Loron Mundial Liberdade Imprensa ! SAPNews Firme Defende Lialos & Direitus Umanus

Imagem : Ezekutivu Mídia SAPNews iha Fatuhada-Díli, 03/05/2025

SAPNewsTL, Dili : Refleta loron mundial liberdade imprensa, Prezidente SAPNews Clementino Machado deklara SAPNews sei kontinua firme defende lialos, direitus umanus no halian lian laek sira-nia lian iha teritoriu nasional tanba midia nu’udar pilar importante iha demokrasia no asegura direitu publiku asesu informasaun ne’ebe loos, kredivel no faktual.

Loron 3 fulan Maiu nu’udar loron Internasional ba Liberdade Imprensa ne’ebe dekreta hosi Organização da Nações Unidas (ONU) hodi objetivu hodi fanun imprensa refleta prestasaun no étika profissional kada mídia no inspira públiku respeita liberdade imprensa iha mundu.

Mídia Sa’ani Assamana Prazer News Timor Leste (habadak SAPNewsTL), nu’udar meiu komunikasaun sosiál ida ne’ebe harí husi estudante universitáriu sira, formandu jornalizmu profisional sira no estudante sekundaria sira iha loron 26 Fevereiru 2022, iha ne’ebe hamriik nu’udar mídia online ho prinsípiu informativu, inspirativu, konstrutivu, produtivu, krítiku no edukativu hodi harí sosiedade timor-leste ida justu, prósperu, solidáriu no fraternu.

SAPNewsTL nu’udar órgaun komunikasaun sosiál ida ne’ebé livre no independente hosi podér polítiku no podér ekonómiku, iha ne’ebe sei dezenvolve nia atividade editoriál ho liberdade no karakter jornalizmu ida ne’ebé iha kualidade. Hala’o nia atividade jornalistika nian hodi garante no promove prinsípiu Governasaun di’ak, Kontrolu Sosiál, Inspirativu, Divertimentu no kaer metin kultura damen, domin, unidade, justisa, liberdade, demokrásia no responsabilidade.

Xefe Redasaun SAPNews Ermelinda Soares

Refleta loron 3 fulan Maiu, loron liberdade imprensa mundial

Prezidente SAPNews Clementino Machado afirma SAPNews sei kontinua firme defende lialos, direitus umanus no halian lian laek sira-nia lian iha teritoriu nasional tanba midia nu’udar pilar importante iha demokrasia no asegura direitu publiku asesu informasaun ne’ebe loos, kredivel no faktual.

“SAPNews hamrik ho orgullu tebes hodi refleta ba loron importante ida ne’e hodi servi inan aman sira, joven sira no sidadaun hothotu liu hosi halian lian sosiedade nian no sai lian ba lian laek sira ho baze informativu, inspirativu, konstrutivu no la mai atu ema serví maibe atu servi nu’udar ida ne’ebe servi liu hosi defende lialos, direitus umanus no fasilita publiku asesu informasaun ne’ebe loos, kredivel no fatual”.Tenil Presidente SAPNews Clementino Machado iha knaar fatin Fatuhada, 03/05/2025

SAPNewsTL hanesan orgaun komunikasaun sosiál ida ne’ebe ho fins lukrativu no hambriik estimula sosiedade fornese informasaun justu hodi asegura direitu sidadaun hotu nian ne’ebe fundamenta iha Konstituisaun Repúblika Demokrátika Timor-Leste Artigu 40° no 41° nian, kona-ba Liberdade Expresaun no Liberdade Imprensa.

Ho espíritu loron liberdade imprensa mundial, ami hakarak atu afirma katak :

1. SAPNewstTL sei kontinua espiritu independénsia, transparansia, Profisionalidade, integridade no imparsiálidade, kumpri ba padraun universal jornalistiku, obedese ba Kódigu Étika Jornalistiku 10 no lei oan sira ne’ebé estadu Timor-Leste hatuur ba orgaun komunikasaun sosial.
2. Ami husu ba governante sira no orgaun judisial sira no públiku em jeral hodi respeita liberdade imprensa iha Timor-Leste hodi garantia direitu públiku asesu informasaun no hato’o informasaun tuir lei inan RDTL.
3. Ami mos hakarak aproveita biban ne’e hodi husu deskulpa ba públiku karik ami nia kobertura seidauk to’o ba fatin hotu iha territoriu nasional no ami nia publikasaun sira la tuir ita boot sira espetativa, dala ida tan ami husu deskulpa, maibe ami kontinua rona imi nia sujestaun no no kritika sira hodi hadia ba futuru.
4. Ita nia ranking mundial liberdade imprensa hosi NGO Repórtagem Sem Fronteiras (RSF) tun husi top 10 ba top 20 no tinan 2025 monu ba top 39, maske nune’e maibe ita hotu kontinua firme hodi defende liberdade expresaun, direitus humanos, igualdade, akontabilidade, justisa no moris diak ba sidadaun tanba ranking ne’e la sai sasukat hodi defende lialos iha Timor-Leste.
5. Ikus liu, Lori Konseleiru, Ezekutivu no jornalista SAPNews nia naran la haluha hato’o parabens no paranbens ba midia nasional no internasional sira hotu, parabens ba jornalista sira hotu.

Iha ambitu loron mundial ne’e, SAPNews mos partisipa iha marsa liberdade hodi komemora loron mundial refere ne’ebe organiza hosi Konsellu Imprensa Timor-Leste.

Jornalista : Marciana Fernandes