LFTL Submete Prospota Ba SEJD, Liga Timorense Sei Realiza Iha Fulan Dezembru
Imajen Komunikadu Imprensa husi Diretor Finansa LFTL, Caetano Carceres Correia iha Stadium Munisipal Dili, Tersa (25/10/2022).
DILI : Orgaun Liga Futebol Timor-Leste (LFTL) hatama ona proposta ba Sekretariu Estadu Juventude Desportu (SEJD) para atu realiza liga futebol Timor-Leste epoka 2022-2023 iha fulan Dezembru.
“Orgaun LFTL mos submete ona proposta ba ita nia governu liu husi Sekretariu Estadu Juventude Desportu iha loron 21 Outubru 2022, liu husi Federasaun Futebol Timor Leste (FFTL) ne’ebe ita nia governu sei aumenta tan orsamentu 40 Mill ba 240,000 USD hodi ita realiza liga Timorense epoka 2022, ami halo ona preparasaun ba Liga Timorense epoka 2022-2023 nian ami sei hahu iha Dezembru”, dehan Diretor Finansa LFTL, Caetano Carceres Correia ba Jornalista liu husi konferénsia imprensa iha Stadium Munisipal Dili, Tersa (25/10/2022).
Diretor ne’e akresenta, orsamentu ne’ebe ho valor boot ka kiik normalmente orgaun liga hakarak organiza liga Timorense epoka tinan ida ne’e iha Dezembru, tuir orariu orgaun LFTL prepara jogu sei hahu iha dezembru 2022 sei remata iha marsu 2023, orsamentu ne’ebé SEJD aloka mai la inklui finance support ba klube sira, tanba finance support ba klube sira ne’e apoiu direta husi FFTL.
Antes ne’e SEJD Abrão Saldanha hatete sira halo ona enkontru ho FFTL atu aprezenta fila fali katak liga bele realiza ka lae tanba ezekusaun orsamentu hela deit fulan rua.
“Ami presija FFTL ho LFTL atu aprezenta pedidu antes mai para ami hasai orsamentu ba sira hodi bele organiza ona liga futebol iha tinan ne’e tanba orsamentu ezekusaun governu hela deit fulan rua ona”, tenik Abrão.
Jornalista : Augusto dos Santos