen: Augusto dos Santos