Lica-Lica Konkista Vitoria Dahuluk Kontra Santa Cruz Ho 2-1

SAPNewsTL, Dili: Lica Lica Lemorai FC konkista vitoria dahuluk no hetan pontu tolu kontra Santa Cruz FC ho skore 2-1 iha jornada daruak divizaun daruak Liga Timorense epoka 2023.

Jogu Lica Lica Lemorai FC kontra Santa Cruz hala’o iha Estadium Munisipal Dili, kinta 9/03/2023

Iha jogu parte dahuluk bainhira kick off ekipa rua foti inisiativa halo presaun ba malu ne’ebe ekipa Santa Cruz FC halo atake ba Lica-Lica Lemorai FC hodi rezulta jogador Elias Gomes husi Lica Lica Lemorai FC hatama raski golu ba nia baliza hodi hatuur kedas skore 1-0, rezultadu refere halo ekipa rua halo jogu liu husi kontra atake atu aumenta golu maibe la konsege to’o minutu 45 remata Santa Cruz FC lidera ho skore 1-0.

Kontinua ba jogu parte daruak, ekipa rua muda estratejia jogu maibe sorti monu ba Lica Lica Lemorai FC ne’ebe konsege marka golu rua husi Andre Sarmento iha minutu 60 no Inacio Magno iha minutu 70 hodi muda skore ba 2-1, jogador sira husi Santa Cruz mos hetan oportunidade barak atu halo maibe la konsege tanba guarda redi adversariu asegura makaas nia redi ne’e to’o minutu 90 remata skore nafatin 2-1 hodi rezulta Lica-Lica Lemorai FC hetan vitoria dahuluk iha jornada daruak divizaun daruak Liga Timorense 2023.

Depois jogu remata asistente treinador Santa Cruz FC  Arsenio Afonso dehan, jogu parte dahuluk minutu 45 sira nia ekipa lidera uluk ho skor 1-0, maibe  jogu minutu 90 remata rezultadu determina sira nia ekipa simu derrota kontra adversariu maske derrota maibe sira  sei halo esforsu bá jogu sira tuir mai tanba jogu lima sei tuir mai.

“Jogu parte dahuluk minutu 45 ami nia ekipa lidera uluk ho skor 1-0, maibe  jogu minutu 90 remata rezultadu determina ami nia ekipa simu derrota kontra adversariu maske derrota maibe ami sei halo esforsu bá jogu sira tuir mai tanba jogu lima sei tuir mai”, tenik Arsenio

Iha sorin seluk treinador Lica-Lica Lemorai FC, Nelson Soares hatete, nia hato’o parabens ba jogador sira sira hotu, maske sira sofre uluk golu iha jogu parte dahuluk  maibe la  konsege hamate espiritu jogador sira nian hodi hadia no marka golu rua ba ekipa adversariu hodi hetan  vitoria.

“Ha’u fo parabens ba jogador sira hotu  sira hotu, maske ami sofre uluk golu iha jogu parte dahuluk  maibe la  konsege hamate espiritu jogador sira nian hodi hadia no ami marka golu rua ba ekipa adversariu iha jogu parte daruak nian to’o minutu 90 remata ami hetan  vitoria”, Nelson hateten

Reportajen: Augusto dos Santos